ဧရာဝတီတိုင်းဒေသကြီး၊ ညောင်တုန်းမြို့နယ်တွင် ကျောင်းသား/ ကျောင်းသူများ ဘေးကင်းလုံခြုံသော အစားအသောက်များ စားသုံးနိုင်စေရေးအတွက် ၂၀၂၆ ခုနှစ်၊ ဇူလိုင်လ ၁၀ ရက်နေ့တွင် တာကွေ့ကျေးရွာရှိ ကျောင်းမုန့်ဈေးတန်းအား တာဝန်ရှိသူများက ကွင်းဆင်းစစ်ဆေးခဲ့ကြောင်း သိရသည်။
ကွင်းဆင်းစစ်ဆေးရာတွင် ညောင်တုန်းမြို့နယ် စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်ချိုမီဇင် ဒုဦးစီးမှူးမှ ရောင်းချလျက်ရှိသော စားသောက်ကုန်များ၌ မြန်မာဘာသာဖြင့် ကုန်အညွှန်းအမှတ်အသားပြည့်စုံစွာ ဖော်ပြထားခြင်း ရှိ/ မရှိ၊ ကုန်ပစ္စည်း၏ ထုတ်လုပ်သည့် ရက်စွဲနှင့် သက်တမ်းကုန်ဆုံးရက် ဖော်ပြထားမှု၊ သက်တမ်းလွန် အစားအသောက်များ ရောင်းချခြင်းရှိ/ မရှိ၊ ကုန်ပစ္စည်းများကို သန့်ရှင်းလုံခြုံစွာ သိုလှောင်ရောင်းချထားခြင်း ရှိ/ မရှိ တို့ကို စိစစ်စစ်ဆေးခဲ့ကြောင်း သိရသည်။
ထို့အပြင် ဈေးရောင်းချသူများအား စားသုံးသူကာကွယ်ရေးဥပဒေနှင့်အညီ ဘေးအန္တရာယ်ကင်းရှင်း၍ အရည်အသွေးပြည့်မီသော စားသောက်ကုန်များကိုသာရောင်းချရန်၊ သက်တမ်းလွန်ကုန်ပစ္စည်းများ မရောင်းချရန်နှင့် ကုန်အညွှန်းအမှတ်အသားများကို စနစ်တကျ စိစစ်ရောင်းချကြရန် အသိပညာပေးဆွေးနွေးခဲ့ကြောင်း သိရှိရပါသည်။
DOCA(ဧရာဝတီ)