ထိုင်းနိုင်ငံစက်မှုလုပ်ငန်းအသင်း (FTI) သည် တရုတ်အသေးစားနှင့် အလတ်စားစီးပွားရေးလုပ်ငန်းများ (SMEs) ထိုင်းနိုင်ငံတွင် ပိုမိုရင်းနှီးမြှုပ်နှံလာစေရေးအတွက် ထိုင်းလုပ်ငန်းရှင်များနှင့် စီးပွားရေးမိတ်ဖက်ချိတ်ဆက်ပေးခြင်းနှင့် ထိုင်းစီးပွားရေးဘဏ်များထံမှ ငွေကြေးထောက်ပံ့မှုရရှိနိုင်ရေးတို့ကို အားပေးကူညီသွားမည့်အစီအစဉ်များကို အကောင်အထည်ဖော် ဆောင်ရွက်လျက်ရှိကြောင်း သိရပါသည်။ FTI ၏ ဒုတိယဥက္ကဋ္ဌနှင့် ထိုင်း-တရုတ် စီးပွားရေးနှင့် ရင်းနှီးမြှုပ်နှံမှု သုတေသနဌာန ဥက္ကဋ္ဌ Veerachai Monsintorn က အရှေ့ပိုင်းစီးပွားရေးစင်္ကြံ (EEC) ဒေသ အတွင်း ရင်းနှီးမြှုပ်နှံမှုများ ပိုမိုတိုးတက်လာစေရန် Roadshow လှုပ်ရှားမှုတစ်ရပ်ကို စတင် ဆောင်ရွက်သွားမည်ဖြစ်ကြောင်း ပြောကြားခဲ့ပါသည်။ အဆိုပါလှုပ်ရှားမှုမှတစ်ဆင့် တရုတ်လုပ်ငန်းရှင်များနှင့် ထိုင်းကုမ္ပဏီများအကြား စီးပွားရေးချိတ်ဆက်မှုများ ဖော်ဆောင်ပေးကာ ပူးပေါင်းရင်းနှီးမြှုပ်နှံမှုလုပ်ငန်းများ အကောင်အထည်ဖော်နိုင်ရေးကို မြှင့်တင်ပေးသွားမည် ဖြစ်ကြောင်း ၎င်းက ပြောကြားခဲ့ပါသည်။ FTI အနေဖြင့် ထိုင်းနိုင်ငံတွင် ရင်းနှီးမြှုပ်နှံလိုပြီး ထိုင်းလုပ်ငန်းရှင်များနှင့် မိတ်ဖက်ပူးပေါင်းဆောင်ရွက်လိုသည့် တရုတ် SMEs များကို ဆွဲဆောင် နိုင်ရန် မျှော်မှန်းထားကြောင်း သိရပါသည်။ ထို့ပြင် ငွေကြေးဆိုင်ရာ ဝန်ဆောင်မှုများကို ပိုမို လွယ်ကူချောမွေ့စေရေးအတွက် FTI သည် ထိုင်းဘဏ်လုပ်ငန်းရှင်များအသင်းနှင့် ထိုင်းကုန်သည်ကြီးများအသင်းတို့ပါဝင်သည့် ကုန်သွယ်ရေး၊ စက်မှုလုပ်ငန်းနှင့် ဘဏ်လုပ်ငန်း ပူးပေါင်းညှိနှိုင်းရေးကော်မတီ (JSCCIB) နှင့် ပူးပေါင်းဆောင်ရွက်လျက်ရှိကြောင်း သိရသည်။ JSCCIB သည် စီးပွားရေးမိတ်ဖက်ချိတ်ဆက်ရေးအစီအစဉ်များကို ကူညီဆောင်ရွက်ပေးမည့်အပြင် နိုင်ငံ တကာရင်းနှီးမြှုပ်နှံသူများနှင့် ပြည်တွင်းဘဏ္ဍာရေးအဖွဲ့အစည်းများအကြား ချိတ်ဆက်ပေးသွား မည်ဖြစ်ကြောင်း၊ တရုတ် SMEs အများစုမှာ ထိုင်းဘဏ်စနစ်နှင့် မရင်းနှီးသေးသဖြင့် ချေးငွေရရှိရေးတွင် အခက်အခဲများ ကြုံတွေ့နေရကြောင်း Veerachai က ပြောကြားသည်။ FTI သည် ထိုင်းစက်မှုဇုန်ဖွံ့ဖြိုးရေးကုမ္ပဏီ Amata Corporation နှင့်လည်း ပူးပေါင်းဆောင်ရွက်လျက်ရှိပြီး တရုတ်ရင်းနှီးမြှုပ်နှံသူများကိုလက်ခံနိုင်ရန် တရုတ်စက်မှုဇုန်ဒုတိယအဆင့်စီမံကိန်းကို တိုးချဲ့အကောင်အထည်ဖော်လျက်ရှိကြောင်း သိရပါသည်။ ထိုပူးပေါင်းဆောင်ရွက်မှုကြောင့် တရုတ်လုပ်ငန်းများအတွက် စနစ်တကျဖွဲ့စည်းထားသည့် ရင်းနှီးမြှုပ်နှံမှုဝန်းကျင်တစ်ရပ် ဖော်ဆောင် နိုင်မည်ဖြစ်ပြီး စည်းမျဉ်းစည်းကမ်းများကို ထိရောက်စွာကြီးကြပ်နိုင်ရေးနှင့် ပွင့်လင်းမြင်သာမှု ပိုမိုရရှိလာမည်ဟု မျှော်လင့်ထားကြောင်း သိရပါသည်။ လက်ရှိတွင် EEC ဒေသအတွင်း လျှပ်စစ်မော်တော်ယာဉ်၊ စမတ်အီလက်ထရွန်နစ်နှင့် ပြန်လည်ပြည့်ဖြိုးမြဲစွမ်းအင်ကဏ္ဍများ၌ အကြီးစားရင်းနှီးမြှုပ်နှံမှုစီမံကိန်းများ တိုးမြှင့်ဆောင်ရွက်လျက်ရှိသဖြင့် တရုတ်ရင်းနှီးမြှုပ်နှံမှုများမှာ ဆက်လက်မြင့်တက်လျက်ရှိကြောင်း သိရသည်။ သို့ရာတွင် တရုတ်ကုမ္ပဏီအချို့သည် သတ်မှတ်စက်မှုဇုန်များ၏ ပြင်ပတွင် လုပ်ငန်းဆောင်ရွက်နိုင်ရန် ထိုင်းနိုင်ငံသား အမည်ခံရှယ်ယာရှင်များကို အသုံးပြုခဲ့သည်ဟု သတင်းများထွက်ပေါ်နေသဖြင့် စည်းမျဉ်းစည်းကမ်းလိုက်နာမှုနှင့်ပတ်သက်၍ စိုးရိမ်မှုများလည်းရှိနေကြောင်း သိရပါသည်။ Veerachai က Roadshow လှုပ်ရှားမှုမှတစ်ဆင့် တရားဝင်ရင်းနှီးမြှုပ်နှံမှုများကို အားပေးမြှင့်တင်နိုင်မည်ဖြစ်ပြီး တရားမဝင်လုပ်ငန်းများနှင့် ဆက်နွှယ်သည့် “Grey Chinese” အုပ်စုများ၏ အပျက်သဘောဆောင်သော ပုံရိပ်နှင့် ဂုဏ်သိက္ခာရှိသည့် တရုတ် SMEs များကို ခွဲခြားမြင်သာစေရန် အထောက်အကူပြုမည်ဖြစ်ကြောင်း ပြောကြားခဲ့ကြောင်း သိရပါသည်။
Bangkok Post
DOCA (ရန်ကုန်)