အင်ဒိုနီးရှား၏ စားအုန်းဆီ အချိုးအစား ၅၀ ရာခိုင်နှုန်းပါဝင်သည့် ဇီဝဒီဇယ်ဆီ (B50) ထုတ်လုပ် မည့်အစီအစဉ်ကို အကောင်အထည်ဖော်ခြင်းသည် နိုင်ငံကတင်သွင်းရသည့် ဒီဇယ်ဆီ အပေါ် မှီခိုရမှုအား လျှော့ချနိုင်မည်ဟု မျှော်လင့်သော်လည်း စားအုန်းဆီတင်ပို့မှုမှရရှိသည့် ဝင်ငွေကို တစ်နှစ်လျှင် အမေရိကန်ဒေါ်လာ ၂.၇ ဘီလီယံခန့်လျှော့ချနိုင်ကာ ပြည်တွင်းစွမ်းအင် ထုတ်လုပ်မှု အတွက် စားအုန်းဆီကြမ်း(CPO)ပိုမိုအသုံးပြုမှုများပြားလာမည်ဖြစ်ကြောင်း Jakarta Globe သတင်း ဌာနက ဇူလိုင်လ ၈ ရက်တွင် ဖော်ပြထားသည်။
စားအုန်းဆီပါဝင်မှု ၅၀ ရာခိုင်နှုန်းအထိ တိုးမြှင့်ကာ ရောစပ်ထုတ်လုပ်ခွင့်ပြုလိုက်သည့် အစီအစဉ်အား ၈ လကြာ စမ်းသပ်မှုအပြီး ဇူလိုင် ၁ ရက်တွင် စတင်အကောင်အထည်ဖော်ခဲ့သည်။ အဆိုပါမူဝါဒအရ ဇီဝဒီဇယ်အစီအစဉ်အတွက် စားအုန်းဆီကြမ်း အသုံးပြုမှု ပိုမိုမြင့်တက်လာမည်ဖြစ် ခြင်းကြောင့် ယခုနှစ် ဒုတိယနှစ်ဝက်တွင် စားအုန်းဆီကြမ်းတင်ပို့မှု တန်ချိန် ၂ သန်းခန့် လျော့ကျနိုင် ကြောင်း အင်ဒိုနီးရှားစားအုန်းဆီအသင်း(Gapki)က ခန့်မှန်းထားသည်။
တစ်နှစ်အတွင်း အကောင်အထည်ဖော်မည်ဆိုပါက ပြည်တွင်းစားအုန်းဆီကြမ်း လိုအပ် ချက်မှာ တန်ချိန် ၄ သန်းအထိ ရှိလာနိုင်ကြောင်းလည်း စားအုန်းဆီလုပ်ငန်ရှင်များ၏ ခန့်မှန်းချက် အရ သိရှိရကြောင်း ဖော်ပြထားသည်။
အင်ဒိုနီးရှားနိုင်ငံ၊ အမျိုးသားကာကွယ်ရေးတက္ကသိုလ် (UPN -Universitas Pembangunan Nasional) Veteran Jakarta မှ စီးပွားရေးပညာရှင် Mr. Achmad Nur Hidayat က အင်ဒိုနီးရှား၏ ကုန်သွယ်မှုချိန်ခွင်လျှာ အားနည်းသွားသည့်အတွက် မူဝါဒကို ဂရုတစိုက် သုံးသပ်ဖော်ဆောင်သင့် ကြောင်း ဇူလိုင်လ ၇ ရက် (အင်္ဂါနေ့)တွင် ပြောကြားခဲ့သည်။ ၂၀၂၆ ခုနှစ်၊ မေလတွင် လစဉ် ကုန်သွယ်မှုလိုငွေ အမေရိကန်ဒေါ်လာ ၁.၆ ဘီလီယံ စံချိန်တင်ခဲ့ပြီး ၆ နှစ်တာ လစဉ် ကုန်သွယ်မှုပိုငွေ ပြမှုကို အဆုံးသတ်ခဲ့ကြောင်း ၎င်းကဆိုသည်။
စားအုန်းဆီသည် အင်ဒိုနီးရှားအိမ်ထောင်စုအများစုစားသုံးသော ဟင်းချက်ဆီအတွက် အဓိက ကုန်ကြမ်းဖြစ်သောကြောင့် မဟာဗျူဟာအရ အရေးပါသော ကုန်ပစ္စည်းဖြစ်ကြောင်း ၎င်းက မှတ်ချက်ပြုပြောကြားခဲ့သည်။
Achmad ၏အဆိုအရ ဒီဇယ်ဆီလျှော့ချတင်သွင်းမှုကြောင့် ရရှိမည့်သက်သာမှုက စားအုန်းဆီ တင်ပို့မှုမှရရှိသော ဝင်ငွေဆုံးရှုံးမှု၊ ဇီဝဒီဇယ်ဆီထုတ်လုပ်ရေး အစိုးရ၏ အထောက်အပံ့နှင့် ကုန်ကျ စရိတ်များ၊ ပြည်တွင်းစားသုံးဆီ စျေးနှုန်းများ မြင့်မားမှုအန္တရာယ်တို့ကို ကျော်လွှားနိုင်မှသာ B50 အစီအစဉ်သည် အင်ဒိုနီးရှားနိုင်ငံပြင်ပဆိုင်ရာမျှခြေဖြစ်မှုကို တိုးတက်စေမည် ဖြစ်သည်။
အင်ဒိုနီးရှားသည် ဒီဇယ်ဆီ တင်သွင်းလာသည်မှာ ကာလရှည်ကြာနေပြီဖြစ်သောကြောင့် B50 အစီအစဉ် ဆောင်ရွက်မည့် ရည်ရွယ်ချက်ကို နားလည်ပေးနိုင်ကြောင်း၊ ကမ္ဘာ့ရေနံဈေးတွေတက် လာသည့်အခါ၊ နိုင်ငံတော်ဘတ်ဂျက်အပေါ် ဖိအားများတိုးလာပြီး ရေနံနှင့် သဘာဝဓာတ်ငွေ့ ကုန်သွယ်မှုလိုငွေ ကျယ်ပြန့်လာကာ စွမ်းအင်ထောက်ပံ့မှုအတွက် စျေးပိုကြီးလာကြောင်း ၎င်းက ဆို သည်။
Achmad သည် စားအုန်းဆီ ပါဝင်မှု ၅၀ ရာခိုင်နှုန်းအထိ မဖြစ်မနေရောစပ်အသုံးပြုမှုကို ကျင့်သုံးမည့်အစား လိုက်လျောညီထွေရှိသော နည်းလမ်းတစ်ခုဖြစ်သည့် ပြည်တွင်းစားအုန်းဆီ သိုလှောင်မှုလက်ကျန်စာရင်းများ၊ စားအုန်းဆီနှင့် ဟင်းချက်ဆီဈေးနှုန်းများနှင့် နိုင်ငံ၏ ကုန်သွယ်မှု မျှခြေဖြစ်မှုကို ချိန်ညှိနိုင်သော စားအုန်းဆီပါဝင်မှု ပမာဏကိုသာ ရောစပ်အသုံးပြုသင့်ကြောင်း အကြံပြုပြောကြားခဲ့သည်။
ပြည်တွင်း၌ စားအုန်းဆီ လက်ကျန်ပမာဏ တင်းကျပ်လာပြီး အစားအသောက်ဈေးနှုန်း များ မြင့်တက်လာပါက ဇီဝဒီဇယ်ဆီ ရောစပ်မှုလျော့ချသင့်ကြောင်း၊ အပြန်အလှန်အားဖြင့် စားအုန်းဆီ ထုတ်လုပ်မှုတိုးတက်လာပြီး ပို့ကုန်ဈေးနှုန်းများ အားနည်းလာသည့်အခါ ဇီဝဒီဇယ်ဆီ သုံးစွဲမှုကို လည်း တိုးတက်ဆောင်ရွက်သင့်ကြောင်း အင်ဒိုနီးရှားနိုင်ငံ၊ အမျိုးသားကာကွယ်ရေး တက္ကသိုလ် (UPN -Universitas Pembangunan Nasional) Veteran Jakarta မှ စီးပွားရေးပညာရှင် Mr. Achmad Nur Hidayat က ဆက်လက်ပြောကြားခဲ့ကြောင်း သတင်းရရှိပါသည်။
Source: Jakarta Globe, 8 July 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)