ပခုက္ကူဒေသ၏ နှမ်းဈေးကွက်အကြောင်း တစ်စေ့တစ်စောင်း

          မကွေးတိုင်းဒေသကြီး၊ ပခုက္ကူခရိုင်၊ ပခုက္ကူဒေသအပါအဝင် မြန်မာနိုင်ငံအလယ်ပိုင်း မိုးခေါင် ရေရှားရပ်ဝန်းတွင် နှမ်းကို ရာသီဥတု နှင့် ရေရရှိမှုပေါ်မူတည်၍ မိုးဦးနှမ်း၊ မိုးနှောင်းနှမ်း၊ နွေနှမ်း ဟူ၍ တစ်နှစ်လျှင် (၃)ကြိမ် ခွဲခြား စိုက်ပျိုးကြပါသည်။ ပခုက္ကူဒေသတွင် မိုးဦးနှမ်းကို အများဆုံးစိုက်ပျိုးကြပြီး မေလနှင့် ဇွန်လ တွင် စတင်စိုက်၍ ဩဂုတ်လ နှင့် စက်တင်ဘာလ တို့တွင် ရိတ်သိမ်းကြမည်ဖြစ်သည်။

ပခုက္ကူဒေသတွင်  ၂၀၂၆ ခုနှစ်၊ ဇွန်လ (စတုတ္ထပတ်)တွင် အရောင်းအဝယ်ဖြစ်နေသော နှမ်း ဈေးနှုန်းမှာ နှမ်းဖြူတစ်တင်းလျှင် ကျပ်(၁၁၂၀၀၀ - ၁၁၆၀၀၀)၊ နှမ်းနက်(စမုံ) တစ်တင်းလျှင် ကျပ် (၁၇၀၀၀၀ - ၁၈၀၀၀၀)ဖြင့် အရောင်းအဝယ်ဖြစ်နေပြီး  နွေနှမ်းသစ်များ လှိုင်လှိုင်ပေါ်ချိန်ဖြစ်သဖြင့် ကုန်စည်ဒိုင်၌ဝင်သမျှ အရောင်းအဝယ်သွက်နေပါသည်။ နှမ်းနက်(စမုံ)ကို မန္တလေး ဝယ်လက်များမှ တစ်ဆင့် တရုတ်နိုင်ငံသို့ တင်ပို့ရန် အဓိက အဝယ်လိုက်နေကြောင်း သိရပါသည်။

          ပခုက္ကူမြို့ပေါ်ရှိ ဆီစက်ပိုင်ရှင်များ၊ နှမ်းလှော်လုပ်ငန်းရှင်များနှင့် စားသောက်ကုန်ထုတ်လုပ် သော လုပ်ငန်းရှင်များက နှမ်းဖြူနှင့် နှမ်းညိုများကို ပုံမှန် အဝယ်ရှိနေကြပါသည်။ ပခုက္ကူခရိုင်အတွင်း ရှိ မြစ်ခြေ၊ ကမ္မနှင့် ရေစကြိုမြို့နယ် ကျေးရွာများမှ နယ်မြေအခြေအနေပေါ်မူတည်၍ နွေနှမ်းများ နေ့စဉ် ဝင်ရောက်လျက်ရှိပါသည်။ ကုန်စည်ဒိုင်တွင် တစ်ရက်လျှင် ပျမ်းမျှ အိတ်ရေ(၁၀၀) မှ (၂၀၀) ဝန်းကျင် ပုံမှန်အရောင်းအဝယ် ဖြစ်လျက်ရှိကြောင်း သိရှိရပါသည်။

     ယခင်လနှင့် ဈေးနှုန်းနှိုင်းယှဉ်ပါက မေလတွင် နှမ်းအသစ်များအပေါ်သေးဘဲ လက်ကျန် အဟောင်းများဖြင့်သာ အရောင်းအဝယ်ဖြစ်သောကြောင့် လက်ရှိ ဇွန်လ ဈေးနှုန်းများထက် ပို၍ အမြင့်ပိုင်းတွင်ရှိနေခြင်း၊ လက်ရှိအချိန်တွင် နွေနှမ်းပေါ်ချိန်ဖြစ်သော်လည်း ယခင်နှစ်များထက် စိုက်ဧက နှင့် အထွက်နှုန်း အနည်းငယ်လျော့နည်းခြင်းကြောင့် ဈေးနှုန်းများ အဆမတန် ကျဆင်းသွားခြင်းမရှိဘဲ ပစ္စည်းလက်ကျန်နှင့် ပြည်ပဝယ်လိုအားပေါ်မူတည်၍ တည်ငြိမ်နေကြောင်း၊ ပဲကုန်သည်များ၏ သုံးသပ်ချက်အရ သိရှိရပါသည်။

DOCA(မကွေး)