ပန်းအလှကို ပန်းတိမ်ဆရာလက်မှိုင်ချရသည်အထိ တင်စားခေါ်ဆိုသော ပန်းတိမ်ငိုပန်းသည် မိုးရာသီ၌ အဓိကပွင့်လန်းတတ်သော ရေပန်းစားသည့်ပန်းတစ်မျိုးလည်းဖြစ်ပါသည်။ ဇွန်လ ပထမပတ်မှ စတင်၍ ဈေးကွက်တွင် ပေါ်ဦးပေါ်ဖျားအဖြစ် ရောင်းချလျက်ရှိပါသည်။ မြန်မာလူမျိုးများအနေနဲ့ ဘုရားပန်းအဖြစ်သာမက အခမ်းအနားများတွင်ပါ တန်ဖိုးထား အလှဆင်သော ပန်းတစ်မျိုးလည်း ဖြစ်ပါ သည်။ ပန်းထိမ်ငိုပန်းကို အဖြူရောင်၊ ခရမ်းရောင်၊ ပန်းရောင်နှင့် အဝါဖျော့ရောင်စသည့် အရောင်များစွာ ရှိတတ်ပါသည်။ ပန်းတိမ်ငိုပန်းသည် ဘုရားပန်းအဖြစ် ရေရှည်ခံနိုင်ပြီး ကြည့်ရှုရသည်မှာလည်း နှစ်ထောင်းအားရစရာ ကောင်းလှပါသည်။ အဆိုပါ ပန်းထိမ်ငိုပန်းကို မြန်မာတစ်နိုင်ငံလုံးတွင် နေရာအနှံ့ အပြားတွင် စိုက်ပျိုးကြပြီး တချို့ကစီးပွားဖြစ်စိုက်ပျိုးကြပြီး၊ တစ်ချို့ကမိသားစုဝင်ငွေတစ်ဖက်တစ်လက် အပိုငွေရရှိစေရန် တစ်နိုင်တစ်ပိုင်စိုက်ပျိုးကြပါသည်။ ပန်းတိမ်ငိုပန်းကို ပြည်မြို့အနီးတစ်ဝှိက်ရှိ ကျေးရွာ များ၊ စက်မှုကွက်သစ်နှင့် နဝဒေးကွက်သစ်ဘက်တို့တွင် တစ်နိုင်တစ်ပိုင် စိုက်ပျိုးကြပြီး မှော်ဇာ၊ ဇီးအုပ်၊ တောင်လုံးညို၊ ပေါက်ခေါင်း၊ ပန်းတောင်း၊ အင်းမ၊ ရွှေတောင်အစရှိသော မြို့နယ်များမှ ပြည်မြို့ မြို့မ စည်ပင်သာယာဈေးကြီးနှင့် အခြားဈေးများတွင် တိုက်ရိုက်သော်လည်းကောင်း၊ တစ်ဆင့်ခံပန်းသည်များ ဖြင့်သော်လည်းကောင်း ရောင်းချကြပါသည်။ ပြည်မြို့၏ ပေါ်ဦးပေါ်ဖျားဖြစ်သည့် ပန်းတိမ်ငိုပန်း အဖြူရောင် (သို့မဟုတ်) ခရမ်းရောင်အကြီး အချော(၅)တံပါ တစ်စည်းလျှင် ကျပ် (၉၀၀၀ - ၁၀၀၀၀) နှင့် အလတ် (၅) တံပါ တစ်စည်းလျှင် ကျပ် (၅၀၀၀ - ၆၀၀၀)ဖြင့် အရောင်းအဝယ်ဖြစ်ကြောင်း သိရှိရပါသည်။ ပြည်မြို့နှင့်မြို့နယ်များထွက်ရှိသော ပန်းတိမ်ငိုပန်းများကို ရထားဖြင့် ရန်ကုန်မြို့ရှိ သီရိမင်္ဂလာ ဈေးသို့အများဆုံး တင်ပို့ရောင်းချကြောင်း သိရှိရပါသည်။
DOCA(ပဲခူး)