မြန်မာနိုင်ငံ ကုန်သွယ်မှုမြှင့်တင်ရေးအဖွဲ့၏ ထုတ်ပြန်ချက်အရ မြန်မာနိုင်ငံ ပြောင်းလုပ်ငန်းအဖွဲ့ချုပ်နှင့် ဖိလစ်ပိုင်နိုင်ငံတကာ ကုန်သွယ်ရေးကော်ပိုရေးရှင်း (PITC) တို့သည် ဖေဖော်ဝါရီ လ ၂၆ ရက်နေ့က ဖိလစ်ပိုင်နိုင်ငံ၊ မနီလာမြို့တွင် ပြောင်းတင်ပို့မှုမြှင့်တင်ရန် နှစ်နိုင်ငံကုန်သွယ်ရေး သဘောတူညီချက်တစ်ရပ်ကို လက်မှတ်ရေးထိုးခဲ့ကြောင်း သိရပါသည်။
အဆိုပါသဘောတူညီချက်သည် နှစ်နိုင်ငံအကြား ကုန်သွယ်မှုပူးပေါင်း ဆောင်ရွက်မှုကိုမြှင့်တင်ရန်၊ စိုက်ပျိုးရေးတန်ဖိုးကွင်းဆက်ကို အားကောင်းစေရန်နှင့် နှစ်နိုင်ငံလုံးရှိ လုပ်ငန်းရှင်များအတွက် အကျိုးရှိစေမည့် ဈေးကွက်အခွင့်အလမ်းသစ်များကို ရှာဖွေဖော်ထုတ်ရန် ရည်ရွယ် လျက်ရှိကြောင်း သိရပါသည်။
၎င်းပူးပေါင်းဆောင်ရွက်မှုမှတစ်ဆင့် မြန်မာနိုင်ငံသည် ကုန်သွယ်မှု လွယ်ကူချောမွေ့စေခြင်းဖြင့် နိုင်ငံတကာ ချိတ်ဆက်ဆောင်ရွက်မှုများတွင် ပိုမိုနက်ရှိုင်းစွာ ပူးပေါင်းဆောင်ရွက် သွားမည်ဖြစ်ပြီး မြန်မာလုပ်ငန်းရှင်များအတွက် စီးပွားရေးအခွင့်အလမ်းများကို ဆက်လက်ဖော်ဆောင်ပေးသွားမည်ဖြစ်ကြောင်း သိရပါသည်။ ပြောင်းသည် မြန်မာနိုင်ငံ၏ စိုက်ပျိုးရေးကဏ္ဍတွင် ဆန်စပါးပြီးလျှင် ဒုတိယအရေးအပါဆုံး သီးနှံဖြစ်ပြီး အလားအလာရှိသော ငွေဖြစ်လွယ်သည့် သီးနှံတစ်ခုလည်း ဖြစ်ပါသည်။ ပြောင်းကို ရှမ်းပြည်နယ်၊ ကယားပြည်နယ်၊ နေပြည်တော်၊ မန္တလေးနှင့် စစ်ကိုင်းတိုင်းဒေသကြီးတို့တွင် အများဆုံးစိုက်ပျိုးလျက်ရှိသည်။ မိုးပြောင်းကို မေလနှင့် ဇွန်လတို့တွင် စိုက်ပျိုးပြီး ဆောင်းပြောင်းကို အောက်တိုဘာလနှင့် နိုဝင်ဘာလတို့တွင် စိုက်ပျိုးလျက်ရှိပါသည်။
ပြောင်းသည် တိရစ္ဆာန်အစာ ထုတ်လုပ်မှုလုပ်ငန်းတွင် မရှိမဖြစ်လိုအပ်သော ကုန်ကြမ်း တစ်ခုဖြစ်ပြီး နိုင်ငံတကာဝယ်လိုအား အမြဲမပြတ်ရှိနေသော သီးနှံတစ်မျိုးဖြစ်ပါ သည်။ ပြောင်းကို ပြောင်းဖူးကစီဓာတ် (Starch)၊ ဆီနှင့် သကြားအစားထိုး အချိုဓာတ်များ ထုတ်လုပ်ရာတွင်လည်း အသုံးပြုလျက်ရှိပါသည်။ ထို့အပြင် အချို့နိုင်ငံများသည် ပြောင်းကို မော်တော်ယာဉ်များအတွက် ဇီဝလောင်စာ (အီသနော) အဖြစ်သို့ ပြောင်းလဲအသုံးပြုကြ ကြောင်း သိရပါသည်။
မြန်မာ့ပြောင်းသည် အရည်အသွေး ကောင်းမွန်ခြင်းကြောင့် ထိုင်း၊ တရုတ်၊ ဗီယက်နမ်နှင့် ဖိလစ်ပိုင်နိုင်ငံတို့မှ ဝယ်လိုအား အလွန်များပြားလျက်ရှိပြီး အိန္ဒိယနိုင်ငံနှင့် ဘင်္ဂလားဒေ့ရှ်နိုင်ငံတို့ကလည်း ဝယ်ယူလျက်ရှိပါသည်။ အိမ်နီးချင်းနိုင်ငံများသို့ နယ်စပ်ဂိတ် များမှတစ်ဆင့် တန်ချိန် သန်းပေါင်းများစွာ တင်ပို့လျက်ရှိပြီး နိုင်ငံအတွက် နိုင်ငံခြားဝင်ငွေ ရှာဖွေပေးလျက်ရှိပါသည်။ ပြောင်းသည် စိုက်ပျိုးရလွယ်ကူပြီး ခိုင်မာသောဈေးကွက်ရှိခြင်းကြောင့် စနစ်တကျစိုက်ပျိုးမည်ဆိုပါက တောင်သူများနှင့် နိုင်ငံတော်၏ စီးပွားရေးကို အကျိုးပြုမည်ဖြစ်ပါသည်။
ထိုင်းနိုင်ငံသည် ဖေဖော်ဝါရီ ၁ ရက်မှ ဩဂုတ် ၃၁ ရက်အတွင်း အခွန်ကင်းလွတ်ခွင့်ဖြင့် မြန်မာနိုင်ငံမှပြောင်းတင်သွင်းမှုကို ခွင့်ပြုထားခဲ့ပါသည်။ သို့ရာတွင် ထိုင်းနိုင်ငံ၏ ပြောင်းပေါ်ချိန်တွင် တင်သွင်းမည်ဆိုပါက ၎င်းတို့၏ စိုက်ပျိုးတောင်သူများ၏ အခွင့်အရေးကို ကာကွယ်ရန် အတွက် အမြင့်ဆုံးအခွန်နှုန်းထား ၇၃ ရာခိုင်နှုန်းအထိ စည်းကြပ်လေ့ရှိကြောင်း သိရပါသည်။ ထို့အပြင် တရုတ်နိုင်ငံသည် အစားထိုးဖွံ့ဖြိုးမှု အစီအစဉ်အောက်တွင် မြန်မာ့ပြောင်းကို နယ်စပ်ကုန်သွယ်ရေးမှတစ်ဆင့် ဝယ်ယူလျက်ရှိပြီး မြန်မာနိုင်ငံနှင့် တရုတ်နိုင်ငံအကြား တရားဝင် ပြောင်းကုန်သွယ်မှုကို ၂၀၂၂ ခုနှစ်ကုန်တွင် စတင်ခဲ့ကာ မြန်မာကုမ္ပဏီ စုစုပေါင်း ၁၁၂ ခုအား ပြောင်းတင်ပို့ရန် ခွင့်ပြုထားပြီးဖြစ်ကြောင်း သိရပါသည်။
မြန်မာနိုင်ငံသည် ပြည်ပကုန်သွယ်ဖက်နိုင်ငံများသို့ နှစ်စဉ် ပြောင်းတန်ချိန် နှစ်သန်းကျော် တင်ပို့လျက်ရှိပြီး ပြောင်းကို ရှမ်း၊ ကချင်၊ ကယားနှင့် ကရင်ပြည်နယ်များအပြင် မန္တလေး၊ စစ်ကိုင်းနှင့် မကွေးတိုင်းဒေသကြီးတို့တွင် စိုက်ပျိုးလျက်ရှိပါသည်။ မြန်မာနိုင်ငံတွင် ဆောင်း၊ နွေနှင့် မိုး ဟူ၍ ပြောင်းရာသီ သုံးမျိုးရှိပြီး မြန်မာနိုင်ငံမှ နှစ်စဉ်ပြောင်းထွက်ရှိမှုမှာ တန်ချိန် ၂.၅ သန်းမှ ၃ သန်းခန့်ရှိကြောင်း သိရပါသည်။
Source: Global New Light of Myanmar
DOCA (ရန်ကုန်)