အင်ဒိုနီးရှားနိုင်ငံ၏ စားအုန်းဆီအကြမ်း (CPO) နှင့် ၎င်း၏ နောက်ဆက်တွဲထွက်ကုန်များ တင်ပို့မှုမှဝင်ငွေ အမေရိကန်ဒေါ်လာ ၂.၂၉ ဘီလီယံအထိ ရရှိခဲ့ကြောင်း သိရပါသည်။ စားအုန်းဆီ ထောက်ပံ့မှုကဏ္ဍတွင် ထိပ်တန်းမှ ဦးဆောင်နေသည့် အင်ဒိုနီးရှားနိုင်ငံသည် ၂၀၂၅ ခုနှစ်၊ အလားတူကာလတွင် အဆိုပါ ဟင်းသီးဟင်းရွက်ဆီ အမျိုးအစားမှ ဝင်ငွေအမေရိကန်ဒေါ်လာ ၁.၄၄ ဘီလီယံအထိ ရရှိခဲ့ကြောင်း သိရပါသည်။ တင်ပို့မှုပမာဏသည် တန်ချိန် ၁.၂၇ သန်းတန်မှ ၂.၂၄ သန်းတန်အထိ တစ်နှစ်ထက်တစ်နှစ် ၇၇.၀၇ ရာခိုင်နှုန်း မြင့်တက်လာကြောင်း သိရပါသည်။
နိုင်ငံတကာစျေးကွက်ရှိ စားအုန်းဆီအကြမ်း (CPO) စျေးနှုန်းမှာ ဇန်နဝါရီလတွင် တစ် မက်ထရစ်တန်လျှင် ပျမ်းမျှ ၉၉၇.၈၂ ဒေါ်လာနှုန်းဖြင့် တစ်လထက်တစ်လ ၁.၈၁ ရာခိုင်နှုန်း မြင့်တက်လာခဲ့ကြောင်းနှင့် ယခင်နှစ် အလားတူကာလနှင့် နှိုင်းယှဉ်ပါက CPO စျေးနှုန်းမှာ ၆.၇၇ ရာခိုင်နှုန်း ကျဆင်းသွားခဲ့ကြောင်း သိရပါသည်။ ဇန်နဝါရီလတွင် အီရန်သို့ တင်ပို့သည့် ဟင်းသီးဟင်းရွက်ဆီနှင့် တိရစ္ဆာန်အဆီ တင်ပို့မှုစုစုပေါင်းမှာ ဒေါ်လာ ၂.၁ သန်းတန်ခန့်ရှိခဲ့ကြောင်း သိရပါသည်။
အင်ဒိုနီးရှားနိုင်ငံ၏ ကုန်ပစ္စည်းကုန်သွယ်မှု ပိုငွေမှာ ၂၀၂၅ ခုနှစ်၊ ဒီဇင်ဘာလတွင် ၂.၅၁ ဘီလီယံရှိခဲ့ရာမှ ယခုနှစ်အစောပိုင်းတွင် ၉၅၀ သန်းအထိ ကျဆင်းသွားခဲ့ကြောင်းနှင့် ၎င်းသည် ၂၀၂၅ ခုနှစ် ဇန်နဝါရီလ၏ ကုန်သွယ်မှုပိုငွေ ၃.၄၉ ဘီလီယံနှင့် နှိုင်းယှဉ်ပါက သိသိသာသာ လျော့ကျသွားခြင်းဖြစ်ကြောင်း သိရပါသည်။ သို့ရာတွင် အရှေ့တောင်အာရှ၏ အကြီးဆုံး စီးပွားရေးနိုင်ငံဖြစ်သော အင်ဒိုနီးရှားနိုင်ငံသည် ၂၀၂၀ ပြည့်နှစ် မေလမှစတင်၍ ၆၉ လဆက်တိုက် ကုန်သွယ်မှုပိုငွေပြနေသည့် အခြေအနေကိုမူ ဆက်လက်ထိန်းထားနိုင်ခဲ့ကြောင်း သိရှိရပါသည်။
Source: Jarkata Globe
DOCA (ရန်ကုန်)