ဗီယက်နမ်နိုင်ငံစက်မှုနှင့် ကုန်သွယ်ရေးဝန်ကြီးဌာနအောက်ရှိ ပို့ကုန်-သွင်းကုန်ဦးစီးဌာန က ၂၀၂၆ ခုနှစ်တွင် ဗီယက်နမ်၏ဆန်တင်ပို့ရာ၌ ရင်ဆိုင်ရမည့် အခွင့်အလမ်းများနှင့် စိန်ခေါ်မှုများနှင့် ပတ်သတ်၍ အလုပ်ရုံဆွေးနွေးပွဲကျင်းပခဲ့ကြောင်း သိရပါသည်။ ပို့ကုန်-သွင်းကုန်ဦးစီးဌာန၏ ညွှန်ကြားရေးမှူးချုပ် Nguyen Anh Son က ဆန်စပါးကဏ္ဍသည် များစွာသောဒေသများတွင် ပထဝီနိုင်ငံရေးမတည်ငြိမ်မှုများ၊ ငွေကြေးဖောင်းပွမှုမြင့်တက်ခြင်းနှင့် ကမ္ဘာလုံးဆိုင်ရာကုန်သွယ်ရေးနှင့် ရင်းနှီးမြှုပ်နှံမှုနှေးကွေးခြင်းတို့ပါဝင်သည့် များစွာသောအခက်အခဲများနှင့် ရင်ဆိုင်ရနိုင်ကြောင်း ပြောကြားခဲ့ပါသည်။ အဓိကစီးပွားရေးအင်အားကြီးနိုင်ငံများတွင် ငွေကြေးမူဝါဒများ တင်းကျပ်မှုသည် ဖွံ့ဖြိုးဆဲနိုင်ငံများတွင် ဘဏ္ဍာရေးနှင့် ငွေကြေးဈေးကွက်များအပေါ် ဖိအားများ ဆက်လက်ဖြစ်ပေါ်စေကြောင်း သိရပါသည်။ တစ်ချိန်တည်းမှာပင် ကမ္ဘာလုံးဆိုင်ရာစားသုံးသူဝယ်လိုအားနှင့် စီးပွားရေးဆောင်ရွက်မှုသည် ဆက်လက်နိမ့်ကျနေကြောင်း သိရပါသည်။ Son က ကိုယ်ကျိုးစီးပွားကာကွယ်ရေးစီမံချက်များသည်လည်း များစွာသောပုံစံများနှင့် ပြန်လည်ပေါ်ထွက်လာပြီး ဖွံ့ဖြိုးပြီးနိုင်ငံများသည် စားသုံးသူလုံခြုံစိတ်ချရမှုနှင့် ရာသီဥတုဖောက်ပြန်မှုအပေါ် ဦးစားပေးမှုမြင့်တက်လာခြင်းက တင်သွင်းသည့်ကုန်ပစ္စည်းများအပေါ် စံနှုန်းများနှင့် စည်းမျဉ်းသစ်များကိုချမှတ်လာစေကြောင်း ပြောကြားခဲ့ပါသည်။ အကောက်ခွန်ဦးစီးဌာနထံမှအချက်အလက်များအရ ဗီယက်နမ်သည် ၂၀၂၅ ခုနှစ်၏ ပထမ ၁၁ လတွင် အမေရိကန်ဒေါ်လာ ၃.၈၅ ဘီလီယံတန်ဖိုး ရှိသောဆန်တန်ချိန် ၇.၅၃ သန်းကိုတင်ပို့ခဲ့ကြောင်း သိရပါသည်။ ပျမ်းမျှတင်ပို့သည့်ဈေးနှုန်းမှာ တစ်တန်လျှင် ၅၁၁ အမေရိကန်ဒေါ်လာရှိပြီး ပမာဏတွင် ၁၀.၉ ရာခိုင်နှုန်းကျဆင်းခဲ့သော်လည်း တန်ဖိုးတွင် ၂၇.၄ ရာခိုင်နှုန်းမြင့်တက်ခဲ့ကြောင်း သိရပါသည်။ အင်ဒိုနီးရှား ( ၉၆ ရာခိုင်နှုန်း ကျဆင်း)နှင့် မလေးရှား (၃၂.၅ ရာခိုင်နှုန်းကျဆင်း) တို့ပါဝင်သည့် များစွာသောဈေးကွက်များတွင် စံချိန်တင်သိသာစွာကျဆင်းခဲ့ကြောင်း သိရပါသည်။ သို့သော် ဂါနာ (၅၂.၆၃ ရာခိုင်နှုန်းမြင့်တက်)၊ တရုတ် (၁၆၅ ရာခိုင်နှုန်းမြင့်တက်)၊ ဆီနီဂေါ( ၇၃ ဆမြင့်တက်)နှင့် ဘင်္ဂလားဒေ့ရှ် (၂၃၈ ဆ မြင့်တက်) တို့ပါဝင်သည့် အခြားဈေးကွက်များသို့ တင်ပို့မှုအားကောင်းခဲ့ကြောင်း သိရပါသည်။ လတ်တလောနှစ်များအတွင်း ဗီယက်နမ်၏အကြီးမာဆုံးဆန်တင်ပို့ရာဈေးကွက်ဖြစ်သည့် ဖိလစ်ပိုင်သည် ၂၀၂၆ ခုနှစ် ဇန်နဝါရီလတွင် တင်သွင်းမှုပြန်လည်ဖွင့်လှစ်ရန် မျှော်မှန်းရကြောင်း သိရပါသည်။ ဗီယက်နမ်သည် ဆန်ကုန်သွယ်ရေးသဘောတူညီချက်များ ထပ်တိုးရရှိထားခြင်းကြောင့် ထွန်းသစ်စဈေးကွက်များသို့ ထိုးဖောက်ရန် အခွင့်အလမ်းများကို ဖန်တီးပေးကြောင်း သိရပါသည်။ ဩစတေးလျ၊ နိုင်ဂျီရီးယား၊ စင်ကာပူ၊ မလေးရှား၊ ဖိလစ်ပိုင်၊ အီဂျစ်၊ အယ်ဂျီးရီးယား၊ တရုတ်နှင့် အခြားဈေးကွက်များရှိ ဗီယက်နမ်ကုန်သွယ်ရေးရုံးများထံမှ စီးပွားရေးအတိုင်ပင်ခံပုဂ္ဂိုလ်များက သက်ဆိုင်ရာနိုင်ငံများရှိ ဆန်တင်သွင်းမှုမူဝါဒများအပေါ် နောက်ဆုံးသတင်းအချက်အလက်များအား ပံ့ပိုးပေးခဲ့ကြောင်း သိရပါသည်။ ၎င်းတို့သည် ဗီယက်နမ်တင်ပို့သူများအား အရည်အသွေး စံနှုန်းများ၊ ကွာရန်တင်းလုပ်ငန်းစဉ်များ၊ ထုတ်ပိုးမှုနှင့် အမှတ်တံဆိပ်ဖော်ပြခြင်းတို့တွင် အနီးကပ်အာရုံစိုက်ရန် တိုက်တွန်းခဲ့ကြောင်း သိရပါသည်။
Vietnam Plus
DOCA (ရန်ကုန်)