မန္တလေးတိုင်းဒေသကြီး၊ ကျောက်ဆည်ခရိုင်အတွင်းရှိ တောင်သူများသည် သီးနှံမျိုးစုံစိုက်ပျိုး လျက်ရှိရာ ကုန်စိမ်းသီးနှံတစ်မျိုးဖြစ်သော ဈေးကောင်းရသည့်ချဉ်ပေါင်ပင်များကို အများဆုံးစိုက်ပျိုး လာသည်ကို တွေ့ရှိရပါသည်။ တောင်သူများအနေဖြင့် ချဉ်ပေါင်စိုက်ပျိုးရာတွင် ကုန်ကျစရိတ် သက်သာပြီး အချိန်တိုအတွင်း ဝင်ငွေအလွယ်တကူရရှိလာသောကြောင့် ချဉ်ပေါင်ပင်များကို အလေးထား စိုက်ပျိုးလာကြပါသည်။ ချဉ်ပေါင် (၁)ဧက စိုက်ပျိုးလျှင် ချဉ်ပေါင်မျိုးစေ့(၈)ပြည်ခန့် ကုန်ကျကြောင်း၊ မျိုးစေ့ဈေးနှုန်းအနေဖြင့် (၁)ပြည်လျှင် (၇၀၀၀/-) ကျပ် ဝယ်ယူရကြောင်း၊ (၁)ဧက ကုန်ကျစရိတ် အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း ကုန်ကျစရိတ် (၂၅၀၀၀၀-၃၀၀၀၀၀) ကျပ်ခန့် ကုန်ကျကြောင်း၊ (၁)လ (၁)လခွဲသား အရွယ်တွင် စတင်ရိတ်သိမ်းခူးဆွတ်ရောင်းချရကြောင်း၊ ချဉ်ပေါင်ရွက်ဈေးနှုန်းအနေဖြင့် ချဉ်ပေါင်ပင်(၅)ပင် (၁)စည်းလျှင် ဖောက်သည်ဈေး (၂၀၀/-)ကျပ်ဖြင့် ပေးသွင်းရပြီး လက်လီဈေးအနေဖြင့် (၃၀၀/-)ကျပ် ဈေးနှုန်းဖြင့် ရောင်းချရကြောင်း၊ (၁)ဧက အထွက်နှုန်း အနေဖြင့် ချဉ်ပေါင်အစည်းပေါင်း (၅၀၀၀၀) စည်းထွက်ရှိကြောင်း၊ ချဉ်ပေါင် (၁)ဧက အကျိုးအမြတ် အနေဖြင့် (၁၀၀၀၀၀၀/-)ကျပ်ခန့် အမြတ်ရရှိကြောင်း၊ အမြတ်များပြီး နေ့စဉ်ဝင်ငွေရရှိနေသော ချဉ်ပေါင်ပင်ကို ပိုမိုစိုက်ပျိုးသင့်ကြောင်း ရေးသားတင်ပြအပ်ပါသည်။
DOCA(မန္တလေး)