ကျွန်းလှမြို့နယ်အတွင်း သဖန်းဆိပ်ဆည်အတွင်းမှ ထွက်ရှိသည့် ဒေသထွက်ရေချို ငါးများကို ဝယ်ယူရောင်းချကြောင်း နှင့် ဒေသထွက် ရေချိုငါးများကို ငါးချဉ်များ ပြုလုပ်၍ ရောင်းချ လျက်ရှိကြောင်းသိရသည်။ ငါးကြီးသားချဉ်ပြုလုပ်သည့် ငါးများကို သဖန်းဆိပ်ဆည်အတွင်းမှ ရရှိသည့် ငါးကြင်း၊ ငါးတိုတို့ဖြင့် လည်းကောင်း ငါးသေးချဉ်ပြုလုပ်သည့် ငါးမှာ ငါးဗျက် နှင့် ငါးရှည်(ခေါ်)ခိုင်သင်းကြည်ငါးများဖြင့် သာပြုလုပ်ရောင်းချကြောင်းသိရသည်။
ငါးကြီးချဉ် နှင့် ငါးသေးချဉ်တို့ကို ပြုလုပ်ရာတွင် ငါးများကို ရေအထပ်ထပ်နှင့် သန့်စင်အောင် ဆေးကြောကာ ရေစစ်အောင်စစ်ထားပြီး ထမင်း(သို့မဟုတ်)ထမင်းနဲ၊ ဆားတို့ဖြင့် သေချာစွာနယ်ပြီး ဖက်များဖြင့်ထုတ်ကာ ကြိုများဖြင့် (၅)ထုတ်တစ်တွဲတွဲ၍ ရောင်းချလျက်ရှိပါသည်။ ၂၀၂၅ခုနှစ်၊ ဒီဇင်ဘာလ ပထမပတ်အတွင်း ရောင်းချလျက်ရှိသော ငါးကြီးချဉ် (၁)ပိဿာလျှင် (၃၈၀၀၀)ကျပ်၊ (၅၀) ကျပ်သားလျှင် (၂၀၀၀၀)ကျပ်၊ (၁၀)ကျပ်သားလျှင်(၄၀၀၀)ကျပ်ဈေးနှုန်း တို့ဖြင့်လည်း ကောင်း ငါးသေးချဉ်(၁)ပိဿာလျှင်(၃၅၀၀၀)ကျပ်၊ (၅၀)ကျပ်သားလျှင်(၁၇၀၀၀)ကျပ်၊ (၁၀) ကျပ်သား လျှင်(၃၅၀၀)ကျပ်ဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း သိရသည်။
DOCA(စစ်ကိုင်း)