ဧရာဝတီတိုင်းဒေသကြီး၊ ဘိုကလေးမြို့နယ်အတွင်းရှိ ဆားချက်လုပ်ငန်းရှင်များသည် နွေရာသီနှင့် ဆောင်းဦးကာလများအတွင်း ရာသီဥတု ၊ သဘာဝပတ်ဝန်းကျင် အခြေအနေ ကောင်းမွန်မှုကို အခွင့်ကောင်း ယူကာ ဆားထုတ်လုပ်မှုကို သိသိသာသာ တိုးမြှင့်လုပ်ကိုင် လျက်ရှိပြီး ပြည်တွင်းဈေးကွက်တွင် အရည်အသွေးဖြင့် ယှဉ်ပြိုင်ဝင်ရောက်လာကြောင်း သိရသည်။ ဘိုကလေးကမ်းရိုးတန်းဒေသသည် မြန်မာနိုင်ငံ၏ အရည်အသွေးအမြင့်ဆုံးဆားများ ထုတ်လုပ်ရာဒေသအဖြစ် နာမည်ကြီးပြီး ယခုရာသီတွင် ဆားချက်သည့် လုပ်ငန်းရှင်ပေါင်း ၂၀၀ ကျော်က တစ်နေ့လျှင် ဆားတန်ချိန် ၁၀၀ ကျော် ထုတ်လုပ်နိုင်ခဲ့သည်။
ဆားဈေးကွက်တွင် ဆားအမျိုးအစားအလိုက် လက်ကားဈေးနှုန်းများမှာ အထူးအဆင့် ကြည်လင်ဆား - တစ်ပိဿာလျှင် ၈၀၀ ကျပ်မှ ၁,၀၀၀ ကျပ် ၊ ပုံမှန်အဆင့် ဆား - တစ်ပိဿာလျှင် ၆၀၀ ကျပ်မှ ၈၀၀ ကျပ် ၊ စက်ရုံသုံးဆား - တစ်ပိဿာလျှင် ၄၀၀ ကျပ်မှ ၆၀၀ ကျပ် တို့ဖြစ်ပြီး ဘိုကလေးဆားလုပ်ငန်းရှင် ဒေါ်နှင်းနှင်းဦးက "အရင်နှစ်တွေကထက် ဒီနှစ်မှာ ဆားအရည်အသွေးပိုကောင်းလာတယ်။ ရန်ကုန်၊ မန္တလေး၊ မော်လမြိုင်က ကုန်သည်တွေ တိုက်ရိုက်လာဝယ်ကြတယ်။ ပြည်ပကိုပါ တင်ပို့နိုင်ဖို့ ကြိုးစားနေကြတယ်" ဟု ပြောကြားသည်။
ဘိုကလေးဆားများသည် အိုင်အိုဒင်းဓာတ်ကြွယ်ဝမှု၊ အရောင်ကြည်လင်မှုနှင့် အနံ့အရသာ သန့်ရှင်းမှုတို့ကြောင့် ပြည်တွင်းဈေးကွက်တွင် ယှဉ်ပြိုင်အားကောင်းလာပြီး စားသုံးသူများ၏ ယုံကြည်မှုကို ရရှိထားလျက်ရှိကြောင်း သိရပါသည်။
DOCA(ဧရာဝတီ)