ရွှေပဲသီးသည်အရသာချိုပြီး ကုန်းဘောင်ကြီးကြော်ခြင်း၊ အစိမ်းကြော်ခြင်းစသည့် ဟင်းလျာ များထဲတွင် ထည့်သွင်းချက်ပြုတ်ကြသည်။ ရွှေပဲသီးသည်စားလို့လည်းကောင်းသလို အာဟာရလည်း ပြည့်ဝပါသည်။ ရွှေပဲသီးတွင် ဗီတာမင်အေ၊ ဗီတာမင်စီ၊ အမျှင်ဓာတ်၊ သံဓာတ်၊ ဗီတာမင်ကေနှင့် သတ္ထုဓာတ်များစွာပါဝင်ပါသည်။ အမျှင်ဓာတ်မြင့်မားစွာပါဝင်သောကြောင့် အစာခြေစနစ်ကို ကူညီ ပေးနိုင်ခြင်း၊ သွေးတွင်းသကြားဓာတ်ကိုထိန်းညှိပေးခြင်း၊ အစာခြေလွယ်ပြီးဝိတ်ထိန်းနိုင်ခြင်း၊ ကယ်လ်လိုရီနည်းပါးစွာပါဝင်သောကြောင့် ဝိတ်မတက်စေဘဲ နှလုံး၊ သွေးတိုး၊ ဆီးချိုစသည့် ကျန်းမာရေးဆိုးကျိုးများမဖြစ်အောင်လည်းကာကွယ်ပေးနိုင်ပါသည်။ ရွှေပဲသီးတွင် အဆီပါဝင်ခြင်း မရှိဘဲဖောလိတ်ဓာတ်ပါဝင်ခြင်းကြောင့် နှလုံးနှင့်ပတ်သတ်သောရောဂါများ မဖြစ်အောင်ကာကွယ် ပေးနိုင်ခြင်း၊ ဗီတာမင်စီပါဝင်သောကြောင့် အအေးမိတုတ်ကွေးအပြင် ကူးစက်ရောဂါများမှလည်း ကာကွယ်ပေးနိုင်ခြင်း၊ ကင်ဆာရောဂါဖြစ်ပွားမှုကိုလျော့ကျစေခြင်း၊ အရိုးများကိုကျန်းမာစေခြင်း၊ ဗီတာမင်ကေနှင့် သံဓာတ်ပါဝင်သောကြောင့် သွေးအားနည်းခြင်းရောဂါများမှ ကာကွယ်ပေးနိုင် ကြောင်းဆေးပညာ စာပေများမှ လေ့လာသိရှိရပြီး မြင်းခြံမြို့အေးမြသီတာဈေးတွင် ရွှေပဲသီးဈေးနှုန်း မှာ(၂၅)ကျပ်လျှင်(၂၀၀၀) ကျပ်နှင့် တစ်ပိဿာလျှင် (၇၅၀၀)ကျပ်ဈေးဖြင့် အရောင်းအဝယ်ဖြစ်လျှက်ရှိကြောင်း သိရသည်။
DOCA(မန္တလေး)