ပဲခူးတိုင်းဒေသကြီး၊ တောင်ငူမြို့နယ်အတွင်းရှိ ဈေးများတွင် အထက်ရှမ်းပြည်နယ်ဘက်မှ သစ်သီးဝလံနှင့်ဟင်းသီးဟင်းရွက်များစွာ သယ်ယူရောင်းချလျက်ရှိရာ ယခုအခါပန်းဂေါ်ဖီထုပ်များ အရောင်းသွက်လျက်ရှိနေပါသည်။ ရှမ်းပြည်ဒေသထွက်ပန်းပွင့်မှာ တောင်ငူဒေသထွက် ပန်းပွင့်များ ထက်နူးညံ့ပြီး ပိုမို၍စားကောင်းပါသည်။
ပန်းပွင့်ကိုကြော်စားခြင်း၊ ရေနွေးဖျောပြီးသုတ်စားခြင်း၊ အချဉ်စိမ်ခြင်းနှင့် ထမင်းဆိုင်များ နှင့် စားသောက်ဆိုင်များတွင် အစိမ်းကြော်ကြော်ရာ၌ အသုံးပြုကြပြီး ဈေးနှုန်းမှာလည်း တောင်ငူ ဒေသထွက်ထက် ဈေးနှုန်းပိုမိုမြင့်မားပြီး အရောင်းသွက်လျက်ကြောင်း သိရပါသည်။ ရှမ်းပြည်ထွက် ပန်းပွင့် များမှာ အပွင့် အသေး၊ အလတ်၊ အကြီးဟူ၍ရှိပြီး အပွင့်အသေး ၁ ပွင့်လျှင် ၂၀၀၀ ကျပ်၊ အပွင့်အလတ် ၁ ပွင့်လျှင် ၃၅၀၀ ကျပ်၊ အပွင့်အကြီး ၁ ပွင့်လျှင် ၅၀၀၀ မှ ၆၀၀၀ ကျပ်ထိဈေးပေးရပြီး တောင်ငူဒေသထွက်ပန်းပွင့်များသည် နိုဝင်ဘာလနောက်ဆုံးအပါတ်လောက်တွင် ပေါ်နိုင်သည့်ဟု သိရပြီး ဒေသထွက်ပန်းပွင့်များပေါ်ပါက ရှမ်းပြည်ထွက်ပန်းပွင့်များမှာ ဈေးနှုန်းကျဆင်းလာ နိုင်ကြောင်း ရောင်းချသည့်ဈေးသည်များထံမှ သတင်းရရှိပါသည်။
DOCA(ပဲခူး)