ကျောက်ဆည်ခရိုင်အတွင်းတွင်သီးနှံမျိုးစုံစိုက်ပျိုးလျှက်ရှိရာကင်းပုံသီးအပင်သည်နေရာအနှံအပြားမှာသဘာဝအလျောက်သော်လည်းကောင်း၊စိုက်ပျိုးခြင်းသော်လည်းကောင်း ပေါက် ရောက်ကြပါသည်။ ကင်းပုံပင်သည်များသောအားဖြင့်အလေ့ကျပေါက်လေ့ရှိပြီး အိမ်ခြံစည်းရိုး နှင့်တောတောင်များ၏ ခြုံနွယ်ဘုတ်များတွင် နွယ်တက်ပြီး ပေါက်ရောက်လေ့ရှိပါသည်။ ကင်းပုံသီး အပင်သည် နွယ်ပင်တစ်မျိုးဖြစ်ပြီး အသီးသည် ရှည်မျှောမျှော ပုံစံ ဖြစ်ပါသည်။ ကင်းပုံသီးသည် အချို၊ အခါးဟူ၍နှစ်မျိုးရှိပါသည်။ ကင်းပုံသီးအခါးသည်ရှားပြီး ကင်းပုံသီးအချိုကိုများသောအားဖြင့် ဈေးသည်တိုင်းလိုလိုရောင်းချကြပါသည်။ကင်းပုံသီးအချိူနှင့်အခါးကိုအမျိုးမျိုးလုပ်စားနိုင်ပါကြောင်း၊ ကင်းပုံသီးကို ပုဇွန်ခြောက်နှင့်ရော၍ချက်စားသလို မျှစ်ဖြင့်လည်းကြော်စားရကြောင်း၊ နွားနို့နှင့်လည်းချက်စားရပါကြောင်း၊ကင်းပုံသီးအပင်၏အရွက်များကိုလည်းကြော်ချက်စားနိုင်သလို ဟင်းချိုရည်ချက်ရာတွင်ထည့်၍စားသုံးနိုင်ပါသည်။ ဈေးများအတွင်းတွင်ကင်းပုံသီး အချို၊အခါး (၂၅)ကျပ်သားလျှင်(၁၀၀၀)ကျပ်၊ (၅၀)ကျပ်သားလျှင်(၁၈၀၀)ကျပ်နှင့် (၁)ပိဿာလျှင် (၃၅၀၀)ကျပ် ပေါက်ဈေးရှိကြောင်း ကုန်စိမ်းရောင်းချသော ဈေးတစ်ဦးထံမှသိရှိရပါသည်။
DOCA (မန္တလေး)