“အသီးမှာ သရက်၊ အသားမှာဝက်၊ အရွက်မှာ လက်ဖက်၊ ဟူ၍ အဆိုရှိသကဲ့သို့ ငါးတွင်လည်း “မယားမှာ ဆံတောက်၊ ငါးမှာငါးသလောက်” ဟူ၍စာချိုးရှိကြပါသည်။ ပြည်ပပို့ကုန်အဖြစ် နာမည် ကြီးပြီး တန်ဖိုးမြင့်ငါးတစ်မျိုးလည်းဖြစ်ပါသည်။ အသားမှာနူးညံ့ပြီး အနံ့အရသာထူးခြား ကောင်းမွန်လှပါသည်။ ငါးသလောက်ကို အရသာရှိသော ငါးအဖြစ် လူသိများကြပါသည်။ အဆိုပါ ငါးသည် ရေချို ရေငန် နှစ်ရပ် လုံးတွင် နေထိုင်ကြပါသည်။ ငါးသလောက်အစစ်၏ ကိုယ်သည်ပြား၍ ဗျက်အနည်းငယ်ကျယ်သည်။ ကျောဆူးတောင်အထက်နားသည် အလယ်၌ခွက်၍ အမြီးခွသည် စောက်နက်၍ အဖျားနှစ်ခုသည် ဘေးသို့ကားထွက်နေပြီး အကြေးများသည် ခေါင်းမှအမြီး တိုင်အောင် ညီညီညာညာရှိပါသည်။ အရောင်မှာ ရွှေရောင်သန်းလျက်ရှိ၍ တစ်ခါတစ်ရံ ကန့်လန့် အမည်းစင်းများ ထင်နေတတ်ပါသည်။ အထူးသဖြင့် ငါးသလောက်ငယ်များတွင် ကျောပိုင်း၌ ကန့်လန့်အမည်းစင်းများ ပါလေ့ရှိပါသည်။ ငါး၏ခန္ဓာကိုယ် အရှည်မှာ ၁ပေအထိရှိကြပါသည်။ ငါးသလောက်ငါးကို အရိုးနူးအောင်ပေါင်းစားခြင်း၊ ငါးသလောက်ကင်၊ ငါးသလောက်ကြော်၊ ငါးသလောက်အစပ်ဟင်း၊ ငါးသလောက်သုပ် ဟင်းလျာအဖြစ် စားသုံးကြရုံမက ငါးပိဆားနယ် အဖြစ်လည်း စားသုံးကြပါသည်။ ယခုလ အောက်တိုဘာဒုတိယအပတ်တွင် ငါးသလောက် ငါးဈေး မှာ ငါးသလောက်ငါးတစ်ပိဿာလျှင် ကျပ် (၄၀၀၀၀ - ၃၅၀၀၀) ရှိပြီး ဈေးကောင်းရပြီး အရောင်း အဝယ်ဖြစ်ကြောင်း သိရှိရပါသည်။
DOCA(ပဲခူး)