ဧရာဝတီတိုင်းဒေသကြီး၊ မအူပင်မြို့နယ်၊ ချောင်းကလေး၊ အဂါး ကျေးရွာတွင် ဟင်းသီး ဟင်းရွက်သီးနှံမျိုးစုံ စိုက်ပျိုးလျက်ရှိပြီး၊ ကျေးရွာနေတောင်သူများထဲမှ ဦးခင်ဝင်းသည် အာတာလွတ်(ခေါ်)သင်ဥကို တစ်ပိုင်တစ်နိုင်စိုက်ပျိုးလျက်ရှိကြောင်း သိရသည်။
အာတာလွတ်(ခေါ်)သင်ဥကို ယခင်နှစ်က ဧက ၆၀ ကျော် စိုက်ပျိုးထားရှိကြောင်း သိရသည်။ စတင်စိုက်ပျိုးချိန်မှာ ဧပြီလတွင်စတင်စိုက်ပျိုးခဲ့ပြီး အခြားတောင်သူများက ဇွန်လတွင် စတင်စိုက်ပျိုးကြကြောင်း၊ စိုက်ပျိုးပြီး ၅ လကျော်အကြာ နိုဝင်ဘာလ တွင် စတင်တူးဖော်ရကြောင်း၊ မိမိမှာ စက်တင်ဘာလမှာ စတင်ထွက်ရှိနေပြီးဖြစ်ကြောင်း၊ စိုက်ပျိုးမှုအနေဖြင့် မြေပြုပြင်၍ ပင်ကြားတန်းကြား ၆ ပေ၊ ၈ ပေခြား စိုက်ပျိုးရပြီး တစ်ဧကလျှင် အပင်ရေ ၄ သောင်းခန့် စိုက်ပျိုးရကြောင်း၊ ကုန်ကျစရိတ်အနေဖြင့် မျိုး၊ သွင်းအားစု၊ မြေပြုပြင်ခ၊ လုပ်သားခအပါအဝင် တစ်ဧကလျှင် စုစုပေါင်း ငွေကျပ် ၈ သိန်းခန့် ကုန်ကျကြောင်း၊ တစ်ဧကလျှင် အာတာလွတ်(ခေါ်)သင်ဥ ပိဿာချိန် ၄၀၀-၅၀၀ ခန့် ထွက်ရှိပြီး တစ်ပိဿာလျှင် ယခင်နှစ်ဈေးမှာ ငွေကျပ် ၃,၅၀၀ ဖြင့် ရောင်းချရပြီး ယနေ့ ဈေးမှာ ၄၅၀၀ကျပ်ရရှိကြောင်း၊ ပေါ်ဦးပေါ်ဖျားဖြစ်၍ ဈေးကောင်းမွန်ကြောင်း၊ အကျိုးအမြတ်အနေဖြင့် အတွက် ငွေကျပ် ၆ သိန်း- ၇သိန်း ခန့်အမြတ်ရရှိကြောင်း၊ ဈေးကွက်အနေဖြင့် ဒေသတွင်းရောင်းချမှုအပြင် ပုသိမ်၊ အိမ်မဲနှင့် ရန်ကုန်မြို့တို့သို့ အဓိက တင်ပို့ရောင်းချကြောင်း သိရှိရသည်။
DOCA(ဧရာဝတီ)