ကျိုက်မရောမြို့နယ်၊ မြွေဟောက်ကျေးရွာ၌ မိုးသခွားသီးများကို တစ်နိုင်တစ်ပိုင်စိုက်ပျိုးကြသူများ ယခုအချိန်၌ စျေးကောင်းရရှိ၍ မိသားစုဝင်ငွေတိုးလျက်ရှိကြောင်း သိရသည်။
သခွားသီးကို ဝါခေါင်လကွယ်မှစ၍ မျိုးများချကာ ရက်ပေါင်း (၂၅) ရက်အကြာ၌ အညွှန့် လေးများထွက်လာရန် တိုင်ထောင်ပေးရပြီး အပွင့်စပွင့်ချိန်တွင် အသီးများကြီးထွားစေရန် အားဆေးဖြန်းပေးရကြောင်း၊ စိုက်ပြီး ရက် (၃၀) အကြာတွင် သခွားသီးအကင်းလေးများ စတင် သီးလာပြီး ရက်ပေါင်း (၄၅) ရက်အကြာတွင် သခွားသီးများ လှိုင်လှိုင်ထွက်ရှိလာကြပြီး စျေးကွက်တွင် ရောင်းချနိုင်ပြီးဖြစ်ကြောင်း မြွေဟောက်ကျေးရွာမှ သခွားသီးတစ်နိုင်တစ်ပိုင် စိုက်ပျိုးသူ ဦးအုန်းရွှေကပြောသည်။
သခွားသီးများ စတင်ထွက်ရှိချိန်၌ တစ်ကြိမ်ခူးလျှင် ပိဿာချိန် (၆၀)ခန့်ထိ ခူးနိုင်ပြီး တစ်ပိဿာလျှင် ၁၅၀၀ ကျပ်ခန့် ဖောက်သည်ပေးရပြီး တစ်ပတ်လျှင် သခွားသီးရောင်းချရငွေ နှစ်သိန်းကျော်ထိ ဝင်ငွေရရှိသဖြင့် မိသားစု စားဝတ်နေရေး အဆင်ပြေလျက်ရှိကြောင်း သိရသည်။ သခွားသီးမှာ လူတိုင်းကြိုက်နှစ်သက်သည့် တို့စရာအသီးအနှံဖြစ်ကာ မြန်မာတို့၏ ထမင်းဝိုင်းတွင် မပါမဖြစ်တို့စရာအပြင် သခွားသီးသုတ်အဖြစ်လည်း စား၍ရကြောင်း သိရသည်။
DOCA (မွန်)