တောင်သာမြို့သည် မြင်းခြံမြို့နှင့် (၁၄) မိုင်အကွာတွင်တည်ရှိပြီး ပဲမျိုးစုံ၊ ပြောင်း၊ ဆီထွက်သီးနှံ၊ ကြက်သွန်နီနှင့်ထန်းလုပ်ငန်းများ လုပ်ကိုင်လျက်ရှိကြောင်း၊ အပူပိုင်းဒေသဖြစ် သော ကြောင့် မိုးသီးနှံများကို အားထားစိုက်ပျိုးရကြောင်း၊ မိုးရာသီကာလ၌ မိုးပဲနောက်သီးနှံ စိုက်ပျိုးထားကြောင်း၊ မိုးပဲနောက်ကို ဇွန်လနှင့် ဇူလိုင်လတို့တွင် စိုက်ပျိုးထားရှိပြီး၊ ဩဂုတ်လနှင့် စက်တင်ဘာလတို့တွင် ရိတ်သိမ်းထွက်ပေါ်ကြောင်း သိရှိရသည်။ ၂၀၂၅-၂၀၂၆ ခုနှစ်တွင် မိုးပဲနောက် စိုက်ပျိုးထားရှိမှုအနေဖြင့် (၁၂၄၇၀) ဧကစိုက်ပျိုးထားရှိကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်းများအရ သိရှိရသည်။ အောက်တိုဘာလ ပထမပတ်တွင် ရိတ်သိမ်းထွက်ပေါ်မည် ဖြစ်ကြောင်း၊ ယခုနှစ်တွင်လည်း အသီးရင့်မှည့်ခါနီး၊ ရိတ်သိမ်းချိန်တွင် မိုးလေဝသကောင်းမွန်ပါက အထွက်နှုန်း ကောင်းနိုင်ကြောင်း၊ ယခင်နှစ်အထွက်နှုန်းအနေဖြင့် တစ်ဧကလျှင် (၇-၈) တင်းခန့် ထွက်ရှိခဲ့ကြောင်း၊ ပဲနောက်မှာ ပဲတီစိမ်းနှင့်ဆင်တူကြောင်း၊ အလုံးအရွယ်မှာ ပဲတီစိမ်းထက် အနည်းငယ် ငယ်ကြောင်း၊ ၂၀၂၅ ခုနှစ်၊ စက်တင်ဘာလပထမပတ်၌ ပဲနောက်တစ်တင်းလျှင် (၉၀၀၀၀) ကျပ်ပေါက်ဈေးများ ရှိကြောင်း၊ တင်ပို့မှုအနေဖြင့် ရန်ကုန်ဘုရင့်နောင်သို့တင်ပို့ကြောင်း သိရှိရသည်။
DOCA(မန္တလေး)