ကျောက်ဆည်ခရိုင်အတွင်းရှိ တောင်သူဦးကြီးများသည် မိသားစု စားဝတ်နေရေးအတွက် ရာသီအလိုက်သီးနှံမျိုးစုံ စိုက်ပျိုးကြပါသည်။ စပါး၊ ပဲ၊ ပြောင်း၊ ကြက်သွန်၊ငရုတ်သီးနှံအပြင် ဆီထွက် သီးနှံများဖြစ်သော မြေပဲ၊ နှမ်း၊ နေကြာများကိုလည်း စိုက်ပျိုးကြပါသည်။ ၎င်းသီးနှံများအပြင် စီးပွားဖြစ်ဝင်ငွေတိုးသော ကန်စွန်းပင် ဟင်းသီးဟင်းရွက်ပင်များကိုလည်း စိုက်ပျိုးလာကြပါကြောင်း၊ ကန်းစွန်းရွက် စိုက်ပျိုးရာတွင် ဘောင်များပြုလုပ်၍ တိုက်ရိုက်အစေ့ချစနစ်ဖြင့်စိုက်ပျိုးကြောင်း ၊ ကန်စွန်း စိုက်ပျိုးရန် တစ်ဧကမျိုးစေ့(၈-၁၀)ထုပ်စိုက်ပျိုးရပြီး မျိုးစေ့တစ်ထုပ်လျှင်(၂၆၅၀၀/-) ကျပ်ပေးဝယ်ရကြောင်း၊ မျိုးစေ့ချအနည်းအများနှင့်စိုက်ဧကပေါ်မူတည်၍ မျိုးစေ့ထုပ် အနည်းအများ ကွာခြားကြောင်း၊ ကန်စွန်းတစ်ဧကကုန်ကျစရိတ်အနေဖြင့်(၅၀၀၀၀၀-၅၅၀၀၀၀/-) ကျပ်ခန့်ကုန်ကျ ကြောင်းသိရှိရပါသည် ။ ကန်စွန်းစိုက်ပျိုးပြီး (၃)ပတ်မှ (၄)ပတ်သားအချိန်တွင် ကန်စွန်းရွက်များ စတင်ခူးဆွတ်ရောင်းချရကြောင်း ၊ ကန်စွန်းရွက် တစ်ဧကလျှင် အစည်းပေါင်း (၂၀၀၀၀-၂၅၀၀၀) ခန့်အထိ ထွက်ရှိပြီး၊ ကန်စွန်းရွက် လက်ကား (၁)စည်းလျှင် (၇၀/-) ကျပ်၊ လက်လီ(၁)စည်းလျှင် (၁၀၀/-)ကျပ်ဖြင့် ပြန်လည်ရောင်းချကြောင်း ၊ ကန်စွန်းရွက်တစ်ဧက အကျိုးအမြတ်အနေဖြင့် ကုန်ကျစရိတ်နှုတ်ပြီးပါက (၇၀၀၀၀၀-၈၀၀၀၀၀) ကျပ်ဝန်းကျင်ခန့်မြတ်ကြောင်း ၊ ကုန်သည် ၊ ပွဲစားများအနေဖြင့် ကန်စွန်း စိုက်ခင်းအထိ လာရောက်ဝယ်ယူကြပြီး အမြို့မြို့အနယ်နယ်ရှိ ဈေးများသို့ ပြန်လည်ရောင်းချကြောင်း သိရှိရပါသည် ။ ကန်စွန်းရွက်သည် အာဟာရဓာတ်ကြွယ်ဝတဲ့ ဟင်းရွက်ဖြစ်ပါကြောင်း ၊ ကန်စွန်းရွက်တွင် ဗီတာမင်အေ၊ ဗီတာမင် B1၊ ဗီတာမင်စီ၊ ဗီတာမင်ကေ၊ ပရိုတင်းဓာတ်၊ ကယ်လ်စီယမ်၊ ဖော့စ်ဖရပ်စ် ၊ သံဓာတ် ၊ ကယ်ရိုတင်းဓါတ် ၊ ဆိုဒီယမ်စတဲ့ အာဟာရဓာတ်တွေ များစွာပါဝင်သောကြောင့် ကျန်းမာရေးအတွက် အကျိူးများစေသည့် အရွက်တစ်မျိုးဖြစ်ပါကြောင်း ၊ ကန်စွန်းရွက်တွင် ပါဝင်သည့် ဗီတာမင်အေသည် မျက်လုံး ကျန်းမာရေးအတွက် အထောက်အကူပေးပြီး အချိန်ကြာမြင့်စွာ မျက်လုံးအသုံးပြုနေရသူများ ကွန်ပျူတာနှင့်အလုပ်လုပ်နေရသူများအနေဖြင့် အမြဲတမ်းစားသုံးပေးသင့်ပါကြောင်း ၊ ကန်စွန်းရွက် သည်မြန်မာလူမျိုးတို့၏ ထမင်းပွဲတွင် မပါမဖြစ် ဟင်းတစ်ခွက်ဖြစ်ကြောင်း စားသုံးသူများထံမှသိရှိရပြီး ကန်စွန်းရွက် စိုက်ပျိုးခြင်းအားဖြင့် စီးပွားလည်းဖြစ်ဝင်ငွေလည်းတိုးကြောင်း ကန်စွန်းပင်စိုက်ပျိုးသော တောင်သူဦးကြီးများထံမှ သိရှိရပါသည်။
DOCA(မန္တလေး)