အသီးပေါင်းများစွာ ရှိကြသည့်အနက် ငှက်ပျောသီးသည် ကမ္ဘာပေါ်တွင် လူကြိုက်အများ ဆုံးအသီးအနှံတစ်မျိုးဖြစ်ပါသည်။ ပုံစံအမျိုးမျိုးဖြင့် ပြုလုပ်စားသောက်၍ ရသော အသီးတစ်မျိုး ဖြစ်သည့် ငှက်ပျောသီးကို လူအတော်များများက နှစ်သက်ကြပါသည်။ ငှက်ပျောသီးတွင် အမျှင် ဓာတ်၊ ပိုတက်စီယမ်၊ ဗီတာမင်ဘီစစ်၊ ဗီတာမင်စီ၊ ဓာတ်တိုးဆန့်ကျင်သည့် ဓာတ်ပေါင်းများနှင့် အာဟာရဓာတ်များစွာပါဝင်ပါသည်။ငှက်ပျောသီးသည် ဗီတာမင်ဓာတ်ပေါင်းများစွာ ပါဝင်ပြီး ကျန်း မာရေးအတွက် အကျိုးကျေးဇူးများစွာရရှိသည်ဖြစ်၍ ကလေးရောလူကြီးပါနှစ်သက်ကြပါသည်။ ထိုသို့ အကျိုးကျေးဇူးများစွာ ရရှိသည့် ငှက်ပျောသီးကို ငှက်ပျောကိတ်၊ ငှက်ပျောကြော်၊ ငှက်ပျော ပေါင်း၊ ငှက်ပျောသီးအုန်းနို့စမ်းစသည့် ပုံစံအမျိုးမျိုး ပြုလုပ်ကာ ဈေးကွက်အတွင်းသို့ ဖြန့်ဖြူးရောင်း ချလျက်ရှိပါသည်။ ငှက်ပျောသီးကို စားသောက်သည်သာမက ငှက်ပျောဖူး၊ ငှက်ပျောအူများကိုလည်း အမျိုးမျိုးပြုလုပ်၍ ချက်ပြုတ်စားသောက်ကြပါသည်။ ကယားပြည်နယ်၊ လွိုင်ကော်မြို့တွင် ရခိုင်၊ ဖီးကြမ်း၊ ရွှေနီ၊ ရွှေဝါ၊ ချိုချဉ်ငှက်ပျောစသည့်ငှက်ပျောသီးအမျိုးမျိုးထွက်ရှိပါသည်။ ငှက်ပျော သီးအမျိုးမျိုးကို လောပိတမြို့ဘက်မှ အများဆုံးမှာယူရောင်းချလျက်ရှိပြီး ရခိုင်ငှက်ပျောသီးတစ်ဖီး လျှင်(၁၅၀၀မှ ၂၀၀၀)ကျပ်၊ဖီးကြမ်းတစ်ဖီးလျှင် (၁၅၀၀မှ ၂၅၀၀)ကျပ်၊ ရွှေနီတစ်ဖီးလျှင် (၃၀၀၀မှ ၅၀၀၀)ကျပ်၊ ရွှေဝါတစ်ဖီးလျှင် (၃၀၀၀မှ ၅၀၀၀)ကျပ်အထိ အသီးသီးအရောင်းအဝယ်ဖြစ်လျက်ရှိ ပါကြောင်း လွိုင်ကော်မြို့၊ သီရိမင်္ဂလာဈေးတွင် ငှက်ပျောသီးရောင်းချနေသူတစ်ဦးထံမှ သိရှိရပါသည်။
DOCA(ကယား)