မြင်းခြံမြို့၊ အေးမြသီတာဈေးရှိ သစ်သီးဆိုင်များတွင် ရောင်းချနေသော ပန်းသီးများကို ရှမ်းပြည်နယ်တောင်ပိုင်း၊ အောင်ပန်းမြို့နှင့် မန္တလေးမြို့တို့မှဝယ်ယူပြီး ဒေသတွင်းဖြန့်ဖြူးရောင်းချကြောင်း၊ ၂၀၂၅ ခုနှစ် ဩဂုတ်လနောက်ဆုံးပတ်တွင် ရောင်းချနေသော ပန်းသီးလက်လီတစ်လုံးလျှင် (၂၅၀၀-၃၀၀၀) ကျပ်၊ ပန်းသီး (လုံးသေး) ၁၀ လုံးလျှင်(၂၂၀၀၀) ကျပ်၊ ပန်းသီး (လုံးကြီး) ၁၀ လုံးလျှင် (၂၆၀၀၀) ကျပ် ပေါက်ဈေးများဖြင့်ရောင်းချလျက်ရှိကြောင်း၊ အမျှင်ဓာတ်ကြွယ်ဝပြီး အရွယ်တင်နုပျိုစေသောကြောင့် ပန်းသီးစားသုံးမှုများပြား၍ အရောင်းအဝယ်ကောင်းကြောင်း၊ နေ့စဉ်ပန်းသီး အလုံးရေ (၁၀၀-၁၅၀) လုံးခန့်ရောင်းချရကြောင်း၊ ဒေသတွင်းစားသုံးကြသလို သစ်သီးဖျော်ရည်ဆိုင်များမှလည်းဝယ်ယူ၍ ရောင်းချရကြောင်း သစ်သီးရောင်းချသူတစ်ဦး၏ ပြောပြချက်အရသိရှိရသည်။ ပန်းသီးစားသုံးခြင်းဖြင့် အစာခြေစနစ်ကိုကောင်းမွန်စေပြီး ကိုလက်စထရော (အဆီဓာတ်)ကို လျှော့ချပေး၍ နှလုံးကျန်းမာရေးကို ထောက်အကူပြုကြောင်း၊ ဦးနှောက်နှင့်ဉာဏ်ရည်ကို ကောင်းမွန်စေပြီး ဆီးချိုရောဂါကိုလျော့ချပေးကြောင်း၊ ကိုယ်ခံအားစနစ်ကိုကောင်းမွန်ကြောင်း၊ အရိုးအဆစ်ကို သန်မာစေသောကြောင့် ပန်းသီးများကို တစ်နေ့တစ်လုံး ပုံမှန်စားသုံးသင့်ကြောင်း လေ့လာသိရှိရသည်။
DOCA(မန္တလေး)