“ဈေးကောင်းရရှိနေသောဝါးနှီးဖျာ”

          မန္တလေးတိုင်း‌‌ဒေသကြီး၊ ကျောက်ဆည်ခရိုင် မြစ်သားမြို့နယ်၊ မှိုင်းဟင်ကျေးရွာ၊ ရန်အေးကျေးရွာနှင့် ကျောက်ဆောက်ကျေးရွာတွင် ယခင်ဘိုးဘွားများ လက်ထပ်ကတည်းက ဝါးနှီးဖျာများကို ယက်လုပ်၍ အသက်မွေးဝမ်းကြောင်းပြုကြ ကြောင်းသိရှိရပါသည်။ ဝါးအမျိုးအစား အမျိုးမျိုးရှိသော်လည်း ဝါးနှီးဖျာယက်လုပ်ရန်အတွက် မျှင်ဝါးကိုသာအသုံးပြုပါသည်။ ဝါးနှီးဖျာ ယက်လုပ်ရာတွင် နှီးအကြောဖျာ၊ နှီးအောက်ဖျာ၊ နှီးသားဖျာဟူ၍ (၃)မျိုးယက်လုပ်နိုင်ကြောင်း၊ ဝါးလုံး(၃)လုံးကို နှီးနွှာဖြင့်ယက်လုပ်ရာတွင် (၅)ပေ (၆)ပေ တစ်ချပ်ရရှိကြောင်း၊ နှီးကြောဖျာ ယက်လုပ်ရာတွင် ဝါး၏ အကြောလေးများဖြင့်သာ ယက်လုပ်သဖြင့် ဝါးအလုံးရေပိုမိုကုန်ကျကြောင်း၊ ထိုနှီးများမှ ပိုသောနှီးများကို နှီးအောက်ဖျာအဖြစ် ယက်လုပ်ကြောင်း၊ နှီးအောက်ဖျာမှာ အကွက်စိတ်စိတ်ယက်လုပ်ထားသဖြင့် နှမ်း/မြေပဲဆံများလှမ်းရာတွင် အသုံးပြု၍ရကြောင်း၊ မျှင်ဝါးတစ်လုံးလျှင် (၂၅၀၀/-)ကျပ် ခန့်ရှိပြီး၊ နှီးဖျာကအဖြစ် တစ်လုံးလျှင် (၁၀၀၀/-)ကျပ်ရှိကြောင်း၊ ဖျာများကို ကိုယ်တိုင်လည်းယက်လုပ်သလို လုပ်ခစားပေး၍လည်း ယက်လုပ်ကြကြောင်း၊ နှီးဖျာတစ်ချပ်လျှင် ယက်ခ၊ လုပ်သားခ (၇၀၀၀/-)ကျပ်၊ လူတစ်ဦး တစ်ရက်လျှင် ဖျာ(၃)ချပ်မှ (၄)ချပ်အထိ ပြီးစီးအောင် ယက်လုပ်နိုင်ကြ ကြောင်း၊ ဖျာဈေးနှုန်းအနေဖြင့် (၅)ပေ (၆)ပေ တစ်ချပ်လျှင် (၂၅၀၀၀/-)ကျပ်၊ (၄)ပေ (၅)ပေ တစ်ချပ်လျှင် (၂၀၀၀၀/-)ကျပ်၊ (၁၀)ပေ ပတ်လည် တစ်ချပ်လျှင် (၆၀၀၀၀/-)ကျပ်ဖြင့် ရောင်းဝယ်လျက်ရှိကြောင်း၊ ဖောက်သည်ဈေးအနေဖြင့် (၁၀)ချပ်မှ (၂၅)ချပ်အထက်ဝယ်ယူပါက တစ်ချပ်ကို (၃၀၀၀/-)ကျပ်ခွာ၍ ရောင်းချပေးကြောင်း၊ ဈေးကွက်အနေဖြင့်ဖျာများကို ဖောက်သည်ပေးရောင်းချသလို ကိုယ်တိုင်လည်း ဆိုင်ကယ်များပေါ်တင်၍ ရွာစဉ်လှည့်၍လည်း ရောင်းချလျက်ရှိကြောင်း၊ ဝါးနှီးဖျာယက်လုပ်သော ကျေးရွာများအနေဖြင့် တောင်သူလုပ်ငန်း လုပ်ကိုင်သူနည်းပါးပြီး ဝါးနှီးဖျာကို အဓိကထား၍ ယက်လုပ်ကြကြောင်း၊ အမျိုးသားများက ဝါးများဝယ်ယူပေးခြင်း၊ နှီးဖျာပေးခြင်းများကို ပြုလုပ်ပေးကြောင်း၊ အမျိုးသမီးများက အိမ်တွင်းမှုကိစ္စများပြုလုပ်ရင်း တစ်ပိုင်တစ်နိုင် မိသားစု အပိုဝင်ငွေများရရှိအောင် မိရိုးဖလာ နှီးဖျာများယက်လုပ်၍ ရောင်းချလျက်ရှိပြီး ကျန်းမာရေးနှင့် ညီညွှတ်၍ ဈေးနှုန်းသင့်တင့်သောကြောင့် ဝါးနှီးဖျာများကို ဝယ်ယူသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)