ကမ္ဘာပေါ်မှာ ထောပတ်သီးအမျိုးအစားများစွာရှိပြီး မက္ကဆီကိုတောင်ပိုင်းတွင် အဓိက ပေါက်ရောက်ပါသည်။ ပီရူးနိုင်ငံမှာလည်း ပြီးခဲ့သည့် နှစ်ပေါင်းရှစ်ထောင်လောက်ကတည်းက စိုက်ပျိုး ခဲ့ကြသည်ဟု မှတ်တမ်းများအရ သိရပါသည်။ ရှမ်းပြည်နယ်နှင့် မန္တလေးတိုင်းဒေသကြီး၊ ပြင်ဦးလွင် မြို့နယ်မှ ထွက်ရှိသော ထောပတ်သီးများကို မန္တလေးဈေးကွက်တွင် အများဆုံးတင်ပို့ ရောင်းချလျက်ရှိကြောင်းသိရှိပါသည်။ ထောပတ်သီးကို အင်္ဂလိပ်လို Avocado ဟုခေါ်ပါသည်။ ထောပတ်သီးရဲ့ ပုံသဏ္ဍာန်က သစ်တော်သီးပုံ၊ ဘဲဥပုံလို ရှည်ရှည်မျောမျောနဲ့ လုံးဝိုင်းသည့်ပုံစံရှိပြီး အသီးရဲ့အပေါ်ခွံက မိချောင်းကျောကုန်းလိုကြမ်းလို့ Alligator Pear ဟုလည်း နောက်အမည် တစ်မျိုးခေါ်ကြပါသေးသည်။
ထောပတ်သီး၏အတွင်းသားကို ဇွန်းနဲ့ခြစ်ယူပြီး ဒီအတိုင်းစားကြသလို သကြားနို့ဆီများ နှင့်ရောခလောက်၍လည်းစားကြပါသည်။ ထောပတ်သီးဖျော်ရည်အနေဖြင့်လည်း သောက်သုံး ကြပါသည်။ ထောပတ်သီးတွင် အခြားသစ်သီးများကဲ့သို့ အမျှင်ဓာတ်၊ ဗီတာမင်ဓာတ်နှင့် သတ္တု ဓာတ်များကြွယ်ဝစွာပါဝင်သည့်အပြင် အဆီဓာတ်လည်းကြွယ်ဝစွာပါဝင်သည်။ ထောပတ်သီးတွင် ပါဝင်သည့် အဆီဓာတ်မှာ ကျန်းမာရေးကိုမထိခိုက်စေဘဲကောင်းကျိုးပြုနိုင်သည့် မပြည့်ဝဆီ (Unsaturated Fat) အမျိုးအစားဖြစ်ပါသည်။ ထောပတ်သီးကို စားသုံးခြင်းဖြင့် အမျှင်ဓာတ်များ ပါဝင်သည့်အတွက် ဝမ်းမှန်စေပြီး အူမကြီးကင်ဆာဖြစ်ပွားနိုင်မှုကို လျှော့ချပေးနိုင်ပြီး ဦးနှောက် နှင့်မျက်စိကျန်းမာဖို့ရာအတွက်လည်း အထောက်အကူပြုပါသည်။ ထောပတ်သီးတွင် ပိုတက်ဆီယမ်ဓာတ် ကြွယ်ဝစွာပါဝင်သည့်အတွက် သွေးပေါင်ချိန်ကိုထိန်းညှိပေးပြီး နှလုံးရောဂါဖြစ်ပွားနိုင်ခြေကို လျော့ကျ စေနိုင်ပါသည်။
ထောပတ်သီးအမျိုးအစားများစွာရှိသည့်အနက်မှ ဈေးကွက်အတွင်း အများဆုံးရောင်းချ လျက်ရှိသည့် ထောပတ်သီးအမျိုးအစားမှာ Hass Avocado နှင့် အမရာ Avocado တို့ဖြစ်ကြပြီး လက်လီဈေးနှုန်းအနေဖြင့် Hass Avocado 1kg လျှင်(3500) ကျပ်၊ အမရာ Avocado 1kg လျှင်(8000) ကျပ်၊ လက်ကားဈေးနှုန်းအနေဖြင့် Hass Avocado 1kg လျှင် (3000) ကျပ်၊ အမရာ Avocado 1kg လျှင်(7500) ကျပ်တို့ဖြင့် ရောင်းဝယ်လျက်ရှိကြောင်း ထောပတ်သီးရောင်းချသူ တစ်ဦးထံမှ သိရပါသည်။
DOCA(မန္တလေး)