မန်ကျည်းချဥ်သည် မြန်မာနိုင်ငံအထက်ပိုင်း အညာဒေသတွင် သဘာဝအတိုင်း ပေါက်ရောက်သည့် မန်ကျည်းသီးမှထုတ်လုပ်သော စားသောက်ကုန်တစ်မျိုးဖြစ်ပါသည်။ အညာဒေသများဖြစ်သော စစ်ကိုင်း၊ မကွေးဘက်တို့တွင် သဘာဝ အတိုင်းရသော မန်ကျည်းသီးများကို ရေစင်စင်ဆေးကြော၍ အစေ့ထုတ်ကာ အခြောက်လှန်းပြီး ဆားနှင့်ရောစပ်ကာ ပြုလုပ်ထားပါသည်။ အချို့ကတော့ အရသာ ပိုမိုကောင်းမွန်အောင် ငါးပိရည်၊ ငရုတ်သီး၊ သကြားအနည်းငယ်ထည့်ပြီး ပြုလုပ်ကြပါသည်။
မန်ကျည်းချဉ်၏အရသာသည် အချဉ်ပြင်းပြီး မွှေးကြိုင်သောအရသာရှိကာ ဗီတာမင်စီ၊ ကယ်ဆီယမ်၊ သံဓာတ်နှင့် အမျှင်ဓာတ်များစွာကြွယ်ဝပါသည်။မန်ကျည်းချဉ်ကို သုတ်စား၍သော်လည်းကောင်း၊ အခြားဟင်းလျာများနှင့်တွဲဖက်၍သော်လည်းကောင်း စားသုံးနိုင်ပါသည်။ မန်ကျည်းချဉ်သည် အညာဒေသ၏ ရိုးရာအစားအစာတစ်ခုဖြစ်ပြီး အညာဒေသအပြင် အမြို့မြို့အနယ်နယ်သို့ တင်ပို့ရောင်းချသည်သာမက အွန်လိုင်းဈေးကွက်တွင်လည်း ရောင်းချလျက်ရှိပါသည်။ မန်ကျည်းချဉ် တစ်ဘူးကို ၃၅၀၀ ကျပ်မှ ၄၅၀၀ ကျပ်အထိ ရောင်းချလျက်ရှိကြောင်းလည်းသိရပါသည်။
DOCA(ပဲခူး)