ယခုဇူလိုင်လ မိုးများဖြိုင်ဖြိုင်ရွာသွန်းချိန်တွင် ပူပူနွေးနွေးနဲ့စားလို့ကောင်းလှသော နွားနို့ ထမင်းကို ဈေးများတွင်လည်းကောင်း၊ ရပ်ကွက်များထဲသို့လည်းကောင်း လှည့်လည်ရောင်းချလျက် ရှိပါသည်။ နွားနို့ထမင်းသည် အာဟာရပြည့်ဝပြီး အရသာရှိလှသော အစားအစာတစ်မျိုးဖြစ်ပါသည်။ မြန်မာလူမျိုးများအတွက် နွားနို့ ထမင်းသည် အချိုပွဲအနေဖြင့်စားသုံးကြသော အစားအသောက်ဖြစ်၍ အိန္ဒိယလူမျိုးများအတွက်လည်း အထူး ကြိုက်နှစ်သက်ပြီး အမြဲလိုလိုစားသုံးလေ့ရှိသော ရိုးရာအစား အသောက်တစ်ခုဖြစ်ပါသည်။
နို့ထမင်းကို နွားနို့၊ နို့မှုန့်၊ အုန်းနို့ ကြိုက်နှစ်သက်ရာအသုံးပြုပြီး ချက်ပြုတ်နိုင်ပါသည်။ ဆန်၊ နွားနို့၊ ဆားနှင့်ရေတို့သာလိုအပ်ပြီး လွယ်ကူစွာချက်ပြုတ်နိုင်သောကြောင့် အချိန်ကုန်သက်သာစေနိုင် ပါသည်။ နွားနို့ တွင် ပရိုတင်းဓာတ်၊ ကယ်ဆီယမ်ဓာတ်၊ ဗီတာမင်ဓာတ်များ ကြွယ်ဝစွာပါဝင်သော ကြောင့် နွားနို့နှင့်ထမင်း ရောစပ်ပြီး ချက်ပြုတ်လိုက်သောအခါတွင် ခန္ဓာကိုယ်အတွက် ခွန်အားတိုးစေပြီး နွေးထွေးစေပါသည်။ နွားနို့ထမင်းသည် အိမ်တွင်လည်း လွယ်ကူစွာချက် ပြုတ်စား သောက်နိုင်သည့်အပြင် စီးပွားရေးအရရောင်းချရန် လွယ်ကူသောအစားအစာလည်းဖြစ်ပါသည်။ တောင်ငူမြို့နယ်တွင်းရှိ ဈေးများတွင် နို့ထမင်းတစ်ပွဲလျှင် ၁၅၀၀ ကျပ်ဖြင့် ရောင်းချလျက်ရှိကြောင်း သိရပါသည်။
DOCA(ပဲခူး)