မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်အတွင်းရှိ ကျေးရွာများတွင် လယ်ယာ စိုက်ပျိုးရေးလုပ်ငန်းများကို အဓိကအားထားပြီး သီးနှံမျိုးစုံ စိုက်ပျိုးလျက်ရှိပါသည်။ ရေစကြိုမြို့နယ် တွင် ဆီထွက်သီးနှံဖြစ်သည့် ရေသွင်းနှမ်းဖြူသီးနှံကို မတ်၊ ဧပြီလများတွင် စတင်စိုက်ပျိုးကြပြီး ဇွန် လကုန်ပိုင်းတွင် ဈေးကွက်အတွင်းသို့ စတင်ဝင်ရောက်လျက်ရှိပါသည်။ နှမ်းသီးနှံကို ကျဲပတ်စနစ်ဖြင့် စိုက်ပျိုးကြပြီး (၁) ဧက စိုက်ပျိုးလျှင် နှမ်းမျိုး (၄) ပြည်ခန့် ကုန်ကျကြောင်း၊ (၁) ဧက ကုန်ကျစရိတ် အနေဖြင့် မျိုး၊ မြေပြင်ခ၊ သွင်းအားစု၊လုပ်အားခ အပါအဝင် ကျပ်(၈) သိန်းခန့် ကုန်ကျကြောင်း၊ အထွက်နှုန်းအနေဖြင့် (၁၅ မှ ၂၀) တင်းခန့်ထွက်ရှိကြောင်း၊ ဈေးကွက်အနေဖြင့် ရေစကြိုမြို့ပေါ်ရှိ ပွဲရုံများသို့ တင်ပို့ရောင်းချကြပြီး ပခုက္ကူမြို့နှင့် မန္တလေးမြို့သို့ တစ်ဆင့် တင်ပို့ရောင်းချကြကြောင်း သိရှိရပါသည်။ ဈေးနှုန်းအနေဖြင့် ဂျပန်နှမ်းဖြူ (၁)တင်းလျှင် ကျပ်(၁၀၅၀၀၀)ခန့် ရရှိပြီး ဒေသမျိုး (၁) တင်းလျှင် ကျပ်(၉၅၀၀၀)ခန့် ရရှိကြောင်း သိရှိရပါသည်။ (၁) ဧက အကျိုးအမြတ်အနေဖြင့် ကျပ်(၉၅၀၀၀၀)ခန့်ရရှိကြောင်း၊ မိမိအနေဖြင့် ယခင်နှစ်က ရေသွင်းနှမ်းဖြူ (၂) ဧကခန့် စိုက်ပျိုး ခဲ့ရာ ရာသီဥတုကောင်းမွန်ခြင်းမရှိ၊ နှမ်းစိုက်ပျိုးချိန်တွင် မိုးရွာသွင်းမှုနည်းခြင်းတို့ကြောင့် ရေသွင်း ခဲ့ရသည့် အကြိမ် ရေများသည့်အတွက် ကုန်ကျမှုစရိတ်များခဲ့သဖြင့် (၁) ဧကလျှင် ကုန်ကျစရိတ် ကျပ်(၁၂၀၀၀၀၀)ခန့်ကုန်ကျခဲ့ပြီး အကျိုးအမြတ်အနေဖြင့် ကျပ်(၃၀၀၀၀၀)ခန့် သာရရှိခဲ့ပါသည်။ ယခုနှစ်တွင် မိမိအနေဖြင့် (၃)ဧက စိုက်ပျိုးထားပြီး၊ ရာသီဥတုကောင်းမွန်ခြင်း စိုက်ပျိုးချိန်တွင် မုန်တိုင်းမိုးရရှိသဖြင့် အကျိုးအမြတ်ပိုမိုရရှိခဲ့ကြောင်း နှမ်းစိုက်တောင်သူတစ်ဦး၏ ပြောပြချက်အရ သိရှိရပါသည်။
DOCA(မကွေး)