ဧရာဝတီတိုင်းဒေသကြီး၊ မအူပင်မြို့နယ်၌ ရာသီအလိုက် ပဲသီးနှံအမျိုးမျိုးနှင့်ဟင်းသီးဟင်းရွက် ပဲတောင့်ရှည်ပင်များ စိုက်ပျိုးဖြစ်ထွန်းလျက်ရှိရာ ယခုလအတွင်း မိုးရာသီ ဟင်းသီးဟင်းရွက် စိုက်ခင်းများမှ ပဲတောင့်ရှည် များလှိုင်လှိုင် ထွက်လျက်ရှိသည်။
၂၀၂၅ခုနှစ် ဇွန်လမိုးဦးကာလအတွင်း ဟင်းသီးဟင်းရွက် ၃၃၈ ဧက စိုက်ပျိုးပြီးကြောင်း မြို့နယ်မြေစာရင်းဦးစီးဌာနမှသိရပြီး ပဲတောင့်ရှည်သည် အနယ်နယ်အရပ်ရပ် ဟင်းသီးဟင်းရွက်စျေးကွက်များ၌ နှစ်စဉ်ရောင်းအားကောင်းခဲ့၍ ယခုနှစ် မအူပင်မြို့နယ်၌ ပဲတောင့်ရှည်စိုက်ပျိုးသူများပြားလာကြောင်းသိရှိရသည်။
ထိုပဲတောင့်ရှည်ပင်ကို မိုးဦးကျမှစ၍ စတင်စိုက်ပျိုးလေ့ရှိကြပြီး ရက်၃၀ ခန့်ကြာလျှင် စတင်ဆွတ်ခူးရောင်းချနိုင်ကြောင်း၊ တန်းခြားသုံးပေခန့်၊ပင်ခြားတစ်ပေခန့် ခွာကာဝါးတိုင်များ ထောင်၍စိုက်ပျိုးရ၍ တိုင်ထောင်ပဲဟုလည်းခေါ်ဆိုကြကြောင်း၊ တစ်ဧကလျှင်စုစုပေါင်း စိုက်ပျိုးမှုကုန်စရိတ် ငွေကျပ် သုံးသိန်းကျော်ရှိကြောင်း၊ ပဲသီး ၁၀တောင့်စီး ၁စီးလျှင် ၅၀၀-၇၀၀ကျပ်ရောင်းချနေကြောင်း၊ ၁ဧက ကုန်ကျစရိတ် ၃သိန်းကျပ်ရှိပြီး ၁ဧက အကျိုးအမြတ်အနေဖြင့် ၃သိန်းကျပ် ကျန်ရှိကြောင်း မိုးဦးကာလတွင် ဒေသခံကုန်စိမ်းဒိုင်များက စျေးကောင်းပေး ဝယ်ယူနေကြ၍ စိုက်ပျိုးထုတ်လုပ်သူများ အကျိုးအမြတ်ရရှိလျက်ရှိကြောင်း ကျေးလက်တောင်သူများထံမှ သိရှိရပါသည်။
DOCA(ဧရာဝတီ)