ကမ္ဘောဒီးယားမှ တရုတ်နိုင်ငံသို့ ငှက်ပျောသီးတင်ပို့မှု မြှင့်တင်မည်

     တရုတ်ကုမ္ပဏီတစ်ခုဖြစ်သော Cambodian Banana Agricultural (CBA) အထွေထွေ ကုမ္ပဏီလီမိတက်သည် စိုက်ပျိုးမြေဧရိယာနှင့် ထောက်ပံ့ရေးကွင်းဆက်တို့ကို ချဲ့ထွင်ခြင်းဖြင့် ယခု နှစ်အတွင်း လတ်ဆတ်သော သီးမွှေးငှက်ပျောသီးအဝါ တန် ၃၀,ဝဝဝ ကို တရုတ်နိုင်ငံသို့ တင်ပို့ရန် စီစဉ်ထားသည်။

    ဇွန်လ ၆ ရက်နေ့တွင် အဆိုပါကုမ္ပဏီက ကျင်းပခဲ့သည့် လတ်ဆတ်သောငှက်ပျောသီး ထုတ်လုပ်ထောက်ပံ့မှု ကွင်းဆက်ဆိုင်ရာ အခမ်းအနားသို့ တက်ရောက်ခဲ့ပြီးနောက် ကမ္ဘောဒီးယား စိုက်ပျိုးရေး၊ သစ်တောနှင့် ငါးလုပ်ငန်းဝန်ကြီးဌာနမှ အတွင်းဝန် Kong Chanvisal က ၎င်းကုမ္ပဏီ ၏ ရှေ့လုပ်ငန်းစဉ်များကို ပြောကြားခဲ့သည်။ CBA ကုမ္ပဏီသည် စိုက်ခင်းဧရိယာ ဟက်တာ ၅၀၀ မှ ငှက်ပျောသီးခိုင်များကို ခုတ်ယူထုတ်လုပ်လျက်ရှိကြောင်း၊ နောက်ထပ် မြေဧရိယာ ဟက်တာ ၂၀၀ တွင်လည်း တိုးချဲ့စိုက်ပျိုးလျက်ရှိပြီး ၂၀၂၆ ခုနှစ်တွင် ငှက်ပျောသီးများ ထွက်ရှိနိုင်မည်ဟု မျှော်မှန်းထားကြောင်း၊ လက်ရှိအချိန်တွင် ကုမ္ပဏီသည် ပြည်တွင်းရှိ စူပါမားကတ်များသို့ လတ် ဆတ်သောငှက်ပျောသီးများ ပေးသွင်းလျက်ရှိပြီး တရုတ်နိုင်ငံသို့လည်း တင်ပို့လျက်ရှိကြောင်း၊ ကုမ္ပဏီအနေဖြင့် ၂၀၂၄ ခုနှစ်၌ ငှက်ပျောသီးတန်ချိန် ၂၀,၀၀၀ တင်ပို့ခဲ့ပြီး ၂၀၂၅ ခုနှစ်တွင် တန်ချိန် ၃၀,၀၀၀ အထိ တိုးမြှင့်တင်ပို့ရန် ရည်မှန်းထားကြောင်း Kong Chanvisal က ပြောကြားခဲ့သည်။

    CBA ကုမ္ပဏီသည် ၂၀၂၀ ပြည့်နှစ်မှစတင်၍ ကမ္ဘောဒီးယားနိုင်ငံ၌ ငှက်ပျောစိုက်ခင်းများ စိုက်ပျိုးထုတ်လုပ်မှုတွင် ပထမဆုံးအကြိမ် ရင်းနှီးမြှုပ်နှံခဲ့ကြောင်း၊ အဆိုပါ ရင်းနှီးမြှုပ်နှံမှုသည် ကမ္ဘောဒီးယားနိုင်ငံသား ၉၀၀ ကျော်အား အလုပ်အကိုင်များ ဖန်တီးပေးခဲ့ပြီး ရုပ်ပိုင်းဆိုင်ရာ အခြေခံအဆောက်အအုံများ ဖွံ့ဖြိုးတိုးတက်ရေး၊ ဒေသတွင်းအသိုက်အဝန်းနှင့် ကုန်စည်စီးဆင်းမှု ဆိုင်ရာ ဆက်သွယ်မှုတို့ကိုလည်း အထောက်အကူဖြစ်စေခဲ့ကြောင်း သိရှိရသည်။

     Mr. Chanvisal က ကမ္ဘောဒီးယားနိုင်ငံတွင် သီးမွှေးငှက်ပျောစိုက်ခင်းဧရိယာ ဟက်တာ ၂၁,၀၀၀ ရှိပြီး လက်ရှိကာလ၌ ဟက်တာ ၁၅,၀၀၀ မှ အသီးခုတ်ယူထုတ်လုပ်လျက်ရှိရာ စုစုပေါင်း တန်ချိန် ၄၀၀,၀၀၀ ခန့် ထွက်ရှိကြောင်း၊ ငှက်ပျောသီး ပျမ်းမျှအထွက်နှုန်းမှာ ၁ ဟက်တာလျှင် ၂၅ တန် ရှိကြောင်း ပြောကြားခဲ့သည်။

     လက်ရှိအချိန်တွင် တရုတ်နိုင်ငံသို့ တင်ပို့နိုင်ရန်အတွက် ငှက်ပျောခြံ ၂၄ ခြံနှင့် လတ်ဆတ် သော ငှက်ပျောသီးများကို ထုပ်ပိုးသည့် စက်ရုံ ၃၆ ရုံတို့ကို တရားဝင်မှတ်ပုံတင်လျက် အသိ အမှတ်ပြုထားပြီးဖြစ်သည်။ ၂၀၂၄ ခုနှစ်၌ ကမ္ဘောဒီးယားနိုင်ငံသည် လတ်ဆတ်သော ငှက်ပျောသီး တန်ချိန် ၂၆၀,၀၀၀ ကို ပြည်ပသို့ တင်ပို့ခဲ့ရာတွင် ယင်းပမာဏ၏ ၉၅% ဖြစ်သော တန်ချိန် ၂၅၀,၀၀၀ ကို တရုတ်ဈေးကွက်သို့ တင်ပို့ခဲ့ခြင်းဖြစ်သည်။ ကျန်ရှိသော ၅% ကိုမူ ဗီယက်နမ်၊ တောင်ကိုရီးယားနှင့် မလေးရှားနိုင်ငံများသို့ တင်ပို့ခဲ့သည်။

    တရုတ်ကုမ္ပဏီများအား ကမ္ဘောဒီးယားနိုင်ငံတွင် အထူးသဖြင့် စိုက်ပျိုးရေးကဏ္ဍ၌ ရင်းနှီး မြှုပ်နှံရန်၊ အရည်အသွေးမြင့် ကမ္ဘောဒီးယား စိုက်ပျိုးရေးထွက်ကုန်များကို ရိတ်သိမ်းခြင်း၊ ပြုပြင် ခြင်းနှင့် တရုတ်နှင့် ကမ္ဘာ့ဈေးကွက်များသို့ တင်ပို့ခြင်းများပြုလုပ်ရန် တိုက်တွန်းခဲ့ကြောင်း၊ ထို့ အပြင် စိုက်ပျိုးရေးဝန်ကြီးဌာနအနေဖြင့် အဆိုပါကုမ္ပဏီများ အောင်မြင်စွာ လုပ်ကိုင်နိုင်ရေး အတွက် ပံ့ပိုးကူညီရန်နှင့် ညှိနှိုင်းဆောင်ရွက်ပေးရန် အသင့်ရှိကြောင်း အတွင်းဝန် Mr. Chanvisal က ဖြည့်စွက်ပြောကြားခဲ့သည်။

     ၂၀၂၄ ခုနှစ်တွင် ကမ္ဘောဒီးယားနိုင်ငံ၏ စိုက်ပျိုးရေးကဏ္ဍသည် ပြည်တွင်း စားနပ်ရိက္ခာ ဖူလုံမှုကို ရရှိစေခဲ့သည့်အပြင် အမေရိကန်ဒေါ်လာ ၅.၃ ဘီလီယံခန့်တန်ဖိုးရှိသော စိုက်ပျိုးရေး ထွက်ကုန်တန်ချိန် ၁၂ သန်းကျော်ကို နိုင်ငံပေါင်း ၉၅ နိုင်ငံသို့ တင်ပို့နိုင်ခဲ့ကြောင်း၊ အဆိုပါ တင်ပို့မှု များအနက် တန်ချိန် ၈ သိန်းကျော်ကို တရုတ်နိုင်ငံသို့ တင်ပို့ခဲ့ကြောင်း သိရှိရသည်။

Source: Phnom Penh Post, 7 June 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)