မကြာသေးမီကာလ၌ ဈေးနှုန်းများပြောင်းလဲခဲ့ခြင်းက အဓိကဝယ်လက်များကို ဆွဲဆောင်မှု ဖြစ်ပေါ်စေခဲ့ရာ တရုတ်နိုင်ငံနှင့် အိန္ဒိယနိုင်ငံတို့၏ စားအုန်းဆီ ဝယ်လိုအားသည် ရှေ့လာမည့် လ အနည်းငယ်အတွင်း မြင့်တက်ဖွယ်ရှိသည်ဟု ဇွန် ၁၀ ရက်နေ့တွင် စားအုန်းဆီလုပ်ငန်းနယ်ပယ်မှ ကျွမ်းကျင်သူက ပြောကြားခဲ့ကြောင်း ရိုက်တာသတင်းအရ သိရှိရပါသည်။
ယခင်နှစ်၌ မလေးရှား စားအုန်းဆီဈေးနှုန်းများသည် ၂၀ ရာခိုင်နှုန်းခန့် မြင့်တက်ခဲ့ပြီး ထိုသို့ ဈေးနှုန်းများမြင့်မားခြင်းက ပဲပုပ်ဆီကဲ့သို့သော ပြိုင်ဖက်စားသုံးဆီများနှင့် ယှဉ်ပြိုင်နိုင်စွမ်းကို လျော့ကျမှု ဖြစ်စေခဲ့သည်။ ယခုနှစ်တွင်မူ ၁၂ ရာခိုင်နှုန်းခန့် ဈေးနှုန်းပြန်လည်ကျဆင်းလာခဲ့သည်။
Glenauk Economics စီးပွားရေး အတိုင်ပင်ခံလုပ်ငန်းမှ အုပ်ချုပ်မှုဒါရိုက်တာ Julian McGill က ၎င်းတို့အနေဖြင့် တရုတ်နှင့် အိန္ဒိယတို့၏ စားအုန်းဆီဝယ်ယူမှုသည် ကာလတိုအတွင်း မြင့်တက်လာမည်ဟု ရှုမြင်ကြောင်း၊ ရှေ့လာမည့်နှစ်အတွက် စားအုန်းဆီ သိုလှောင်မှုလက်ကျန် ပမာဏ မြင့်တက်မှုရှိမည့်အရေးကို စိုးရိမ်ဖွယ်မရှိကြောင်း၊ ယခင်နှစ် ဒီဇင်ဘာလကတည်းက တင်သွင်းမှု လျှော့ချခဲ့ကြသော အိန္ဒိယဝယ်လက်များ အနေဖြင့် ပြိုင်ဖက်စားသုံးဆီများနှင့် နှိုင်းယှဉ် ပါက ဈေးနှုန်းနိမ့်ကျနေမှုအရ ဇွန်လမှ ဩဂုတ်လအထိ ကာလအတွက် စားအုန်းဆီကို ပြန်လည် တိုးမြှင့် ဝယ်ယူလာကြကြောင်း၊ အလားတူ တရုတ်နိုင်ငံ စားအုန်းဆီတင်သွင်းသူများသည်လည်း ၎င်းတို့၏ သိုလှောင်မှုလက်ကျန် နည်းပါးနေမှုအရ အဆိုပါကာလအတွက် ဝယ်ယူမှုများကို ပိုမိုလုပ် ကိုင်လာကြကြောင်း၊ ထိုကဲ့သို့ ဝယ်လိုအား ကောင်းမွန်မှုအရ စားအုန်းဆီဈေးနှုန်းများသည် ရှေ့လာမည့် ၆ လအတွင်း တစ်တန်လျှင် မလေးရှားရင်းဂစ် ၃၉၀၀ မှ ၄၂၀၀ အကြား နှုန်းထား၌ တည်ရှိနေနိုင်ကြောင်းဖြင့် အင်ဒိုနီးရှားနိုင်ငံ၊ ဂျကာတာမြို့၌ ကျင်းပသည့် စားအုန်းဆီဖိုရမ်တစ်ခု တွင် ပြောကြားခဲ့သည်။
ဇွန် ၁၀ ရက်နေ့တွင် မလေးရှားစားအုန်းဆီ ကြိုတင်အရောင်းဈေးကွက်၌ စားအုန်းဆီ တစ်တန်၏ စာချုပ်ချုပ်ဆိုမှု ဈေးနှုန်းသည် ရင်းဂစ် ၃၈၆၄ နှုန်းဖြင့် ဈေးကွက်ပိတ်သိမ်းခဲ့သည်။ စားအုန်းဆီတင်ပို့မှုသည် ဩဂုတ်လ၌ အမြင့်မားဆုံးသို့ ရောက်ရှိမှုနှင့်အတူ ဝယ်လိုအား ဆက် လက် ကောင်းမွန်နိုင်ခြေမှာ အခြားစားသုံးဆီများနှင့် ယှဉ်ပြိုင်နိုင်စွမ်းရှိမည့် အခြေအနေအပေါ် မူတည်လျက်ရှိသည်ဟု Mr. McGill က ပြောဆိုထားသည်။
Source: The Edge Malaysia, 10 Jun 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)