၂၀၂၅ ခုနှစ်၏ ပထမ ၄ လတွင် ဒေသတွင်းဘက်ပေါင်းစုံစီးပွားရေးမိတ်ဖက်အဖွဲ့ဝင် နိုင်ငံများနှင့် ကုန်သွယ်မှု ၁၅.၄ ရာခိုင်နှုန်းမြင့်တက်ခဲ့သည့် ကမ္ဘောဒီးယား

           ယခုနှစ်၏ပထမ ၄ လတွင် ကမ္ဘောဒီးယား၏ ဒေသတွင်းဘက်ပေါင်းစုံစီးပွားရေးမိတ်ဖက် (RCEP) အဖွဲ့ဝင်နိုင်ငံများနှင့်ကုန်သွယ်မှုမှာ အမေရိကန်ဒေါ်လာ ၁၂.၉၂ ဘီလီယံတန်ဖိုးထိရှိခဲ့ပြီး ၂၀၂၄ ခုနှစ် တူညီသည့်ကာလထက် ၁၅.၄ ရာခိုင်နှုန်းမြင့်တက်ခဲ့ကြောင်း ဇွန်လ ၆ ရက်နေ့က တရားဝင်ထုတ်ပြန်ချက်အရသိရပါသည်။ ထို ၄ လတကာကလအတွင်း ကမ္ဘောဒီးယားသည် RCEP အဖွဲ့ဝင်နိုင်ငံများသို့ အမေရိကန်ဒေါ်လာ ၃.၆၁ ဘီလီယံတန်ဖိုးတင်ပို့ခဲ့ပြီး အမေရိကန်ဒေါ်လာ ၉.၃၁ ဘီလီယံတန်ဖိုးပြန်လည်တင်သွင်းခဲ့ပြီး လွန်ခဲ့သည့်နှစ် တူညီသည့်ကာလထက် ၇ ရာခိုင်နှုန်းနှင့် ၁၈.၉ ရာခိုင်နှုန်းအသီးသီးမြင့်တက်ခဲ့ကြောင်း အကောက်ခွန်နှင့် အခွန်အထွေထွေ ဦးစီးဌာန၏ အစီရင်ခံစာအရသိရပါသည်။ RCEP အောက်တွင် ကမ္ဘောဒီးယား၏ထိပ်တန်း ကုန်သွယ်ဖက် ၅ နိုင်ငံမှာတရုတ်၊ ဗီယက်နမ်၊ ထိုင်း၊ ဂျပန်နှင့် အင်ဒိုနီးရှားတို့ဖြစ်ကြောင်း သိရပါသည်။ RCEP အဖွဲ့ကို အာဆီယံဆယ်နိုင်ငံနှင့် ၎င်းတို့၏ကုန်သွယ်ရေးမိတ်ဖက် ၅ နိုင်ငံဖြစ်သည့် တရုတ်၊ ဂျပန်၊ တောင်ကိုရီးယား၊ ဩစတေးလျနှင့် နယူးဇီလန်တို့နှင့် ဖွဲ့စည်းထားကြောင်း သိရပါသည်။ ကမ္ဘောဒီးယားနိုင်ငံစီးပွားကူးသန်းဝန်ကြီးဌာန၏ ပြောခွင့်ရပုဂ္ဂိုလ်ဖြစ်သူ Penn Sovicheat က RCEP သည် ပို့ကုန်ရေရှည်ကြီးထွားရေးနှင့် ကမ္ဘောဒီးယားသို့ ပြည်ပတိုက်ရိုက် ရင်းနှီးမြှပ်နှံမှုများကို ဆွဲဆောင်ရန်အတွက်အရေးပါကြောင်းနှင့် RCEP သဘောတူညီချက်အောက်ရှိ သင့်လျော်သောအကောက်ခွန်နှုန်း၏ ပံ့ပိုးမှုနှင့်အတူ ယခုနှစ်နှင့် လာမည့်နှစ်များတွင် ကမ္ဘောဒီးယား၏ RCEP အဖွဲ့ဝင်နိုင်ငံများသို့ တင်ပို့မှုမှာ ဆက်လက်မြင့်တက်လိမ့်မည်ဟု ပြောကြားခဲ့ပါသည်။

Khmer Times

DOCA (ရန်ကုန်)