မွန်ပြည်နယ်၊ ပေါင်မြို့နယ်ရှိ မုတ္တမကျွဲခြံကျေးရွာနှင့် အနီးဝန်းကျင်များတွင် စားဖိုဆောင်သီးနှံဖြစ်သည့် ရုံးပတီသီးနှံအား စီးပွားဖြစ်စိုက်ပျိုးလာကြောင်း သိရသည်။
ရုံးပတီသီးနှံသည် စတင်စိုက်ပျိုးသည်မှ နှစ်လခန့်အကြာတွင် ခူးဆွတ်ရကြောင်း၊ အပင်ပု၊ အပင်လတ်၊ အပင်ရှည်ဟု (၃) မျိုးရှိရာ အပင်ရှည်သာ အစိုက်များပြီး ဈေးကွက်ရရှိ ကြောင်း၊ တစ်ဧကလျှင် မျိုးစေ့အပါအဝင်သွင်းအားစု၊ လုပ်အားခအပြီး စုစုပေါင်း ကျပ် (၁၀) သိန်းခန့် ကုန်ကျကြောင်း၊ ရုံးပတီသီးနှံအား တစ်ရက်ခြားလျှင်တစ်ကြိမ်ခူးဆွတ်ရပြီး နှစ်လအထိခူးဆွတ်နိုင်ကြောင်း၊ မြေအမျိုးအစား၊ သီးနှံမျိုး၊ သွင်းအားစုအပေါ်မူတည်၍ အထွက်နှုန်းနှင့် ဈေးကွက်အခြေအနေကွဲပြားမှုရှိကြောင်း၊ အဆိုပါကျေးရွာရှိ တောင်သူများမှ ခူးဆွတ်ပြီး သီးနှံများကို ပေါင်မြို့နယ်၊ မင်္ဂလာဈေးရှိ ကုန်စိမ်းဒိုင်များနှင့် မော်လမြိုင်မြို့ထိ ရောင်းချကြောင်း သိရသည်။
ရုံးပတီသီးနှံသည် ရာသီမရွေးစိုက်ပျိုးနိုင်သဖြင့် တောင်သူများအနေဖြင့် တစ်ဖက် တစ်လမ်းဝင်ငွေရရှိသည့် သီးနှံတစ်မျိုးလည်းဖြစ်ကြောင်း သိရသည်။
DOCA(မွန်)