မွန်ပြည်နယ်၊ ပေါင်မြို့နယ်ရှိ ဒရိန်းကျေးရွာ၊ ကျုံကော်ကျေးရွာ၊ အဟောက်ကျေးရွာရှိ စိုက်ကွင်းများတွင် ယခုလိုဆောင်းရာသီ၌ အများဆုံးစိုက်ပျိုးကြသည့် စားဖိုဆောင်သီးနှံ ဖြစ်သည့် ပန်းဂေါ်ဖီအား တောင်သူများမှ စီးပွားဖြစ်စိုက်ပျိုးလာကြောင်း သိရသည်။
ပန်းဂေါ်ဖီကို အောက်တိုဘာလနှင့် နိုဝင်ဘာလတို့တွင် စိုက်ပျိုးကြပြီး ဒီဇင်ဘာလနှင့် ဇန်နဝါရီလတို့တွင် ခူးဆွတ်ရကြောင်း သိရသည်။ ပန်းဂေါ်ဖီစိုက်ပျိုးရာတွင် မြေကိုထွန်ယက် ၍ဘောင်ခတ်စနစ်ဖြင့် စိုက်ပျိုးကြပြီး ယခင်က မျိုး၊ ထွန်ယက်ခ၊ သွင်းအားစု၊ သယ်ယူပို့ဆောင်ခ၊ လုပ်အားခ အပါအဝင် တစ်ဧကလျှင် ငွေကျပ် (၁၀) သိန်းခန့် ကုန်ကျကြောင်း၊ ယခုအခါ သွင်းအားစုများ ဈေးတက်နေ၍ ငွေကျပ် သိန်း (၂၀) ကျော်ခန့် ကုန်ကျကြောင်းလည်း သိရသည်။
ထွက်ရှိလာသော ပန်းဂေါ်ဖီများကို ပေါင်မြို့နယ်၊ မင်္ဂလာဈေးနှင့် မော်လမြိုင်မြို့ရှိ ကုန်စိမ်းဒိုင်များသို့ တင်ပို့ရောင်းချကြောင်း သိရသည်။ အရွယ်အစားအပေါ်မူတည်၍ ပန်းဂေါ်ဖီ ဈေးနှုန်းအနေဖြင့် အပွင့်ကြီးလျှင် ကျပ် ၃၅၀၀ မှ ၄၀၀၀၊ အပွင့်သေးလျှင် ကျပ် ၁၅၀၀ မှ ၂၀၀၀ ခန့်ဖောက်သည်ဈေးပေးရကြောင်း သိရသည်။
DOCA(မွန်)