“ပဲကျား(ဆောင်း)များ အောင်မြင်စွာရိတ်သိမ်းပြီးစီး”

    မန္တလေးတိုင်းဒေသကြီး၊ ကျောက်ဆည်ခရိုင်တွင် သီးနှံမျိုးစုံအောင်မြင်ဖြစ်ထွန်းလျက်ရှိပြီး ၄င်းသီးနှံများအနက် ပဲကျားသီးနှံကို ကျောက်ဆည်မြို့နယ်တွင် (၈၂၉)ဧက၊ မြစ်သားမြို့နယ်တွင် (၃၃၁)ဧက၊ စုစုပေါင်း(၁၁၆၀)ဧကစိုက်ပျိုးနိုင်ခဲ့ပြီး ဧပြီလ ပထမပတ်မှစတင်၍ ဧကအားလုံးရိတ်သိမ်းပြီးစီးပြီဖြစ်ကြောင်း ခရိုင်ကြေးတိုင်နှင့် မြေစာရင်းဦးစီးဌာန၏ စာရင်းများအရသိရှိရပါသည်။ ပဲကျားစိုက်ပျိုးမှုတွင် တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၁၅၀၀၀၀/-)ကျပ်ခန့်ကုန်ကျပြီးအထွက်နှုန်းအနေဖြင့် (၁၂)တင်းခန့်ထွက်ရှိကြောင်း၊ ပဲကျားစျေးနှုန်းအနေဖြင့် ယခင်နှစ်တွင် တစ်တင်းလျှင် (၃၈၀၀၀/-)ကျပ်ဖြင့်ရောင်းဝယ်ခဲ့ကြပြီး ယခုနှစ်တွင် ပဲကျားတစ်တင်းလျှင် (၄၄၀၀၀/-)ကျပ်စျေးနှုန်းဖြင့် အရောင်းအဝယ်ဖြစ်နေကြောင်း၊ ပဲကျားသီးနှံကို ပြုတ်၍စားသုံးကြသည့်အပြင် ပဲလှော်(ပဲကျား)အဖြစ် လှော်၍လည်းရောင်းချကြပါသည်။ ပဲကျားလှော်တစ်ပိဿာလျှင် ယခင်နှစ်တွင် (၃၅၀၀/-)ကျပ်၊ ယခုနှစ်တွင် (၄၀၀၀/-)စျေးနှုန်းဖြင့် ရောင်းဝယ်လျက်ရှိကြပါသည်။ တစ်ဧကအကျိုးအမြတ်အနေဖြင့် စိုက်ပျိုးစရိတ်နှုတ်ပြီးပါက (၃၇၈၀၀၀/-)ကျပ်မြတ်ကြောင်း၊ ပဲစားသုံးခြင်းဖြင့် ပရိုတင်းဓာတ်ကိုရရှိစေပြီး စိုက်ပျိုးစရိတ်သက်သာကာ အကျိုးအမြတ်ပိုမိုရရှိသော ပဲကျားသီးနှံကို တောင်သူများတိုးချဲ့စိုက်ပျိုးသင့်ပါကြောင်း ရေးသားတင်ပြပါသည်။

DOCA(မန္တလေး)