စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ပခုက္ကူခရိုင်ဦးစီးမှူးတို့၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဒုတိယဦးစီးမှူး ဦးဇော်မင်းဦး၊ ဒေါ်မြင့်မြင့်သန်းနှင့် ဒေါ်လှိုင်ဥမ္မာဦးတို့သည် (၇.၂.၂၀၂၄) ရက်နေ့၊ နံနက်(၁၀:၀၀)နာရီအချိန်တွင် စားသုံးပြည်သူ ဆရာ၊ ဆရာမများနှင့် ကျောင်းသား၊ ကျောင်းသူများအား အခွင့်အရေးနှင့် တာဝန်များကို သိရှိစေရန်ရည်ရွယ်၍ စားသုံးသူကာကွယ်ရေးဆိုင်ရာ အသိပညာပေး ဟောပြောဆွေးနွေးခဲ့ပါသည်။
အဆိုပါဟောပြောဆွေးနွေးပွဲတွင် ကျောင်းအုပ်ဆရာကြီးက ကြိုဆိုနှုတ်ခွန်းဆက် စကားပြောကြားခဲ့ပြီး ဒုတိယဦးစီးမှူး ဦးဇော်မင်းဦးက ဌာနဖွဲ့စည်းပုံနှင့်သမိုင်းကြောင်း၊ ဌာနဖြစ်ပေါ်လာပုံ အဆင့်ဆင့်၊ ဌာနမှဆောင်ရွက်နေသော လုပ်ငန်းဆောင်ရွက်ချက်များ၊ ကုန်စည်(သို့)ဝန်ဆောင်မှုများ အစားအသောက်အသုံးအဆောင်များကို ဝယ်ယူသုံးစွဲသည့်အခါ ကုန်အညွှန်းအမှတ်အသားများ ပြည့်စုံစွာပါရှိသည့် ကုန်စည်များကိုသာ ရွေးချယ်ဝယ်ယူတတ်စေရန် အသိပညာပေးလုပ်ငန်းများ ဆောင်ရွက်လျက်ရှိပြီး စားသုံးသူရေးရာဦးစီးဌာနအနေဖြင့် စားသုံးသူပြည်သူများအပေါ် အကျိုးပြု ကာကွယ်ပေးနေသော ဌာနဖြစ်ကြောင်း ရှင်းလင်းဆွေးနွေးခဲ့ပါသည်။
ဒုတိယဦးစီးမှူး ဒေါ်မြင့်မြင့်သန်းက ရှင်းလင်းဆွေးနွေးရာတွင် စားသုံးသူကာကွယ်ရေးဥပဒေပါ စားသုံးသူများ ကုန်စည်(သို့)ဝန်ဆောင်မှုကို ဝယ်ယူသုံးစွဲရာတွင် စားသုံးသူအခွင့်အရေးကို သိရှိပြီး ရယူတောင်းဆိုတတ်စေရေး၊ လိမ်လည်လှည့်ဖြားမှုကို မခံရစေရေးနှင့် နစ်နာမှုများရှိပါက တိုင်ကြားနိုင်ခွင့်များ သိရှိနိုင်စေရေး၊ ပြန်လည်ကုစားခွင့်များ ရရှိစေရေးနှင့် စားသုံးသူအခွင့်အရေး(၈)ချက်နှင့် လိုက်နာရမည့်တာဝန်(၄)ရပ်ကို အသေးစိတ် ရှင်းလင်း ဆွေးနွေးပြီး တိုင်ကြားနိုင်သည့်ပုဂ္ဂိုလ်များ၊ နေရာများကို သိရှိစေရန် ရှင်းလင်းဆွေးနွေးခဲ့ပါသည်။
ဒုတိယဦးစီးမှူးဒေါ်လှိုင်ဥမ္မာဦးက ရှင်းလင်းဆွေးနွေးရာတွင် စားသုံးသူကာကွယ်ရေးဥပဒေ ၂၀၁၉ အခန်း(၁၈)၊ ပုဒ်မ(၄၁)အရ ကုန်စည်များတွင် ကုန်အညွှန်းအမှတ်များ ပြည့်စုံစွာဖော်ပြထားရှိ သည့် ကုန်ပစ္စည်းများကိုသာ ဝယ်ယူသုံးစွဲရန်နှင့် ကုန်အညွှန်းအမှတ်အသားနှင့်စပ်လျဉ်းသည့် အချက် (၈)ချက်နှင့် ဓါတုဆိုးဆေးနှင့်ဆိုးဆေးအန္တရာယ်အကြောင်းကို အသေးစိတ် ရှင်းလင်းဆွေးနွေးခဲ့ ပါသည်။
ဆက်လက်၍ အဆိုပါဟောပြောပွဲသို့ တက်ရောက်သည့် ကျောင်းသား၊ ကျောင်းသူများအား မိမိတို့ အသိပညာပေးဟောပြောဆွေးနွေးမှုများမှ နားလည်နိုင်မှု စွမ်းရည်များကို မေးမြန်း၍ ဖြေကြားနိုင်သည့် ကျောင်းသား၊ ကျောင်းသူများအား ဆုများချီးမြှင့်ခဲ့ပြီး စားသုံးသူကာကွယ်ရေး အသိပညာပေး လက်ကမ်းစာစောင်များ ဖြန့်ဝေပေးခဲ့ပြီး အသိပညာပေးဟောပြောပွဲသို့ ဆရာ၊ ဆရာမ(၇)ဦး၊ ကျောင်းသား၊ ကျောင်းသူ (၈၅)ဦး၊ စုစုပေါင်း(၉၂)ဦး တက်ရောက်ခဲ့ကြောင်း သိရှိရပါသည်။
DOCA(မကွေး)