“ ကော့မှူးမြို့နယ်၌ Seeder နှင့်သွင်းအားစု ပေးအပ်ပွဲနှင့် နွေစပါးမျိုးစေ့ချကိရိယာဖြင့် လက်တွေ့စိုက်ပျိုးသရုပ်ပြခြင်း အခမ်းအနား ကျင်းပခြင်း ”

    ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်တွင် Seederနှင့် သွင်းအားစုပေးအပ်ပွဲ အခမ်းအနားကို တာလမ်းသစ်ရပ်ကွက်၊ ကွင်းအမှတ်(၂၉၃)၊ ဦးပိုင်အမှတ်(၁၄/၁၅)ရှိ ဒေါ်ဝါဝါသန်း၏ လယ်မြေ ၂၅ဧက၌ ဇန်နဝါရီလ ၁၆ ရက်နေ့၊ နံနက်(၁၀:၀၀)နာရီအချိန်တွင် ကျင်းပခဲ့ကြောင်း သိရပါသည်။

    အဆိုပါ အခမ်းအနားတွင် မြို့နယ်စီမံအုပ်ချုပ်ရေးအဖွဲ့မှ ခေတ္တဥက္ကဌ ဗိုလ်မှူးထွန်းဇော်မင်း က အဖွင့်အမှာစကားပြောကြားခဲ့ပြီး မြို့နယ်စိုက်ပျိုးရေးဦးစီးဌာနမှ ဦးစီးမှူး ဦးသက်နိုင်၊ မြို့နယ်စက်မှုလယ်ယာဦးစီးဌာနမှ ဦးစီးမှူး ဦးကျော်ဟိန်းတို့က မျိုးစေ့ချကိရိယာဖြင့် စိုက်ပျိုးခြင်းမှရရှိနိုင်မည့် အကျိုးကျေးဇူးများဖြစ်သော မျိုးစေ့ကုန်ကျမှုသက်သာခြင်း၊ ပင်ကြားကန်ကြား ညီညာစွာစိုက်ပျိုးနိုင်ခြင်း၊ ကြားလိုက်သမန်းနိုးရန်လွယ်ကူခြင်း၊ တစ်ဧကလောက်ကွက်ပြည့်မှီခြင်း၊ ပင်ပွားကောင်းမွန်ခြင်း၊ လေဝင်လေထွက်ကောင်း၍ အပင်ဖြစ်ထွန်းမှုပိုမိုကောင်းမွန်ခြင်း၊ အတန်း လိုက်စိုက်ပျိုးထား၍ မြေဩဇာ အာဟာရများ ညီမျှစွာစားသုံးနိုင်ခြင်း၊ ထွက်နှုန်းတိုးစေခြင်း၊ ကုန်ကျ စရိတ်သက်သာပြီး အချိန်မှီစိုက်ပျိုး နိုင်ခြင်း၊ ရိတ်သိမ်းရန်လွယ်ကူခြင်း၊ စုပေါင်းဆောင်ရွက်နိုင်ခြင်း၊ ဝင်ငွေတိုးတက်စေခြင်းစသည့် အကျိုးကျေးဇူးများနှင့် လိုက်နာရမည့်အချက်များအား အကျယ်တဝင့် ရှင်းလင်းအသိပညာပေးပြောကြားခဲ့ပြီး တောင်သူများအား သွင်းအားစုများ၊ မျိုးစပါးများ၊ မျိုးစေ့ချ ကိရိယာ Seeder များ ပေးအပ်ခဲ့ကာ မျိုးစေ့ချကိရိယာ Seeder ဖြင့် နွေစပါးလက်တွေ့ စိုက်ပျိုးပြသခြင်းကို ဆောင်ရွက်ခဲ့ကြောင်း သိရပါသည်။

    အဆိုပါ Seeder ၊ သွင်းအားစုပေးအပ်ပွဲနှင့် နွေစပါးမျိုးစေ့ချကိရိယာဖြင့် လက်တွေ့ စိုက်ပျိုးပြသခြင်း အခမ်းအနားသို့ မြို့နယ်စီမံအုပ်ချုပ်ရေးအဖွဲ့ ခေတ္တဥက္ကဌ ဗိုလ်မှူးဇော်ထွန်းမင်းနှင့် အဖွဲ့ဝင်များ၊ မြို့နယ်ဌာနဆိုင်ရာများမှ တာဝန်ရှိသူများ၊ ရပ်ကွက်ကျေးရွာများမှ အုပ်ချုပ်ရေးမှူးများ နှင့် တောင်သူများ တက်ရောက်ခဲ့ကြောင်း သိရပါသည်။

DOCA(ရန်ကုန်)