မန္တလေးတိုင်းဒေသကြီး ၊ ကျောက်ဆည်ခရိုင်သည် စိုက်ပျိုးရေးကိုအခြေခံ၍ သီးနှံမျိုးစုံအား စိုက်ပျိုးသည့်ဒေသဖြစ်ပါသည်။ဒေသတွင်း စပါးကို အဓိကထားစိုက်ပျိုးသော်လည်း နှမ်း၊ပဲတီစိမ်း၊ ကုလားပဲ၊ငရုတ်စသည့်သီးနှံများကိုလည်း ရာသီအလိုက်စိုက်ပျိုးကြပါသည်။၄င်းသီးနှံများအနက် ငရုတ်(ဆောင်း)သီးနှံကို ကျောက်ဆည်မြို့နယ်တွင်(၂၁၀၈)ဧက ၊ စဉ့်ကိုင်မြို့နယ်တွင်(၇၁၃)ဧက၊ မြစ်သားမြို့နယ်တွင်(၂၉၈၉)ဧက၊စုစုပေါင်း(၅၈၁၀)ဧက စိုက်ပျိုးပြီးကြောင်း လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၏ စာရင်းများအရသိရှိရပါသည်။ ငရုတ်(ဆောင်း)သီးနှံကို နိုဝင်ဘာလ နှင့်ဒီဇင်ဘာလများတွင် စတင်စိုက်ပျိုးပြီး မတ်လနှင့်ဧပြီလများတွင် စတင်ခူးဆွတ်ကြောင်းသိရှိရပါသည်။ ငရုတ်မျိုး အနေဖြင့် ပိုးမွှားဒဏ်ခံနိုင်ရည်ရှိပြီး အထွက်နှုန်းကောင်းမွန်သော သာမို ၊ ဒီမွန် ၊ အာစတာ၊၆၉၂မျိုးများကို စိုက်ပျိုးကြသော်လည်း တောင်သူများအနေဖြင့် ၆၉၂ မျိုးကို ပိုမိုစိုက်ပျိုးမှုများကြောင်း သိရှိရပါသည်။ငရုတ်(ဆောင်း)စိုက်ပျိုးရာတွင် (၁)ဧက ကုန်ကျစရိတ်အနေဖြင့် မျိုး၊ သွင်းအားစု၊လုပ်သားခ၊စုစုပေါင်း(၁၂၀၀၀၀၀)ကျပ် ဝန်းကျင်ခန့်ကုန်ကျကြောင်း၊ယခင်နှစ် ငရုတ်သီးအခြောက်စျေးနှုန်းအနေဖြင့် ငရုတ်ခြောက်အညှာပါ(၁)ပိဿာလျှင်(၁၂၀၀၀)ကျပ်၊ငရုတ်အညှာခြွေ (၁)ပိဿာလျှင်(၁၃၅၀၀)ကျပ် စျေးနှုန်းများရှိခဲ့ပြီး ယခုနှစ် ငရုတ်ခြောက်အညှာပါ(၁)ပိဿာလျှင် (၉၀၀၀)ကျပ်၊ငရုတ်အညှာခြွေ(၁)ပိဿာလျှင်(၁၀၀၀၀)ကျပ် စျေးနှုန်းများဖြင့် အရောင်းအဝယ်ဖြစ် နေကြောင်းသိရှိရပါသည်။ယခုအချိန်တွင် ငရုတ်စိုက်ခင်းများ၌ ငရုတ်သီးများထွက်ပေါ်ခြင်းမရှိသေးသော်လည်း အဖူးအပွင့်များဝေဝေဆာဆာဖြင့် အောင်မြင်ဖြစ်ထွန်းလျက်ရှိကြောင်း၊ ငရုတ်သီးပေါ်ချိန်တွင် စျေးနှုန်းနှင့် အထွက်နှုန်းကောင်းမွန်ပါက အကျိုးအမြတ် ပိုမိုရရှိနိုင်မည် ဖြစ်သောကြောင့် တောင်သူများအနေဖြင့် စိုက်ပျိုးသင့်သော သီးနှံဖြစ်ပါကြောင်း ရေးသားတင်ပြအပ်ပါသည်။
DOCA(မန္တလေး)