ကယားပြည်နယ်အတွင်းရှိ COVID-19 သက်ရောက်မှုကြောင့် ထိခိုက်မှုရှိသော စီးပွားရေးလုပ်ငန်းများအား COVID-19 Fund မှထုတ်ပေးသည့်ချေးငွေများ အကျိုးရှိစွာအသုံးချမှုအပေါ်စိစစ်ကြပ်မတ်ရေးအဖွဲ့၏ လုပ်ငန်းညှိနှိုင်းအစည်းအဝေးကို (၃၀.၆.၂၀၂၁) ရက်နေ့ နံနက် (၁၀ ၃၀) တွင် ခရိုင်အထွေထွေအုပ်ချုပ်ရေးဦးစီးဌာနရုံး အစည်းအဝေးခန်းမ၌ကျင်းပခဲ့ရာ စိစစ်ကြပ်မတ်ရေးအဖွဲ့ဥက္ကဌ၊ အတွင်းရေးမှူး၊ အဖွဲ့ဝင်များနှင့်စီးပွားရေးလုပ်ငန်းရှင်များ တက်ရောက်ခဲ့ကြပါသည်။
အဆိုပါ အစည်းအဝေးတွင် စိစစ်ကြပ်မတ်ရေးအဖွဲ့ ဉက္ကဌ ရင်းနှီးမြှပ်နှံမှုနှင့်ကုမ္ပဏီများ ညွှန်ကြားမှုဦးစီးဌာန ပြည်နယ်ဦးစီးမှူးဒေါ်မေမျိုးဇော်က အဖွင့်အမှာစကား ပြောကြားရာတွင် ယခင်ပထမအကြိမ်အစည်းအဝေးမှ မိမိတို့နှင့်လုပ်ငန်းရှင်များ (၂) လတစ်ကြိမ် ပုံမှန်တွေ့ဆုံရန် ပြောဆိုသည့်အချက်ပါဝင်ကြောင်း ပထမအကြိမ်တွေ့ဆုံပွဲတွင် လုပ်ငန်းရှင်များအား ချေးငွေမရမီနှင့် ရရှိပြီး နောက်ပိုင်း ဝင်ငွေရရှိမှုအခြေအနေ၊ အရှုံးအမြတ်အခြေအနေ၊ အလုပ်သမားခန့်ထားမှုအခြေအနေ၊ ချေးငွေပြန်လည်ပေးဆပ်ရန် စီစဉ်ထားရှိမှု အခြေအနေ၊ ကြုံတွေ့နေရသည့် အခက်အခဲများကို တင်ပြစေခဲ့ရာ လုပ်ငန်းရှင်များ၏ တင်ပြချက်များကိုသုံးသပ်ရာ အချို့မှာ ချေးငွေပြန်လည်ပေးဆပ်ရမည့်ကာလကို ဆိုင်းငံ့ပေးစေလိုကြောင်း၊ ဆိုင်းငံ့ကာလပြည့်မြောက်သည်နှင့် ပေးဆပ်နိုင်သည့်လုပ်ငန်းရှင်များလည်း ရှိကြောင်း၊ လုပ်ငန်းလည်ပတ်မှ ပေးဆပ်နိုင်မည့်လုပ်ငန်းရှင်များလည်း ရှိကြောင်းတွေ့ရသဖြင့် ယခုတက်ရောက်လာသော လုပ်ငန်းရှင်များကလည်း မိမိတို့ပေးဆပ်နိုင်သည့်အခြေအနေများကို ပြည့်ပြည့်စုံစုံတင်ပြဆွေးနွေးပေးစေလိုကြောင်းပြောကြားခဲ့ပြီး လုပ်ငန်းရှင် များ၏ အခက်အခဲ တင်ပြချက်များအပေါ် တာဝန်ရှိသူများက ပြန်လည်အသီးသီးဆွေးနွေးခဲ့ကြပြီး အစည်းအဝေးကို (၁၁ ၃၀) တွင် ရုတ်သိမ်းခဲ့ကြောင်းသိရှိရပါသည်။