နှမ်းသီးနှံသည်ကမ္ဘာရှေးအကျဆုံး စိုက်ပျိုးသီးနှံများအနက် တစ်ခုအပါအဝင်ဖြစ်ပြီး အာဖရိကတိုက်မှ နှမ်းကိုစတင်စိုက်ပျိုးလာခဲ့ကြရာ ယခုအခါ တရုတ်နိုင်ငံနှင့်အိန္ဒိယနိုင်ငံတို့သည် ကမ္ဘာနှမ်းစိုက် အများဆုံးနိုင်ငံတို့ဖြစ်ကြပြီး မြန်မာနိုင်ငံတွင်လည်း ဆီထွက်သီးနှံများအနက် နှမ်းစိုက်ဧကသည် ကမ္ဘာနှမ်းစိုက်ဧရိယာ၏ စတုတ္တအများဆုံးနိုင်ငံလည်းဖြစ်သည်။ မြန်မာနိုင်ငံတွင် နှမ်းအဓိကစိုက်ပျိုးသည့်ဒေသမှာ မကွေးတိုင်း၊ စစ်ကိုင်းတိုင်း၊ ပဲခူးတိုင်း၊ မန္တလေးတိုင်း၊ ဧရာဝတီတိုင်းနှင့် ကယားပြည်နယ်တို့တွင် အများဆုံးစိုက်ပျိုးကြသည်။
ကယားပြည်နယ်သည် မြန်မာနိုင်ငံ၏ အသေးငယ်ဆုံးပြည်နယ်ဖြစ်ပြီး မြောက်လတ္တီတွဒ် (၁၈.၀) နှင့် (၁၉.၅၅)ကြား၊ အရှေ့လောင်ဂျီတွဒ် (၉၄.၄၀)နှင့် (၉၇.၉၃)ကြားတွင်တည်ရှိသည်။ အရှေ့မှအနောက်သို့(၁၂၈)မိုင်၊ တောင်မှမြောက်သို့ (၁၃၅)မိုင်ရှိပြီး၊ ဧရိယာစတုရန်းမိုင်ပေါင်း(၄၅၂၉.၅၆) စတုရန်းမိုင်၊ (၂၈၉၈၉၂၁)ဧက ကျယ်ဝန်းပါသည်။ ကယားပြည်နယ်တွင် လွိုင်ကော်ခရိုင်နှင့် ဘောလခဲခရိုင်ဟူ၍ ခရိုင်(၂)ခုရှိပြီး၊ လွိုင်ကော်ခရိုင်တွင် လွိုင်ကော်မြို့နယ်၊ ဒီးမော့ဆိုမြို့နယ်၊ ဖရူဆိုမြို့နယ်နှင့် ရှားတောမြို့နယ်တို့ဖြစ်ပြီး ဘောလခဲခရိုင်တွင် ဘောလခဲမြို့နယ်၊ ဖားဆောင်းမြို့နယ်၊ မယ်စဲ့မြို့ နယ်တို့ဖြစ်ကြသည်။
ကယားပြည်နယ်တွင် နှမ်းကို လွိုင်ကော်ခရိုင်၊ ရှားတောမြို့နယ်နှင့်ဘောလခဲခရိုင်တို့တွင် အများဆုံးစိုက်ပျိုးကြသည်။ မိုးနှမ်းကိုသာအဓိကစိုက်ပျိုးကြပြီး ဆောင်းနှမ်းကို အနည်းငယ်သာစိုက်ပျိုးကြသည်။ မိုးနှမ်းကို မေလမှ ဇွန်လအတွင်း အပြီးစိုက်ပျိုးကြရပြီ ဩဂုတ်လမှ စက်တင်ဘာလ အတွင်း ရိတ်သိမ်းကြပါသည်။ ၂၀၁၉-၂၀၂၀ ခုနှစ်၊ စိုက်ပျိုးရေးရာသီတွင် နှမ်းစိုက်ဧက(၂၅၃၂၇) ဧကအထိစိုက်ပျိုးခဲ့ရာ အထွက်နှုန်းမှာ (၂၅၁၃၅၃) တင်းထွက်ရှိခဲ့ကြောင်း စိုက်ပျိုးရေးဦးစီးဌာနသတင်းအရသိရှိရပါသည်။ ယခင် ၂၀၂၀ ခုနှစ်၊ ကယားပြည်နယ် နှမ်းဈေးနှုန်းမှာ စမုံနက် တစ်ပိဿာ ကို (၄၂၀၀)ကျပ်နှင့် နှမ်းနက်တစ်ပိဿာကို (၃၇၀၀)ကျပ်ဖြင့် အရောင်းအဝယ်ဖြစ်ခဲ့ကြပြီး၊ ၂၀၂၀ ခုနှစ်၊ အောက်တိုဘာလနောက်ပိုင်းမှစ၍ နှမ်းဈေးနှုန်းများ တစ်ဆထက်တစ်ဆ ကျဆင်းလာမှုကြောင့် ကယားပြည်နယ်တွင် နှမ်းဈေးကွက်အရောင်းအဝယ်ပျက်ခဲ့ပြီး ယခုအချိန်ထိ တောင်သူများ လက်ဝယ်တွင် နှမ်းလက်ကျန် (၂၄၀၀၀)တင်းခန့် ရောင်းချရန်ကျန်ရှိနေပါကြောင်းသတင်းရရှိပါသည်။