စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန နှင့် Internet Wallet Myanmar Limited တို့အကြား စားသုံးသူတိုင်ကြားခြင်း နှင့် အသိပညာပေးခြင်းဆိုင်ရာ ဝန်ဆောင်မှုလုပ်ငန်းအား ပူးပေါင်းဆောင်ရွက်ရန်အတွက် သဘောတူညီချက်မှတ်တမ်းအား လက်မှတ်ရေးထိုးခြင်းအခမ်းအနားကို ၂၀၂၁ခုနှစ် ဇူလိုင်လ ၁ရက်နေ့၊ နေ့လည် ၁၂နာရီတွင် စားသုံးသူရေးရာဦးစီးဌာန၊ အစည်းအဝေးခန်းမ၌ ကျင်းပခဲ့ရာ စားသုံးသူရေးရာဦးစီးဌာနမှ ညွှန်ကြားရေးမှူးချုပ်ဦးမြင့်ချို၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ နှင့် တာဝန်ရှိသူများ၊ Internet Wallet Myanmar Limited (OK$) မှ မန်နေဂျင်း ဒါရိုက်တာဦးနိုင်ဝင်းနှင့် တာဝန်ရှိသူများ တက်ရောက်ခဲ့ကြပါသည်။
အခမ်းအနားတွင် ညွှန်ကြားရေးမှူးချုပ်က အမှာစကားပြောကြားရာ စားသုံးသူရေးရာ ဦးစီးဌာနအနေဖြင့် “စားသုံးသူများလုံခြုံစိတ်ချရမှုရှိစေရန်” ဟူသောမျှော်မှန်းချက်ထားရှိကာ စားသုံးသူအခွင့်အရေးနှင့် စားသုံးသူအကျိုးစီးပွားကာကွယ်ရေး၊ ထုတ်ကုန်များလုံခြုံစိတ်ချရမှု ရှိစေရေး အစီအမံများချမှတ်ကာ လုပ်ငန်းများ ဆောင်ရွက်လျှက်ရှိပါကြောင်း၊ ဌာန၏ Website နှင့် Moblie Application တို့တွင် စားသုံးသူနစ်နာမှုများကို တိုင်ကြားနိုင်သည့် Consumer Complaint System ပါရှိပါကြောင်း၊ Internet Wallet Myanmar Limited (OK$) အနေဖြင့် OK$ Application တွင် စားသုံးသူရေးရာဦးစီးဌာန၏ Comsumer Complaint System ကို ချိတ်ဆက်နိုင်ရေး ပူးပေါင်းဆောင်ရွက်ခွင့်ပြုပါရန် ကမ်းလှမ်းလာမှုကို ကြိုဆိုပါကြောင်း၊ အဆိုပါဝန်ဆောင်မှုအား တရားဝင်ဆောင်ရွက်နိုင်ရန်အတွက် ယခုကဲ့သို့ သဘောတူညီချက် မှတ်တမ်းရေးထိုးရခြင်းဖြစ်ပါကြောင်းနှင့် စားသုံးသူအငြင်းပွားမှုများကို ဌာနကဖြေရှင်း ဆောင်ရွက်လျှက်ရှိသည့် အခြေအနေများကို ရှင်းလင်းပြောကြားခဲ့ ပါသည်။
ထို့နောက် ညွှန်ကြားရေးမှူးဦးဆန်းမြင့်က သဘောတူညီချက်မှတ်တမ်းပါ အချက် အလက်များအပေါ် အသေးစိတ်ရှင်းလင်းခြင်းနှင့် OK$ Application တွင် စားသုံးသူရေးရာ ဦးစီးဌာန Logo ထားရှိကာ ဌာန၏ Consumer Complaint System နှင့် ချိတ်ဆက်ရာတွင် စားသုံးသူများသိရှိနိုင်စေရေးဖော်ပြထားရှိမည့် အချက်အလက်များ၊ ကြော်ငြာတွင်ပါဝင်မည့် အချက်အလက်များ စသည်တို့ကို ရှင်းလင်းဆွေးနွေးခဲ့ပါသည်။
ထို့နောက် စားသုံးသူတိုင်ကြားခြင်းနှင့် အသိပညာပေးခြင်းဆိုင်ရာ ဝန်ဆောင်မှု ပူးပေါင်းဆောင်ရွက်ရန်အတွက် သဘောတူညီချက်မှတ်တမ်းအား နှစ်ဘက်လက်မှတ်ရေးထိုးခဲ့ ကြပြီး အခမ်းအနားကို မွန်းလွဲ ၁နာရီတွင် ရုပ်သိမ်းခဲ့ကြောင်း သတင်းရရှိပါသည်။
သတင်း/အရည်အသွေး