စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် တိုင်းပြည်၏ အနာဂတ်မျိုးဆက်သစ်များဖြစ်သော ကျောင်းသား/ကျောင်းသူများအား စားသုံးသူကာကွယ်ရေးဆိုင်ရာအသိပညာများ ကျယ်ကျယ်ပြန့်ပြန့်သိရှိနိုင်စေရေးရည်ရွယ်၍ ခရိုင်တွင်းမြို့နယ်များရှိ အခြေခံပညာကျောင်းများတွင် အသိပညာပေးဟောပြောဆွေးနွေးခြင်းများကို အင်တိုက်အားတိုက်လုပ်ဆောင်လျက်ရှိရာ ပန်းတောင်းမြို့နယ်၌ (၁၃-၆-၂၀၂၃) ရက်နေ့၊ နံနက်ပိုင်းတွင် မူလွန်(ကြခတ်) ကျောင်းနှင့် နေ့လယ်ပိုင်းတွင် မူလွန်(သူရဲဇီး)ကျောင်းတို့သို့လည်းကောင်း၊ ရွှေတောင်မြို့နယ်၌ (၁၃-၆-၂၀၂၃) ရက်နေ့၊ နံနက်ပိုင်းတွင် အ-လ-က (မယားမာန်)၊ နေ့လယ်ပိုင်းတွင် မူလွန်(အိုးထိန်းကုန်း)နှင့် (၁၄-၆-၂၀၂၃) ရက်နေ့၊ နေ့လယ်ပိုင်းတွင် အ-မ-က (လက်ခုတ်တန်း) ကျောင်းတို့သို့လည်းကောင်း၊ ပေါက်ခေါင်းမြို့နယ်၌ (၁၆-၆-၂၀၂၃) ရက်နေ့၊ နံနက်ပိုင်းတွင် အ-ထ-က (မြို့မ) ကျောင်းသို့လည်းကောင်း၊ ပြည်မြို့နယ်၌ (၂၀-၆-၂၀၂၃) ရက်နေ့၊ နံနက်ပိုင်းတွင် မူလွန်(မြတ်လေးရုံ)ကျောင်းသို့လည်းကောင်း၊ သက်ဆိုင်ရာမြို့နယ်တာဝန်ခံများနှင့် ဝန်ထမ်းများသည် မြို့နယ်ပူးပေါင်းမိတ်ဖက်ဌာနဆိုင်ရာများနှင့်အတူသွားရောက်၍ စားသုံးသူကာကွယ်ရေးဆိုင်ရာ အသိပညာပေးဟောပြောခြင်းများဆောင်ရွက်ခဲ့ပြီး စုစုပေါင်းကျောင်း (၇)ကျောင်းတွင် ကျောင်းသား/သူစုစုပေါင်း (၅၅၁) ဦးတက်ရောက်ခဲ့ပါသည်။
အဆိုပါ အသိပညာပေးဟောပြောခြင်းများဆောင်ရွက်ရာတွင် သက်ဆိုင်ရာမြို့နယ်တာဝန်ခံများက စားသုံးသူအခွင့်အရေးများနေ့ဖြစ်ပေါ်လာပုံ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဖော်ပြခြင်းဆိုင်ရာအချက်များ၊ နစ်နာဆုံးရှုံးမှုရှိပါက တိုင်ကြားနိုင်သည့်ပုဂ္ဂိုလ်များနှင့် နည်းလမ်းများ၊ တိုင်ကြားနိုင်မည့်ဖုန်းနံပါတ်နှင့်လိပ်စာ၊ စားသုံးသူကာကွယ်ရေးဥပဒေ ၂၀၁၉ပါ ပြစ်မှုပြစ်ဒဏ်များအကြောင်း၊ သက်ဆိုင်ရာဌာနများက စားသုံးရန်မသင့်ဟု တားမြစ်ထုတ်ပြန်ထားသောကုန်စည်များအား ရွေးချယ်ဝယ်ယူခြင်းမပြုရန် ကုန်အညွှန်းအမှတ်အသားပြည့်စုံစွာပါဝင်သော ကုန်စည်များကိုသာ ရွေးချယ်ဝယ်ယူကြရန် အသိပညာပေးဟောပြောခြင်းများဆောင်ရွက်ခဲ့ပြီးနောက် စားသုံးသူအသိပညာပေးဆိုင်ရာ လက်ကမ်းစာစောင်များလည်းဝေငှပေးခဲ့ကြောင်း သိရပါသည်။
DOCA(ပဲခူး)