စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ချောက်မြို့နယ်တာဝန်ခံ ဒေါ်မြတ်မြတ်မိုးနှင့် ဒေါ်ချိုဝေလွင်(ဒု-ဦးစီးမှူး)တို့သည် ချောက်မြို့နယ်အတွင်း ဖွင့်လှစ်ရောင်းချလျက်ရှိသည့် စက်သုံးဆီဆိုင်များအား (၂၃-၅-၂၀၂၃)ရက်နေ့၊ နံနက်(၁၀:၀၀)နာရီအချိန်တွင် သွားရောက်၍ သတ်မှတ်စျေးနှုန်းများအတိုင်း ရောင်းချမှုရှိ/မရှိနှင့် စက်သုံးဆီများလုံလောက်မှုရှိ/မရှိတို့ကို ကွင်းဆင်းစစ်ဆေးခဲ့ပါသည်။
ချောက်မြို့နယ်တာဝန်ခံနှင့် ဝန်ထမ်းများသည် စက်သုံးဆီအရောင်းဆိုင်များအား သတ်မှတ်ထားသောအခြေခံရည်ညွှန်းဈေးဖြင့် ရောင်းချရန်၊ ဈေးနှုန်းများကိုလည်း အများပြည်သူသိရှိအောင် LED Board များတွင် ဖော်ပြပေးရန်၊ နေ့စဉ်ရောင်းချနေသောဈေးနှုန်းများကိုလည်း ဖော်ပြပေးရန်၊ အခြင်အတွယ်မှန်ကန်မှုရှိစေရန်၊ စက်သုံးဆီများကို ပုံးများ၊ ပေပါအလိုက် ရောင်းချမည့်သူများကိုလည်း ရောင်းချခြင်းမပြုရန်နှင့် လုပ်ငန်းရှင်များအနေဖြင့် တရားမဝင်စက်ဆီ၊ ချောဆီများတင်သွင်းရောင်းချခြင်းမပြုစေရန်၊ ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်သွားရန်နှင့် စက်သုံးဆီပြတ်လပ်မှုမရှိစေရန်တို့ကို ရှင်းလင်းဆွေးနွေးခဲ့ပါသည်။ ချောက်မြို့နယ်အတွင်း စက်သုံးဆီဆိုင်(၁၅)ဆိုင်မှာ ပုံမှန်ဖွင့်လှစ်ရောင်းချလျက်ရှိကြပြီး ၂၀၂၃ခုနှစ်၊ မေလ (ဒုတိယပတ်)၌ စက်သုံးဆီစျေးနှုန်းများမှာ 92 (၁)လီတာလျှင် ကျပ်(၁၉၄၅)၊ 95 (၁)လီတာလျှင် ကျပ်(၂၀၃၅)၊ ဒီဇယ်(ရိုးရိုး)(၁)လီတာလျှင် ကျပ်(၁၈၉၅)၊ ဒီဇယ်(ပရီမီယမ်)(၁)လီတာလျှင် ကျပ်(၂၀၂၀)ဖြစ်ပြီး မေလ(တတိယပတ်)တွင် 92 (၁)လီတာလျှင် ကျပ်(၂၀၃၀)၊ 95(၁)လီတာလျှင် ကျပ်(၂၁၂၀)၊ ဒီဇယ်(ရိုးရိုး)(၁)လီတာလျှင် ကျပ်(၁၉၃၅)၊ ဒီဇယ်(ပရီမီယမ်)(၁)လီတာလျှင် ကျပ်(၂၀၁၅)ဖြစ်၍ ဒုတိယအပတ်နှင့် တတိယအပတ်တို့နှိုင်းယှဉ်ကြည့်ပါက 92(၁)လီတာလျှင် ကျပ်(၈၅)၊ 95(၁)လီတာလျှင် ကျပ်(၈၅)၊ ဒီဇယ်(ရိုးရိုး)(၁)လီတာလျှင် ကျပ်(၄၀)၊ ဒီဇယ်(ပရီမီယမ်)(၁)လီတာလျှင် (၅)ကျပ် စသည်ဖြင့် အသီးသီးစျေးနှုန်းများမြင့်တက်လာကြောင်း စက်သုံးဆီအရောင်းဆိုင်များမှ သိရှိရပါသည်။
DOCA(မကွေး)