စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်မှ ဝန်ထမ်းများသည် (၂၅-၅-၂၀၂၃)ရက်နေ့၊ နေ့လယ်(၁၆း၀၀)နာရီအချိန်တွင် တာဝန်ရှိ ဌာနဆိုင်ရာအဖွဲ့များနှင့်ပူးပေါင်း၍ မြို့ပေါ်ရှိ စက်သုံးဆီအရောင်းဆိုင်များဖြစ်ကြသော လရောင်စစ်၊ မြဧရာ၊ ကိုဘိုသန်း၊ အောင်ကောင်းဆက် စသည့် စက်သုံးဆီအရောင်းဆိုင်(၄)ဆိုင်အား သတ်မှတ်ရည်ညွှန်းဈေးများနှင့်အညီ ရောင်းချခြင်းရှိ/မရှိ တို့ကို ကွင်းဆင်းစစ်ဆေးခဲ့ပါသည်။
ထိုသို့ကွင်းဆင်းစစ်ဆေးရာတွင် စက်သုံးဆီတင်သွင်း/သိုလှောင်/ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ နေ့စဉ်ထုတ်ပြန်သော စက်သုံးဆီရည်ညွှန်းလက်ကားဈေးနှုန်းများအတိုင်း ရောင်းချခြင်းရှိ/မရှိ၊ အချိန်အတွယ်မှန်ကန်မှုရှိ/မရှိ၊ ဈေးနှုန်းများအား (LED)ဆိုင်းဘုတ်ဖြင့် ဖော်ပြ ထားခြင်းရှိ/မရှိနှင့် စက်သုံးဆီပြတ်လပ်မှုရှိ/မရှိတို့ကို စစ်ဆေးခဲ့ရာ စက်သုံးဆီအရောင်းဆိုင်များအနေဖြင့် သတ်မှတ်ရည်ညွှန်းဈေးများနှင့်အညီ ဖြန့်ဖြူးရောင်းချနေကြောင်း စစ်ဆေးတွေ့ရှိရပြီး သက်ဆိုင်ရာတာဝန်ရှိဌာနများမှလည်း စက်သုံးဆီဖြန့်ဖြူးရောင်းချရာတွင် တရားဝင်ခွင့်ပြုလိုင်စင်ညွှန်ကြားချက်များနှင့်အညီ ရောင်းချကြရန် ဆွေးနွေးမှာကြားခဲ့ပါသည်။
စားသုံးသူရေးရာဦးစီးဌာန၊ စလင်းမြို့နယ်တာဝန်ခံက စက်သုံးဆီဖြန့်ဖြူးရောင်းချသူများအား ဈေးနှုန်းများကို နေ့စဉ်ဆိုင်းဘုတ်များဖြင့် ဖော်ပြထားစေပြီး ပြည်သူများသိရှိမြင်သာသောနေရာတွင် ထားရှိရန် ဆွေးနွေးခဲ့ပါသည်။ လုပ်ငန်းရှင်များကလည်း သတ်မှတ်ထားသော စည်းကမ်းချက်များကို လိုက်နာဆောင်ရွက်လျက်ရှိကြောင်း၊ နေ့စဉ် စက်သုံးဆီအရောင်းစာရင်းများကိုလည်း စားသုံးသူရေးရာဦးစီးဌာန၊ မြို့နယ်ဦးစီးမှူးရုံးများသို့ အချိန်နှင့်တပြေးညီပေးပို့လျက်ရှိကြောင်း၊ စက်သုံးဆီပြတ်လပ်မှုမရှိပဲ ဆီဖြန့်ဖြူးရောင်းချမှုရပ်နားနေမှုများမရှိကြောင်း ဆိုင်တာဝန်ခံ၏ပြောကြားချက်အရ သိရှိရပါသည်။
DOCA(မကွေး)