တရုတ်ပြည်သူ့သမ္မတနိုင်ငံတွင် ယခင်က ပြောင်းစိုက်ဧရိယာ လျော့နည်းခဲ့သဖြင့် ယခုနှစ်တွင် ပြောင်းစိုက်ပျိုးသည့် အဓိကနယ်မြေများ၌ စိုက်ဧရိယာတိုးချဲ့ စိုက်ပျိုးသွားမည်ဖြစ်ကြောင်း စိုက်ပျိုးရေးဝန်ကြီးက ပြောကြားခဲ့ပါသည်။
ပြောင်းစိုက်ပျိုးဧရိယာ တိုးချဲ့စိုက်ပျိုးမှုမှာ တရုတ်နိုင်ငံ၏ စားနပ်ရိက္ခာဖူလုံရေး ဘက်စုံစီမံကိန်း ၏အစိတ်အပိုင်းတစ်ခုဖြစ်ကြောင်း စိုက်ပျိုးရေးနှင့်ကျေးလက်ရေးရာဝန်ကြီးဌာန၏ ဝန်ကြီးက နိုင်ငံပိုင် ရှင်ဟွာသတင်းဌာနတွင် ပြောကြားခဲ့ပါသည်။ ၂၀၂၀-၂၀၂၁ ခုနှစ်တွင် တရုတ်နိုင်ငံ၏ ပြောင်းစိုက်ပျိုးမှုအနေဖြင့် ဟက်တာ (၄၁ .၂၆၄) သန်း ရှိပြီး ပြောင်းထွက်ရှိမှုအခြေအနေမှာ- (၂၆၀.၆၇) သန်း ရှိခဲ့ကြောင်း နိုင်ငံတော်စာရင်းအင်းဗျူရို၏ ထုတ်ပြန်ချက်အရ သိရှိရပါသည်။
တရုတ်အစိုးရသည် ပြောင်းလက်ကျန်များကို လေလံစနစ်ဖြင့် ရောင်းချပြီးနောက်ပိုင်းတွင် ပြောင်းစျေးနှုန်းများ မြင့်တက်လာခဲ့ပါသည်။ ပြောင်းစျေးနှုန်းများ မြင့်တက်လာသည်နှင့်အမျှ အမြတ်အစွန်းနည်းပါးလာသော စက်မှုလုပ်ငန်းများ၏ ပြောင်းသုံးစွဲမှုမှာ ပျမ်းမျှ တန်ချိန် (၈၂) သန်း ခန့် လျော့ကျလာနိုင်ကြောင်း ခန့်မှန်းထားကြပါသည်။ တရုတ်သွင်းကုန်လုပ်ငန်းများသည် ပြည်တွင်း၌ ပြောင်းပြတ်လပ်မှု မရှိစေရေးအတွက် ပြည်ပမှ ပြောင်းများကို တင်သွင်းလျက်ရှိနေပါသည်။
၂၀၂၀-၂၀၂၁ ခုနှစ်အတွင်း၌ ပြည်ပမှ ပြောင်းတန်ချိန် (၁၀) သန်းအထိ တင်သွင်းရမည့် အလားအလာရှိပြီး ယခင်ခန့်မှန်းချက်ဖြစ်သည့် တန်ချိန် (၇) သိန်းထက် ပိုမိုများပြားလာနိုင်ကြောင်း၊ လာမည့် (၁၀) နှစ်တာကာလအတွင်း၌ အစိုးရသည် စက်မှုလယ်ယာကဏ္ဍကို နှစ်ဆတိုးမြှင့်နိုင်ရေးအတွက် ဦးတည်ဆောင်ရွက်သွားမည်ဖြစ်ကြောင်း၊ လယ်ယာစိုက်ပျိုးမြေနည်းပါးသော တောင်သူများ၏ဝင်ငွေတိုးလာစေရန် တောင်သူများအား အဆင့်မြင့်စိုက်ပျိုးရေး စက်ကိရိယာပစ္စည်းများ ထောက်ပံ့ပေးနိုင်ရေး အလေးထားဆောင်ရွက်သွားမည်ဖြစ်ကြောင်း၊ တရုတ်နိုင်ငံသည် ပိုမိုကောင်းမွန်သည့် သီးနှံမျိုးစေ့များ အသုံးပြုရေးနှင့် စိုက်ပျိုးနိုင်သော လယ်ယာမြေများ ကာကွယ်ရေးကို အလေးထား ဆောင်ရွက်ကာ ပြည်တွင်းကောက်ပဲသီးနှံများ ဖူလုံမှုကို မြှင့်တင်သွားမည်ဖြစ်ကြောင်း စိုက်ပျိုးရေးနှင့်ကျေးလက်ရေးရာဝန်ကြီးဌာန၏ ဝန်ကြီးက ပြောကြားခဲ့ပါသည်။
Source- Reuters
ဘာသာပြန် - ဒေါ်ထူးမြတ်အိ