ပြည်တွင်းကုန်သွယ်မှုသတင်း

       အရောင်အသွေး၊ အနံ့၊ အရသာနှင့်ပြည့်စုံသော စပျစ်သီးသည် ယခုနွေရာသီတွင် ကျန်းမာရေးနှင့်ညီညွတ်သော အသီးအနှံတစ်မျိုးဖြစ်သည်။ စပျစ်သီးတွင် ကယ်လိုရီ၊ ကာဗိုဟိုက်ဒရိတ်၊ ပရိုတင်း၊ အဆီ၊ အမျှင်ဓာတ်၊ ဗီတာမင် C၊ ဗီတာမင် K၊ သီရာမင်း၊ ဗီတာမင် BG၊ ပိုတက်ဆီယမ်၊ ကော့ပိုး၊ မဂ္ဂနီဆီယမ် စသည့် အာဟာရ (၁၃) မျိုးပါဝင်သည်။

   စပျစ်သီးစားသုံးခြင်းဖြင့် နှလုံးကိုကျန်းမာစေခြင်း၊ သွေးပေါင်ကျစေခြင်း၊ ဝမ်းမှန်စေခြင်း၊ ဓာတ်မတည့်မှုကိုသက်သာစေခြင်း၊ မျက်လုံးကိုကျန်းမာစေခြင်း စသည့်ကျန်းမာရေးများကို အထောက်အကူပြုစေပါသည်။

        ၂၀၂၄ခုနှစ်၊ မေလ ပထမအပတ်၌ စပျစ်သီးတစ်ပိဿာလျှင် (၁၀၀၀၀) ကျပ်နှုန်းဖြင့် ရောင်းချပေးလျက်ရှိကြောင်း တောင်ငူမြို့ရှိ သစ်သီးဆိုင်များမှ စုံစမ်းသိရှိခဲ့ရပါသည်။

DOCA(ပဲခူး)

      တောင်ငူမြို့၊ ညောင်ပင်ဈေးတွင် ရာသီပေါ် ဟင်းသီးဟင်းရွက်များ လာရောက်ရောင်းချလျက်ရှိရာ စရစ်ရိုးများမှာ ပေါ်ခါစ၌ တစ်စည်းလျှင် ၃၀၀ကျပ်၊ (၄)စည်းယူလျှင် ၁၀၀၀ကျပ်ပေးရပြီး ၂၀၂၄ခုနှစ်၊ မေလအစပိုင်းတွင် ရောင်းချသောဈေးနှုန်းအနေဖြင့် တစ်စည်းလျှင် ၂၅၀ကျပ်၊ (၄)စည်းယူလျှင် (၁၀၀၀)ကျပ်ဖြင့် ဈေးနှုန်းအနည်းငယ်ကျဆင်းလာခဲ့ပါသည်။

      ပဒပ်စာမှာ ပေါ်ခါစတွင် တစ်စည်းလျှင် ၂၅၀ကျပ်၊ (၅)စည်းယူလျှင် ၁၀၀၀ကျပ်ပေးရပြီး မေလ ပထမပတ်တွင် တစ်စည်းလျှင် ၂၀၀ကျပ်၊ (၁၀)စည်းယူလျှင် ၁၅၀၀ကျပ်ဖြင့် ဈေးနှုန်း အနည်းငယ်ကျဆင်းလာခဲ့ပါသည်။      

        နွေရာသီတွင် လူအများအကြိုက် အချဉ်ဟင်းချက်စားကြသည့် မန်ကျည်းရွက်မှာ မေလ ပထမပတ်တွင်ရောင်းချသော ဈေးနှုန်းအရ  ၁၀ကျပ်သားလျှင် ၁၀၀၀ကျပ်၊ ဥသျှစ်ရွက်မှာလည်း ၁၀ကျပ်သားလျှင် ၁၀၀၀ကျပ်ရှိကြောင်းနှင့် ရာသီပေါ်ဟင်းသီးဟင်းရွက်များမှာ ရောင်းရလျက်ရှိကြောင်း ဟင်းသီးဟင်းရွက်ရောင်းချသူများထံမှသိရှိရပါသည်။

DOCA(ပဲခူး)

       ပဲခူးတိုင်းဒေသကြီးအစိုးရအဖွဲ့၊ ဝန်ကြီးချုပ်၏ ဦးဆောင်မှုဖြင့် ပဲခူးတိုင်းဒေသကြီးအတွင်းရှိ အသေးစား၊ အငယ်စားနှင့် အလတ်စား MSMEs စီးပွားရေးလုပ်ငန်းများ ပိုမိုဖွံ့ဖြိုးတိုးတက်စေရေး၊ ပြည်တွင်းပြည်ပဈေးကွက်ရရှိရေးတို့ကိုရည်ရွယ်၍ ၂၀၂၄ခုနှစ်၊ မေလ (၁) ရက်နေ့တွင်ကျရောက်သည့် ကမ္ဘာ့အလုပ်သမားနေ့ (Mayday) အထိမ်းအမှတ်အနေဖြင့် MSMEs ဈေးရောင်းပွဲတော်ကို ၂၀၂၄ခုနှစ်၊ ဧပြီလ ၃၀ရက်နေ့မှ မေလ ၂ရက်နေ့ထိ ပဲခူးတိုင်းဒေသကြီး၊ ပဲခူးခရိုင်၊ တောင်ငူခရိုင်၊ ပြည်ခရိုင်၊ သာယာဝတီခရိုင်၊ နတ်တလင်းခရိုင်၊ ညောင်လေးပင်ခရိုင်၊ (၆) ခရိုင်ရှိ MSMEs လုပ်ငန်းများမှ ထုတ်လုပ်ဖြန့်ဖြူးရောင်းချလျက်ရှိသော ဒေသထုတ်ကုန်နှင့် ဒေသထွက်အစားအစာများကို ပဲခူးမြို့၊ ရွှေမော်ဓောဘုရားလမ်း၊ ရှင်စောပုရပ်ကွက်၊ ၃၃လမ်းတွင် ဆိုင်ခန်းပေါင်း (၁၁၀) ဖြင့် လုပ်ငန်းအမျိုးအစား (၁၀၀၀)ကျော်အား သတ်မှတ်မူရင်းဈေးနှုန်းများဖြင့် ခင်းကျင်းပြသရောင်းချလျက်ရှိကြောင်း သတင်းရရှိပါသည်။

DOCA(ပဲခူး)

      ရှမ်းပြည်နယ်မှထွက်ရှိသော ဖယောင်းပန်း(ခေါ်)ပင်းတယရွှေဝါများသည် ပင်းတယ၊ ကလော ဒေသထွက်ရိုးရာပန်းတစ်မျိုးဖြစ်ပါသည်။ ဖယောင်းပန်းများသည် အရောင် ၊အဆင်း ၊အနံ့ပြည့်စုံခြင်းကြောင့် ဘုရားပန်းအဖြစ် ကပ်လှူကြပြီး  ရှမ်းပြည်နယ်တောင်ပိုင်း ပန်းဈေးကွက်တွင် ဝယ်လိုအား များပြားနေလျက်ရှိပါသည်။ အဆိုပါ ဖယောင်းပန်းများသည် ယခင်ဧပြီလအတွင်းမှ စတင်ထွက်ရှိလာ ခဲ့ပြီး ယခုမေလအတွင်းတွင် ဈေးကွက်အတွင်း၌ ရောင်းချသူများ အများအပြားရှိနေပါပြီဖြစ်ပါသည်။ ယင်းဖယောင်းသစ်ခွများသည် တစ်ဖူးထိုး/ နှစ်ဖူးထိုးဟူ၍ အမျိုးအစား(၂)မျိုးရှိပြီး ဖယောင်းသစ်ခွ တစ်ဖူးထိုးဈေးနှုန်း အနေဖြင့် ၁၀ပင် တစ်စီးလျှင် ၃၀၀၀ကျပ်မှ ၄၀၀၀ကျပ်အတွင်း ပေါက်ဈေးရှိပြီး နှစ်ဖူးထိုး ၁၀ပင် တစ်စီး လျှင် ၄၅၀၀ကျပ်မှ ၆၀၀၀ကျပ်အတွင်း ပေါက်ဈေးရှိကြောင်း သတင်းရရှိ ပါသည်။

DOCA(ရှမ်း)

      မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့၊ ကြက်သွန်နီကုန်စည်ဒိုင်သို့ ကြက်သွန်နီစိုက်ပျိုးရာဒေသများဖြစ်ကြသော ပေါက်၊ ဆိပ်ဖြူ၊ ရေပြာ၊ ကမ္မ၊ ရေစကြိုနှင့် ပခုက္ကူကျွန်းများမှ ဆောင်းစိုက်ပင်စိုက်များ အရောင်းအဝယ်ဖြစ်လျက်ရှိသည့်အပြင် အခြားဒေသများဖြစ်သော ပုလဲ၊ မြင်းခြံမြို့၊ တောင်သာမြို့နယ်၊ ညောင်ဦးမှ ဆောင်းစိုက် (ပင်စိုက်) ကြက်သွန်နီများအပြင် ကြက်သွန်ဖြူ များလည်း ဝင်ရောက်အရောင်းအဝယ်ဖြစ်လျက်ရှိကြောင်းသိရှိရပါသည်။

      ပခုက္ကူကြက်သွန်နီကုန်စည်ဒိုင်၌ ၂၀၂၄ခုနှစ်၊ မေလ (ပထမပတ်) တွင် ဖြစ်ပေါ်နေသော ကြက်သွန်နီဈေးမှာ ပေါက်နယ် (ယောစ) ထိပ်စတစ်ပိဿာလျှင် ကျပ် (၂၁၀၀)၊ အလတ်စတစ်ပိဿာလျှင် ကျပ် (၁၉၀၀)၊ အနိမ့်စတစ်ပိဿာလျှင် ကျပ် (၁၇၀၀)၊ ပုလဲကြက်သွန်နီ ထိပ်စတစ်ပိဿာလျှင် ကျပ် (၂၃၀၀)၊  အလတ်စတစ်ပိဿာလျှင် ကျပ် (၂၁၀၀)၊ အနိမ့်စတစ်ပိဿာလျှင် ကျပ် (၁၅၀၀) ဖြင့် နေ့စဉ် ကုန်ချိန် (၅၀၀၀၀မှ ၁၅၀၀၀၀)ကျော်ထိအရောင်းအဝယ်ဖြစ်နေပြီး ပခုက္ကူမြို့မစည်ပင်သာယာဈေးတွင် ရောင်းချနေသော ကြက်သွန်နီလက်လီဈေးမှာ ထိပ်စတစ်ပိဿာလျှင် ကျပ် (၂၆၀၀)၊ အလတ်စတစ်ပိဿာလျှင် ကျပ် (၂၄၀၀)၊ အနိမ့်စတစ်ပိဿာလျှင် ကျပ် (၂၀၀၀မှ ၁၆၀၀) ဈေးနှုန်းတို့ဖြင့် ရောင်းချနေကြောင်း မြို့မဈေးသည်များထံမှသိရှိရပါသည်။ တင်ပို့မှုအနေဖြင့် ရန်ကုန်ဘုရင့်နောင်၊ မြဝတီ၊ ဟင်္သာတမြို့များသို့လည်းတင်ပို့နေကြောင်း ကုန်သည်များထံမှသိရှိရပါသည်။    

DOCA(မကွေး)