ပြည်တွင်းကုန်သွယ်မှုသတင်း

  ငါးမုတ်နှင့်ငါးကြင်းသည် မြန်မာနိုင်ငံ၏‌ရေချိုဒေသများမှ အဓိကထွက်ရှိပြီး ရန်ကုန်တိုင်း၊ စစ်ကိုင်းတိုင်း၊ မန္တလေးတိုင်း၊ တနင်္သာရီတိုင်း၊ ဧရာဝတီတိုင်းနှင့် မွန်ပြည်နယ်တို့မှ အများဆုံး ထွက်ရှိပါသည်။ ငါးမုတ်သည် ရေငန် ရေချိုနှစ်ခုလုံးတွင် ပေါက်ဖွားပြီး ငါးကြင်းသည် ရေချိုတွင်သာ ပေါက်ဖွားပါသည်။ ငါးမုတ်သည် အသားပျော့ အဆီဓာတ်များသောကြောင့် ကင်ခြင်း၊ ပေါင်းခြင်း၊ ငါးခြောက်၊ ငါးပိ၊ ငါးဖယ်ချဉ်စသည်ဖြင့် ပြုလုပ်စားသုံးကြပြီး ငါးကြင်းသည် အသားမာပြီး ချိုသော အရသာရှိသောကြောင့် ကြော်ချက်ခြင်း၊ ပြုတ်ခြင်း၊ မုန့်ဟင်းခါးချက်စားခြင်းဖြင့် အမျိုးမျိုး စားသုံးကြ ပါသည်။

  တောင်ငူမြို့နယ်၊ ညောင်ပင်လေးဈေးထဲတွင် ယခုဩဂုတ်လ (ဒုတိယပတ်)၌ ငါးမုတ် နှင့်ငါးကြင်း ဈေးနှုန်းများ မြင့်တက်လျက်ရှိရာ ယခင်ဇူလိုင်လထက် အနည်းငယ်မြင့် တက်သွားခဲ့ ပါသည်။ ဇူလိုင်လက ငါးမုတ် အကောင်ကြီးတစ်ပိဿာလျှင် ၉၅၀၀ ကျပ်၊ ယခုဩဂုတ်လ (ဒုတိယပတ်)တွင် ၁၀၅၀၀ ကျပ်ထိ အနည်းငယ် မြင့်တက်သွားပြီး၊ ငါးကြင်း ၁ပိဿာလျှင် ယခင်ဇူလိုင်လက ၁၂၀၀၀ ကျပ်၊ ယခုဩဂုတ်လ (ဒုတိယပတ်)တွင် ၁၃၀၀၀ ကျပ်ထိ ဈေးနှုန်းအနည်းငယ်မြင့်တက်သွားကြောင်း သိရသည်။

DOCA(ပဲခူး)

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ပန်းဈေးကွက်၌ နှင်းဆီပန်း၊ နှင်းပန်း၊ ဂန္ဓမာပန်း၊ သပြေပန်း၊ အာစီယံသပြေ၊ စံပါယ်ပန်း၊ ဇွန်ပန်း၊ ပန်းထိမ်ငိုပန်းစသည့် ပန်းမျိုးစုံရောင်းချ လျက်ရှိကြောင်း၊ ဒေသခံပြည်သူများကလည်း ဘုရားပန်းကပ်လှူရန်၊ ပန်းအလှဆင်ရန်နှင့် အလှပန်ဆင် ရန် နေ့စဉ်ဝယ်ယူအသုံးပြုလျက်ရှိကြောင်း သိရသည်။

    ကန့်ဘလူမြို့ပန်းဈေးကွက်၌ ၂၀၂၅ ခုနှစ်၊ ဩဂုတ်လ ဒုတိယပတ်အတွင်း ဖြစ်ပေါ်နေသော ပန်းဈေးနှုန်းများအနေဖြင့် နှင်းပန်းတစ်စီးလျှင်(၇၀၀)ကျပ်နှင့် (၃)စီးလျှင်(၂၀၀၀)ကျပ်ဖြင့်လည်းကောင်း ၊ပန်းထိမ်ငိုပန်း(၁)စီးလျှင် (၇၀၀)ကျပ်၊ (၃)စီးလျှင်(၂၀၀၀)၊ (၁၀)စီးလျှင် (၆၇၀၀)ကျပ်တို့ဖြင့် အရောင်း အဝယ်ဖြစ်လျက်ရှိကြောင်း၊ ပန်းထိမ်ငိုပန်းသည် တာရှည်အထားခံသည့်အပြင် လှပသည့်အသွင်သဏ္ဍာန် ကြောင့် လူကြိုက်များကာ အရောင်းသွက်လျှက်ရှိကြောင်း ပန်းရောင်းချသူများထံမှ သိရှိရပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး ကန့်ဘလူခရိုင် ကန့်ဘလူမြို့သစ်သီးဈေးကွက်သို့ မြစ်ကြီးနားဒေသ ထွက်နာနတ်သီးများနှင့် မန္တလေးသစ်သီးဈေးကွက်မှ နာနတ်သီးများ ဝင်ရောက်လျက်ရှိကြောင်း ယခုပတ်အတွင်း နာနတ်သီးဝင်ရောက်မှု များသောကြောင့် ဈေးအနည်းငယ်ကျသွားကြောင်း သစ်သီး ရောင်းဝယ်ရေး လုပ်ငန်းရှင်များထံမှ သိရသည်။ ကန့်ဘလူသစ်သီးဈေးကွက်တွင် ၂၀၂၅ ခုနှစ်၊ ဩဂုတ်လ ဒုတိယပတ်အတွင်း မန္တလေးနာနတ် သီး(၁)လုံးလျှင် (၃၀၀၀မှ ၄၀၀၀)ကျပ်၊ ဩဂုတ်လ ဒုတိယပတ်အတွင်း မြစ်ကြီးနားသီး(၁)လုံးလျှင် (၄၅၀၀မှ ၅၀၀၀)ကျပ်တို့ဖြင့် ရောင်းချလျက်ရှိ ကြောင်း၊ နာနတ်သီးသည် ရာသီပေါ်အသီးတစ်မျိုး ဖြစ်သည့်အတွက် ဝယ်ယူစားသုံးသူများပြား၍ နာနတ်သီးများ အရောင်းသွက်လျက်ရှိကြောင်း သိရပါသည်။

DOCA(စစ်ကိုင်း)

  ပဲခူးတိုင်းဒေသကြီးအရှေ့ ဒေသထွက် စားသောက်ကုန် တစ်မျိုးဖြစ်သည့် နေဝင်းအောင် ပဲကြော် နှင့် ပဲကြီးလှော် လုပ်ငန်းသည် တောင်ငူဒေသထွက် စားသောက်ကုန်တစ်မျိုးဖြစ်ပါသည်။ နေဝင်းအောင် တံဆိပ်ပါ ပဲကြော်နှင့် ပဲကြီးလှော်များသည် ထုပ်ပိုးမှုအဆင့်အတန်းမှီသည့်အပြင် အရသာမှာလည်း အလွန်ကောင်းမွန်၍ ဈေးနှုန်းလည်းသင့်တင့်သည့်အတွက် လူမျိုးဘာသာမရွေး စားသုံးနိုင်သည်။

    ပဲမျိုးစုံသည် ပရိုတင်းဓာတ်ရရှိစေသော အစားအစာတစ်မျိုးဖြစ်ပါသည်။သတ်သတ်လွတ် စားသုံးသူများအနေဖြင့် ပဲများစားသုံးပေးခြင်းဖြင့် အသားဓါတ်အပြည့်အဝ ရရှိစေနိုင်သည်ဟု လေ့လာ သိရှိရသည်။ ပဲများမှာ အမျှင်ဓာတ် ကြွယ်ဝစွာ ပါဝင်သောကြောင့် အူမကြီးကို ကျန်းမာစေနိုင်၍ ဝမ်းမှန်စေနိုင်သည်။

    ပဲများဈေးနှုန်းအနေဖြင့် ပဲကြီးလှော် ၂၅ ကျပ်သား တစ်ထုပ်လျှင် ၂၂၀၀ကျပ်၊ ကုလားပဲလုံးကြော် ၂၅ ကျပ်သားလျှင် ၃၀၀၀ ကျပ် နှင့် နှစ်ပြန်ကြော် ၂၅ ကျပ်သားလျှင် ၃၀၀၀ ကျပ်နှုန်းဖြင့် လက်လီ/လက်ကား ရောင်းချလျက်ရှိပြီး အသင့်စားဂျင်း ၁၀ ကျပ်သားလျှင် ၇၀၀ကျပ်၊ အသင့်စား လ္ဘက်မျိုးစုံကိုလည်း လက်လီ/လက်ကား ဝယ်ယူရရှိနိုင်ပါသည်။

DOCA(ပဲခူး)

       စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့မဈေးတွင် ဒေသထွက်အစားအစာများ၊ ဒေသထွက်အသီးအနှံများနှင့် အခြားဒေသမှဝင်ရောက်လာသည့် အရန်သင့်အစားအစာများရောင်းချ လျှက်ရှိရာ မိသားစုစားဝတ်နေရေးအတွက် အပိုဝင်ငွေရရှိရန်အတွက် ကုလားပဲကို အမှုန့်ကြိတ်၍ တို့ဟူးစိမ်းနှင့် တို့ဟူးခြောက်များပြုလုပ်ပြီး ကန့်ဘလူမြို့မဈေးတွင် နေ့စဉ်ရောင်းချလျှက်ရှိကြောင်း၊ သိရသည်။

    ကန့်ဘလူမြို့ “မြို့မဈေး”တွင် ဩဂုတ်လ ဒုတိယပတ်အတွင်းဖြစ်ပေါ်နေသော တို့ဟူးစိမ်း ဈေးနှုန်းများမှာ တို့ဟူးစိမ်းလက်လီ(၁)ပိဿာလျှင် (၂၅၀၀)ကျပ်၊ လက်ကား(၁)ပိဿာလျှင် (၂၄၀၀)ကျပ်၊ (၁၀)ကျပ်သားလျှင်(၂၅၀)ကျပ်တို့ဖြင့် ရောင်းချလျက်ရှိကြောင်း၊ တို့ဟူးစိမ်းကို တို့ဟူးသုတ် နှင့် တို့ဟူးပျော့တို့ ပြုလုပ်ရောင်းချကြောင်း၊ တို့ဟူးခြောက်(၁)ထုပ်လျှင် (၁၀၀၀)ကျပ်ဖြင့် အရောင်း အဝယ်ဖြစ်လျက်ရှိကြောင်း ကန့်ဘလူမြို့မဈေးရှိ တို့ဟူးစိမ်းနှင့် တို့ဟူးခြောက်ရောင်းချသည့် ဈေးသည် များထံမှ သတင်းရရှိပါသည်။

DOCA(စစ်ကိုင်း)