ပြည်တွင်းကုန်သွယ်မှုသတင်း

          မြင်းခြံမြို့မှာ ရောင်းချလျက်ရှိသော မုန့်တီ၊ မုန့်ဟင်းခါး၊ နန်းကြီးသုပ်၊ ခေါက်ဆွဲသုပ်၊ ရွှေတောင်ခေါက်ဆွဲ၊ အုန်းနို့ခေါက်ဆွဲ၊ နို့စိမ်းခေါက်ဆွဲတွေမှာ မပါမဖြစ် နေရာယူထားသည့် အရသာ ဆိမ့်ဆိမ့် ကြွပ်ကြွပ်ရွရွ ပါဝင်ပစ္စည်းတစ်မျိုးမှာ မုန့်ကြွပ်ကြော်ဖြစ်သည်။ မုန့်ကြွပ်ကြော်ကို နံနက်ခင်း နှင့်ညနေခင်းတို့တွင်ရောင်းချသည့် မြင်းခြံမြို့ရှိ မုန့်တီ၊မုန့်ဟင်းခါး၊ ခေါက်ဆွဲဆိုင်များမှ အများအပြား လာရောက်ဝယ်ယူကြကြောင်း သိရှိရသည်။

          မုန့်ကြွပ်ကြော်လုပ်ငန်းလုပ်ကိုင်ရာတွင် ခေါက်ဆွဲအစိုကို ဂျုံမှုန့်အနည်းငယ်ဖြူးကာ ဆီဒယ်အိုးထဲသို့ မြုတ်အောင်နှစ်ပြီးကြော်ရပါသည်။ ခေါက်ဆွဲတစ်ပိဿာကြော်လျှင် မုန့်ကြွပ် ကြော်(၂) ပိဿာ ရရှိပြီး တစ်ရက်လျှင်ခေါက်ဆွဲအစို(၁၃)ပိဿာမှ မု့န်ကြွပ်ကြော်(၂၆)ပိဿာ ထုတ်လုပ်ရရှိ ကြောင်းသိရသည်။ ပုံမှန်အားဖြင့် (၂)ရက်လျှင်တစ်ကြိမ်လုပ်ငန်းလုပ်ကိုင် လျက်ရှိပြီး အလှူပွဲ၊ မင်္ဂလာပွဲ၊ မွေးနေ့ပွဲ၊ အခြားအထိမ်းအမှတ်ပွဲများ ကျင်းပကြသည့် နေ့ရက်များနှင့် အော်ဒါမှာယူမှု ရှိသည့်နေ့ရက်များတွင် လာရောက်ဝယ်ယူမှုများပြားသဖြင့် မုန့်ကြွပ်ကြော်လုပ်ငန်းကို နေ့စဉ် လုပ်ကိုင်ဆောင်ရွက်ရကြောင်းသိရှိရသည်။ ရောင်းချရာတွင် (၅)ကျပ်သား၊ (၂၅)ကျပ်သား၊ (၅၀) ကျပ်သားနှင့် တစ်ပိဿာထုပ်များ ထုပ်ပိုးရောင်းချလျက်ရှိပြီး ဈေးနှုန်းအနေဖြင့် တစ်ပိဿာလျှင် (၂၀၀၀၀)ကျပ်နှုန်းဖြင့် ရောင်းဝယ်လျက်ရှိကြောင်း၊ အခြားမြို့များသို့ တင်ပို့ရောင်းချခြင်းမရှိဘဲ မြင်းခြံမြို့အတွင်းမှသာ လာရောက်ဝယ်ယူလျက် ရှိကြောင်း မုန့်ကြွပ်ကြော်လုပ်ငန်း လုပ်ကိုင်လျက်ရှိသည့် လုပ်ငန်းရှင်တစ်ဦး၏ ပြောကြားချက် အရ သိရှိရသည်။

          ထို့အပြင် မြင်းခြံမြို့၌သာ မှာယူရရှိစားသုံးနိုင်သည့် ထူးထူးခြားခြား စားဖွယ် တစ်ခုဖြစ်သော “ပလာတာသုပ်”တွင်လည်း မုန့်ကြွပ်ကြော်သည် မပါမဖြစ် တွဲဖက်စားသုံး လေ့ရှိသည့် ပါဝင်ပစ္စည်း တစ်မျိုးဖြစ်ပေသည်။ နံနက်စာ၊ ညနေစာ စားသုံးလေ့ရှိကြသည့် အစားအစာများတွင် မုန့်ကြွပ်ကြော် သည် စားသုံးသူများအကြိုက် နေရာယူလျက်ရှိပြီး MSMEမုန့်ကြွပ်ကြော်လုပ်ငန်း လုပ်ကိုင်လျက်ရှိသည့် MSMEလုပ်ငန်းရှင်များအနေဖြင့် စီးပွားရေးအဆင်ပြေလျက်ရှိကြောင်း သိရှိရသည်။

DOCA(မန္တလေး)

မန္တလေးတိုင်းဒေသကြီး၊မိတ္ထီလာခရိုင်တွင် စားဖိုဆောင်သီးနှံ (မိုး)ကြက်သွန်နီ ကို မလှိုင် မြို့နယ်တွင် (၇၆၇)ဧက ၊ ဝမ်းတွင်းမြို့နယ်တွင် (၂၁၂၀)ဧက စုစုပေါင်း (၂၈၈၇)ဧက စိုက်ပျိုးထား ကြောင်း စိုက်ပျိုးရေးစာရင်းများအရ သိရပါသည်။

ကြက်သွန်နီ(မိုး)ကို ဩဂုတ် ၊ စက်တင်ဘာလတွင် စတင်စိုက်ပျိုးခဲ့ပြီး နိုဝင်ဘာလမှစ၍ စတင်ထွက်ရှိကြောင်း၊ကြက်သွန်နီစိုက်ပျိုးရာတွင် မြေပြုပြင်ခ၊ မျိုး၊ သွင်းအားစု၊ လုပ်သားခ အပါအဝင် တစ်ဧကစုစုပေါင်း(၂၇)သိန်းကျော်ကုန်ကျကြောင်း၊ တစ်ဧကအထွက်နှုန်း အနေဖြင့် ပိဿာ (၂၀၀၀) ကျော်ထွက်ရှိကြောင်းသိရပါသည်။ မိတ္ထီလာဈေးကွက်အတွင်းသို့ ဇန်နဝါရီလ လယ်ပိုင်းတွင် မလှိုင် ၊ ဝမ်းတွင်း မြို့နယ်များမှ တစ်ရက် လျှင်ပျှမ်းမျှအဝင်ပိဿာ (၂၀၀၀၀) ကျော်နေ့စဉ် ဝင်ရောက်လျှက်ရှိပြီး မိတ္ထီလာဈေးကွက်မှ နေ၍ ရန်ကုန် ၊ ပဲခူး ၊ မော်လမြိုင် ၊ မြဝတီ ၊ တာချီလိတ်မြို့များသို့ တင်ပို့လျှက်ရှိကြောင်းသိရပါသည်။ ယခု ရက်ပိုင်းတွင် တရုတ်နှစ်ကူးနီး၍ ပြည်ပ ဝယ်လက်အေး ခြင်းကြောင့် ပြည်တွင်း ဈေးကွက်ဖြစ်သည့် ရန်ကုန် ၊ ပဲခူး ၊ မော်လမြိုင်မြို့၊တောင်ကြီးမြို့များသို့ တစ်ရက် ကုန်ချိန် ပိဿာ (၂၀၀၀၀)ကျော် တင်ပို့လျက်ရှိကြောင်း သိရပါသည်။

မိတ္ထီလာမြို့ဈေးကွက်တွင် ကြက်သွန်နီဈေးနှုန်းအနေဖြင့် လက်ကားဈေး တစ်ပိဿာလျှင် (၂၃၀၀/၂၅၀၀) ကျပ်ဈေးရှိကြောင်း၊ လက်လီဈေးနှုန်းအနေဖြင့်တစ်ပိဿာလျှင် (၂၅၀၀/၃၅၀၀) ကျပ် ရှိကြောင်း ဈေးကွက်မှစုံစမ်းသိရှိရပါသည်။

DOCA(မန္တလေး)

မန္တလေးတိုင်းဒေသကြီး၊မိတ္ထီလာခရိုင်တွင် ပဲမျိုးစုံသီးနှံ မြို့နယ်အလိုက် စိုက်ပျိုးကြပြီး ပြည်ပ ပို့ကုန်တစ်မျိုးဖြစ်သည့် ပဲစိမ်းငုံ သီးနှံကို သီးသန့်စိုက်ပျိုးခြင်း၊ နှမ်းသီးနှံနှင့်လည်း သီးညှပ် အဖြစ် ရွှေဒင်္ဂါး မျိုးများကို အများဆုံး စိုက်ပျိုးကြပါသည်။

ပဲစိမ်းငုံကို မေလနှင့်ဇွန်လများတွင်စိုက်ပျိုးကြပြီး ၂၀၂၄-၂၀၂၅ ခုနှစ်တွင် မိတ္ထီလာ မြို့နယ်၌ ပဲစိမ်းငုံစိုက်ဧက (၃၆၃၄၆)ဧက၊ မလှိုင်မြို့နယ်တွင်(၆၉၅၀၄)ဧက၊ သာစည်မြို့နယ်တွင် (၂၁၅၆)ဧက၊ ဝမ်းတွင်းမြို့နယ်တွင်( ၆၅၇) ဧက စုစုပေါင်း (၁၀၈၆၆၃)ဧကစိုက်ပျိုးထားကြောင်း စိုက်ပျိုးရေးဦီးစီးဌာနစာရင်း အရသိရပါသည်။ ပဲစိမ်းငုံ စိုက်ပျိုးမှု ကုန်ကျစရိတ်အနေဖြင့်   မြေပြု ပြင်ခြင်း၊ မျိုးစေ့၊ သွင်းအားစု၊ လုပ်သားခအပါအဝင် တစ်ဧက စုစုပေါင်း (၂၈၀၀၀၀) ကျော် ကုန်ကျစရိတ်ရှိကြောင်း သိရှိရပါသည်။

မိတ္ထီလာခရိုင်တွင် ဇန်နဝါရီလဆန်းပိုင်းမှစ၍ ပဲစဉ်းငုံသစ်များစတင်ထွက်ပေါ်လာပြီး တောင်သူ များမှ မြို့ပေါ်ရှိ ပွဲရုံများသို့ တိုက်ရိုက်ရောင်းချကြကြောင်း၊ ယခု ဇန်နဝါရီလ လတွင် မြို့ပေါ်ရှိပွဲရုံများ၌ မိတ္ထီလာ၊မလှိုင်၊သာစည်မြို့နယ်များမှ ပဲစိမ်းငုံသစ်များ တစ်ရက်လျှင် (၃၀)ပိဿာဝင်အိတ် (၁၀၀)မှ (၅၀၀)အထိ အဝင်ရှိပြီး ဇန်နဝါရီလကုန်ပိုင်းတွင်းဈေးကွက် အတွင်း လှိုင်လှိုင်ဝင်လာနိုင်ပြီး၊ လက်ရှိ ပွဲရုံဈေး ပဲစိမ်းငုံတစ်တင်းလျှင် (၉၀၀၀၀)ကျပ်ဈေးဖြင့် အရောင်း အဝယ်ဖြစ်လျက်ရှိကြောင်း၊ မြို့ပေါ်ပွဲရုံ များမှရန်ကုန်မြို့သို့အဓိကတင်ပို့ ရောင်းချကြ ကြောင်း သိရှိရပါသည်။

DOCA(မန္တလေး)

မြင်းခြံခရိုင်အတွင်းရှိ ဓာတ်မြေဩဇာအရောင်းဆိုင်များသို့ စားသုံးသူရေးရာဦးစီးဌာန၊ မြို့နယ်စည်ပင်သာယာရေးအဖွဲ့တို့ပါဝင်သော ပူးပေါင်းအဖွဲ့သည် ၂၄-၁-၂၀၂၅ရက်နေ့ နံနက်(၁၀:၀၀) နာရီအချိန်တွင် ဓာတ်မြေဩဇာအမျိုးအစားအလိုက် (50kg)တစ်အိတ်ဈေးနှုန်းများအား ကွင်းဆင်း မေးမြန်းရာတွင် အာမို(၁၅:၁၅:၁၅)တစ်အိတ်လျှင် (၁၆၅၀၀၀)ကျပ်၊ preအာမို(၁၆:၁၆:၁၆) တစ်အိတ် လျှင် (၁၈၅၀၀၀)ကျပ်၊ အာမို(၁၀:၁၀:၁၀)တစ်အိတ်လျှင်(၁၀၀၀၀၀)ကျပ်၊ ပုလဲ(ယူရီးယား)တစ်အိတ် လျှင်(၁၁၀၀၀၀)ကျပ်၊ ပိုတက်(သီးသန့်)တစ်အိတ်လျှင်(၁၂၅၀၀၀)ကျပ်၊ ပုလဲ(ရွှေနဂါး)တစ်အိတ်လျှင် (၁၀၀၀၀၀)ကျပ်၊ ကွန်ပေါင်း(၁၅:၁၅:၁၅)တစ်အိတ်လျှင် (၁၃၅၀၀၀)ကျပ်တို့ဖြင့် ရောင်းဝယ်လျက်ရှိ ကြောင်းနှင့် ပုလဲဓာတ်မြေဩဇာသည် ယခင်လထက် (၅၀၀၀)ကျပ်ခန့် ဈေးနှုန်းမြင့်တက်ခဲ့ပါကြောင်း၊ ပုလဲ(ယူရီယား)၊ ပုလဲ(ရွှေနဂါး)ဓာတ်မြေဩဇာများသည် ဈေးနှုန်းသင့်တင့်ပြီး စိုက်ပျိုးတောင်သူများ အတွက် ကုန်ကျစရိတ်သက်သာသဖြင့် တောင်သူများအနေဖြင့် စပါး၊ ပဲတီစိမ်း၊ ပဲစဉ်းငုံ၊ နှမ်း၊ မြေပဲ၊ နေကြာသီးနှံများစိုက်ပျိုးရာတွင် ပုလဲ(ယူရီယား)၊ ပုလဲ(ရွှေနဂါး)နှင့် ကွန်ပေါင်း(၁၅)ပတ်လည် ဓာတ်မြေဩဇာများကိုသာ အသုံးပြုမှုများပြားလျက်ရှိကြောင်း ဓာတ်မြေဩဇာအရောင်းဆိုင်ပိုင်ရှင် တစ်ဦး၏ ပြောကြားချက်အရ သိရှိရသည်။

ညောင်ဦးခရိုင်တွင် ပုလဲဓာတ်မြေဩဇာတစ်အိတ်လျှင် (၁၂၀၀၀၀)ကျပ်မှ (၁၃၀၀၀၀)ကျပ်၊ အာမိုတစ်အိတ်လျှင်(၁၆၀၀၀၀)ကျပ်၊ ယူရီးယားတစ်အိတ်လျှင်(၁၀၀၀၀၀)ကျပ်ဖြင့် ရောင်းချလျက်ရှိပြီး ယခင်လထက် ပုလဲဓာတ်မြေဩဇာတစ်အိတ်လျှင် (၃၀၀၀)ကျပ်ခန့် ဈေးနှုန်းမြင့်တက်ခဲ့ကြောင်း ဓာတ်မြေဩဇာအရောင်းဆိုင်ပိုင်ရှင်တစ်ဦး၏ ပြောကြားချက်အရ သိရှိရပါကြောင်းနှင့် မြင်းခြံခရိုင်နှင့် ညောင်ဦးခရိုင်အတွင်း ဓာတ်မြေဩဇာများ ပြတ်လပ်မှုမရှိကြောင်း သိရှိရပါသည်။

   DOCA(မန္တလေး)

          ကျောက်ဆည်မြို့နယ်သည် စိုက်ပျိုးရေးကို အဓိကထားလုပ်ကိုင်သောဒေသတစ်ခုဖြစ်သည့် အတွက်သီးနှံမျိုးစုံစိုက်ပျိုးဖြစ်ထွန်းပါသည်။သီးနှံမျိုးစုံစိုက်ပျိုးသည့်အနက် ရာသီမရွေးစိုက်ပျိုးနိုင်ပြီး ရာသီမရွေးစားသုံးနိုင်သော စျေးကွက်ဝယ်လိုအားရှိသည့် သ‌င်္ဘောပင်များကိုလည်းတိုးချဲ့စိုက်ပျိုးလာ ကြပါသည်။သ‌င်္ဘောစိုက်ပျိုးရာတွင် မျိုးကောင်းမျိုးသန့်များရွေးချယ်ပျိုးထောင်၍ ပျိုးပင်များဖြစ်ထွန်း လာပါကမြေကျင်းတူး၍ ၂ပေခြား ၃ပေ ခြားစိုက်ပျိုးကြပါသည်။(၁)ဧကလျှင် အပင်(၂၀၀၀)ကျော် ဝင်ဆံ့ပြီး တစ်ပင်အသီးတင်မည်ဆိုပါက သ‌င်္ဘောသီး (၂၅-၄၀)လုံးအထိ ထွက်ရှိကြောင်း၊ (၁)ဧက အထွက်နှုန်းအနေဖြင့်အလုံးရေ(၄၀၀၀-၅၀၀၀)ကျော်အထိ ထွက်ရှိကြောင်း ၊ (၁)ဧကကုန်ကျစရိတ် အနေဖြင့် မျိုး ၊ သွင်းအားစု ၊ လုပ်သားခအပါအဝင် စုစုပေါင်း(၁၅-၁၆)သိန်းကျပ် အထိရှိပြီး မြေဆီ မြေသြဇာကျွေးသည့်အပေါ်မူတည်၍ အသီးအပွင့်များဝေဆာပြီး အပင်သက်တမ်းကြာနိုင်ကြောင်း၊ အများဆုံးစိုက်ပျိုးသောမျိုးများမှာ ထိုင်ဝမ်သ‌င်္ဘောမျိုးများဖြစ်ကြာင်း၊ ထိုင်ဝမ်သ‌င်္ဘောပင်မှာ အပင်ပုမျိုး ဖြစ်ပြီး အသီးများအမြောက်အများသီး၍ အလုံးများသန့်ကြောင်း ၊ သ‌င်္ဘောခြံများမှာ အများအားဖြင့် သ‌င်္ဘောသီးအမှည့်ကို ဦးစားပေးရောင်းချကြကြောင်း ၊ သ‌င်္ဘောသီးများကို စိုက်ခင်းထဲအရောက် လာ‌ရောက်ဝယ်ယူသူများရှိသလို မှာယူသောမြို့များသို့လည်း တင်ပို့ရောင်းချပေးလျှက်ရှိကြောင်း ၊ ရောင်းတမ်းမဝင်သော အသီးစိမ်းများကို သ‌င်္ဘောသီးထောင်း ၊ သ‌င်္ဘောသီးသုပ် ရောင်းချသူများမှ လာ‌ရောက်ဝယ်ယူကြကြောင်း၊ သ‌င်္ဘောသီး လက်လီစျေးနှုန်းအနေဖြင့် အမှည့်(အကြီး)တစ်လုံးလျှင် (၂၅၀၀)ကျပ်၊ (အလတ်)တစ်လုံးလျှင်(၁၅၀၀)ကျပ်အထိ ရောင်းချရပြီး လက်ကားစျေးနှုန်းအနေဖြင့် အမှည့်(အကြီး) တစ်လုံးလျှင် (၂၀၀၀)ကျပ်၊ (အလတ်)တစ်လုံးလျှင်(၁၃၀၀)ကျပ်အထိ ရောင်းချရ ကြောင်း  ၊ သ‌င်္ဘောသီးအစိမ်း တစ်လုံးလျှင် ဖောက်သည်စျေးအနေဖြင့် အလုံး အကြီး၊အသေးပေါ် မူတည်၍(၄၀၀-၅၀၀)ကျပ်အထိ ရောင်းချရကြောင်း ၊ နွေရာသီတွင် သ‌င်္ဘောသီးမှည့် ဖျော်ရည်များ အရောင်းသွက်၍ ဝယ်လိုအားများကြောင်း၊ သ‌င်္ဘောသီးအစိမ်းကို ရခိုင်သုပ်၊ဗမာသုပ်အဖြစ် စားသုံးကြ ပါသည်။သ‌င်္ဘောသီးစားသုံးခြင်းဖြင့် ဓါတ်တိုးဆန့်ကျင်ပစ္စည်းများကြွယ်ဝပြီး ရောင်းရမ်းမှုကိုလျော့ကျ စေခြင်း၊အရွယ်တင်နုပျိုနိုင်ခြင်း စသည့်အကျိုးကျေးဇူးများရရှိစေပါသည် ။ သ‌င်္ဘောသီးအမှည့် နှင့် သ‌င်္ဘောသီးအစိမ်းကို စားသုံးသူများ ကြိုက်နှစ်သက်ပြီး ဝယ်ယူစားသုံးကြသဖြင့် တောင်သူဦးကြီးများ အနေဖြင့် ဝင်ငွေတိုးစေသော သ‌င်္ဘောပင်များကို တိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါ သည်။

DOCA(မန္တလေး)