ပြည်တွင်းကုန်သွယ်မှုသတင်း

စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် သီးနှံမျိုးစုံစိုက်ပျိုး လျက်ရှိရာ ကြက်ဆူစေ့ကို ယာကွက်လွတ်များ၌လည်းကောင်း၊ ယာခင်းဘေးပတ်လည်၌လည်းကောင်း၊ ကြဲပက်စနစ်နှင့် တန်းစိုက်စနစ်တို့ဖြင့် စိုက်ပျိုးကြောင်း၊ ကြက်ဆူစေ့သီးနှံများသည် ကန့်ဘလူမြို့ နယ် ကံကြီးကုန်းကျေးရွာ၊ တောက္ကရှပ်ကျေးရွာနှင့် အခြားသောကျေးရွာများမှ ဝင်ရောက်လျက်ရှိပြီး ကြက်ဆူစေ့သည် စိုက်ပျိုးရလွယ်ကူပြီး ဈေးကောင်းရသဖြင့် စိုက်ပျိုးသူများအနေဖြင့် အပိုဝင်ငွေ ရရှိကာ မိသားစုအဆင်ပြေလျက်ရှိကြောင်း သိရှိရသည်။ ၂၀၂၅ ခုနှစ်၊ ဇွန်လ စတုတ္ထပတ်အတွင်း ဈေးနှုန်းမှာ ကြက်ဆူစေ့တစ်တင်းလျှင် (၄၈၀၀၀) ကျပ်၊ ကြက်ဆူစေ့ညံ့လျှင်(၄၇၅၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ယခုပတ်အတွင်း ကြက်ဆူစေ့(၁)တင်းလျှင်(၅၀၀၀)ကျပ် ဈေးနှုန်းဆက်လက်မြင့်တက်လျက်ရှိကြောင်း၊ ကြက်ဆူစေ့ များကို မန္တလေးမြို့ရှိ ပွဲရုံများ၊ ကုန်စည်ဒိုင်များသို့ တင်ပို့ရောင်းချကြောင်း၊ ဒေသတွင်းသီးနှံ ရောင်း ဝယ်ရေး လုပ်ငန်းရှင်များထံမှ သိရှိရပါသည်။ DOCA(စစ်ကိုင်း)

ရှမ်းပြည်နယ်အစိုးရအဖွဲ့၏ လမ်းညွှန်ချက်အရ ရှမ်းပြည်နယ်(တောင်ပိုင်း)၊ တောင်ကြီးမြို့နယ်အတွင်းရှိ အငြိမ်းစား(ပင်စင်စား)ဝန်ထမ်းများအား သက်သာသောနှုန်းထားဖြင့် ဝယ်ယူနိုင်ရန်အတွက် ရည်ညွှန်းဈေးဖြင့် စားအုန်းဆီ တစ်လလျှင် (၁)ပိဿာနှုန်းဖြင့် ရောင်းချပေးနိုင်ရန် ညွှန်ကြားခဲ့ရာ ရှမ်းပြည်နယ်၊ စားသုံးသူရေးရာဦးစီးဌာနနှင့် ရှမ်းပြည်နယ်(တောင်ပိုင်း)၊ ဆီကုန်သည်နှင့် ဆီလုပ်ငန်းရှင်အသင်းတို့မှ ပူးပေါင်း၍ လစဉ်ရောင်းချပေးလျက်ရှိရာ ယခုလ ပင်စင်လစာထုတ်ပေး သည့် ၂၀၂၅ခုနှစ်၊ ဇွန်လ (၂၁)ရက်နေ့၊ နံနက်(၉)နာရီအချိန်မှစ၍ သက်သာသောနှုန်းထားဖြင့် အငြိမ်းစားဝန်ထမ်းတစ်ဦးလျှင် စားအုန်းဆီ (ရည်ညွှန်းဈေး) (၁)ပိဿာနှုန်းဖြင့် ရောင်းချပေးခဲ့ပြီး ၂၁-၆-၂၀၂၅ ရက်နေ့တွင် အငြိမ်းစားဝန်ထမ်းဦးရေပေါင်း (၁၃၃၃)ဦးအား ရောင်းချပေးနိုင်ခဲ့ကြောင်း သိရှိရပါသည်။ DOCA(ရှမ်း)

၂၀၂၅ ခုနှစ်၊ ဇွန်လ စတုတ္ထအပတ်တွင် ကျိုင်းတုံမြို့ရှိ ဘိလပ်မြေနှင့် ဓာတ်မြေဩဇာ ဈေးနှုန်းအနေဖြင့် ဘိလပ်မြေ ကျားတံဆိပ် (40)kg တစ်အိတ်လျှင် (၂၆၈၀၀) ကျပ်၊ ဆင်တံဆိပ် (50)kg တစ်အိတ်လျှင် (၂၈၆၀၀)ကျပ်၊ စိန်တံဆိပ် (50)kg တစ်အိတ်လျှင် (၂၈၈၀၀)ကျပ် ဖြစ်ပါသည်။ ဓာတ်မြေဩဇာဈေးနှုန်းများမှာ ပုလဲ (MEP) (50)kg တစ်အိတ်လျှင် (၁၄၅၀၀၀)ကျပ်၊ တီဆူပါ (လေဆာ) (50)kg တစ်အိတ်လျှင် (၄၀၀၀၀) ကျပ်၊ တီဆူပါ (may) (၁) လီတာလျှင် (၇၀၀၀၀) ကျပ်၊ ယူရီးယား (မြင်းပျံ) (50)kg တစ်အိတ်လျှင် (၁၄၀၀၀၀) ကျပ် တို့ဖြစ်ပါသည်။ တာချီလိတ်မြို့ရှိ ဘိလပ်မြေဈေးနှုန်းများမှာ ကျားတံဆိပ် (40)kg တစ်အိတ်လျှင် (၂၂၃၀၀) ကျပ်၊ ဆင်တံဆိပ်(50)kg တစ်အိတ်လျှင် (၂၄၀၀၀)ကျပ်၊ စိန်တံဆိပ်(50)kg တစ်အိတ်လျှင် (၂၄၃၀၀)ကျပ် တို့ဖြစ်ပါသည်။ ရှမ်းပြည်နယ်(အရှေ့ပိုင်း)၊ ကျိုင်းတုံမြို့၏ ဘိလပ်မြေနှင့်ဓာတ်မြေဩဇာဈေးနှုန်းများမှာ ယခင် ဇွန်လတတိယအပတ်နှင့် ဈေးနှုန်းနှိုင်းယှဉ်ပါက ဘိလပ်မြေဈေးနှုန်း အနည်းငယ်ကျဆင်းခဲ့ပြီး ဓာတ်မြေဩဇာဈေးနှုန်းများမှာ တည်ငြိမ်လျက်ရှိပါသည်။ တာချီလိတ်မြို့၏ ဘိလပ်မြေဈေးနှုန်းများမှာ အနည်းငယ်ကျဆင်းခဲ့ကြောင်း သိရှိရပါသည်။ DOCA(ရှမ်း)