ပြည်တွင်းကုန်သွယ်မှုသတင်း

           ဝါတွင်းကာလမိုးရာသီအတွင်း မန္တလေးပန်းစျေးကွက်သို့  မန္တလေးတိုင်းဒေသကြီးရှိ အမရပူရ ခရိုင်၊ပြင်ဦးလွင်ခရိုင်၊ ကျောက်ဆည်ခရိုင်၊ မိတ္တီလာခရိုင်နှင့် မြင်းခြံခရိုင်တို့မှထွက်သည့်ပန်းများ၊ စစ်ကိုင်းတိုင်းဒေသကြီးနှင့် ရှမ်းပြည်နယ်၊တောင်ကြီးဒေသတို့မှ ထွက်ရှိသည့်ဂန္ဓာမာပန်းများ ဝင် ရောက်လျက်ရှိပြီး၊ အရောင်းသွက်လျက်ရှိကြောင်းသိရှိရပါသည်။ စျေးကွက်အတွင်း အများဆုံး တွေ့ ရသော ဂန္ဓမာပန်းအမည်များမှာ ဆန်းမားဖြူ၊ ဆန်းမားဝါ၊ လပ်ကီးဖြူ၊လပ်ကီးဝါ၊လပ်ကီးနီ၊ ရွှေစိမ်း၊ကီလို၊ကြွေဖြူ၊ ကြွေဝါ၊ချက်စိမ်း၊ပုလဲဖြူစသည်ဖြင့် တွေ့ရှိရပါသည်။၂၀၂၅ ခုနှစ် အောက်တို ဘာလပထမပတ်အတွင်း လက်လီစျေးအနေဖြင့် ဂန္ဓာမာပန်းကြွေဖြူ တစ်ရိုး တစ်ပွင့် (၁၀ခက်ပါ) တစ်စီးလျှင် ၄၀၀၀ ကျပ်နှင့် ၄၅၀၀ ကျပ်၊ဆန်းမား၊ လပ်ကီးတစ်စီးလျှင် ၃၀၀၀ ကျပ်နှင့် ၃၅၀၀ကျပ်အသီးသီးဖြင့် ရောင်းချလျက်ရှိကြောင်း သိရှိရပါသည်။

DOCA (မန္တလေး)

      မအူပင်မြို့နယ်တွင် ‌ဒေသတွင်း အညာဒေသထွက် မြေပဲမွကြော်များ ရောင်းချလျက်ရှိသည်။ မြေပဲမွကြော် ကြွပ်ရွ၍ မာမာကြီးဖြစ်အနေပဲ စား၍ ကောင်းမွန်သော အညာဒေသလက်မှ မှာယူရောင်းချသည့် မြေပဲမွကြော် ဖြစ်သည်။ မြေပဲနှင့် ဆန်နှစ်ကို လုံး၍ ဆီဖြင့်ကြော်ထားသော မုန့်တစ်ခုဖြစ်ပြီး ရောင်းအားကောင်းသော အစားအစာတစ်ခုဖြစ်ကြောင်း သိရသည်။

      ရောင်းချမှုအနေဖြင့် မြေပဲမွကြော် တစ်ထုတ်လျှင် ၃၀၀၀ ကျပ်ဖြင့် ‌ရောင်းချကြောင်း သိရသည်။ မြေပဲ မွကြော်ကို အညာဘက်မှ ပီနံအိတ်လိုက်မှာယူပြီး မအူပင်မြို့နယ်တွင် ပြန်လည်ထုတ်ပိုး၍ အချိန်ဖြင့် ရောင်းချကြောင်း၊ ၁ထုတ်လျှင် ၂၅ကျပ်သား ရှိပြီး ၅၀ကျပ်သား ၁ထုတ်လျှင် ၆၀၀၀ကျပ်၊ ၁ပိသာလျင် ၁၀၀၀၀ကျပ်ဖြင့် ရောင်းချပြီး ရောင်းအားကောင်း၍ အဆင်ပြေလျက်ရှိကြောင်းသိရသည်။

DOCA(ဧရာဝတီ)

  ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ် ခမတ်ကျေးရွာနှင့် မောင်းမကျေးရွာ များတွင် ၂၀၂၅-၂၀၂၆ ခုနှစ်တွင် Seederစနစ်ဖြင့် စိုက်ပျိုးထားသော မိုးစပါးစံပြကွက်များအား အောက်တိုဘာလ(၉)ရက်နေ့၊ နံနက်(၀၉:၀၀)နာရီအချိန်တွင် စံပြကွက်ရိတ်သိမ်းခဲ့ကြကြောင်း သိရှိရပါသည်။

ထိုမိုးစပါး စံပြကွက်ရိတ်သိမ်းပွဲသို့ ရန်ကုန်တိုင်းဒေသကြီး၊ စိုက်ပျိုးရေးဦးစီးဌာနမှ ဒုတိယ တိုင်းဒေသကြီးဦးစီးမှူး ဦးတင့်နိုင်နှင့်အဖွဲ့၊ ခရိုင်အဆင့်စိုက်ကြပ်အဖွဲ့ဝင်များ မြို့နယ်စိုက်ကြပ် အဖွဲ့ဥက္ကဌ ဦးအောင်ရဲနှင့်အဖွဲ့ဝင်များ တက်ရောက်အားပေးခဲ့ကြပြီး ခရမ်းမြို့နယ်၊ ခမတ်ကျေးရွာ တွင် Seeder စံပြကွက်ဧက (၁၀၀)မှ တောင်သူဒေါ်အေးမူ၊ ကွင်းအမှတ် (၇၈၀)A၊ ဦးပိုင်အမှတ် (၁၅)တွင် စိုက်ပျိုးထားသော မှော်ဘီ-၃ စပါးစိုက်ဧက (၉.၇၇)ဧက်အား စံပြကွက်ရိတ်သိမ်းခဲ့ရာ စပါးအစိုတင်း(၁၆၄.၀၁)တင်းထွက်ရှိပြီး မောင်းမကျေးရွာတွင် တောင်သူ ဦးတင်ထွေး၊ ကွင်း အမှတ်(၇၆၀A)၊ ဦးပိုင်အမှတ် (၁၅/၁)တွင် Seederစနစ်တွင် စိုက်ပျိုးထားသော မှော်ဘီ-၃ စပါး စိုက်ဧက (၁၀.၀၀)ဧကအား စံကွက်ရိတ်သိမ်းရာတွင် စပါးအစိုတင်း (၁၈၂.၃၆)တင်း အသီးသီး ထွက်ရှိခဲ့ကြောင်း သိရှိရပါသည်။

DOCA(ရန်ကုန်)

          ကန်စွန်းရွက်သည် လူအတန်းအစားမရွေးကြိုက်နှစ်သက်သော အရွက်တစ်မျိုးဖြစ်ပြီးရေရရှိ သောနေရာများတွင် လွယ်ကူစွာပေါက်ရောက်ရှင်သန်နိုင်သည်။ ကန်စွန်းရွက်များကို လယ်ကန်သင်း ၊လယ်ကွက်၊ အင်းအိုင်၊ ချောင်းမြောင်းနှင့်အခြားရေရရှိသော နေရာများတွင်သဘာဝ အလျောက်ပေါက် ရောက်မှုများမှရရှိနိုင်သလို တစ်နိုင်တစ်ပိုင်သော်လည်းကောင်း၊ စီးပွားဖြစ်သော်လည်းကောင်း သီးသန့် စိုက်ပျိုးခြင်းများမှလည်း ထွက်ရှိကြ၍ရာသီချိန်ခါမရွေး စားသုံးရသောသီးနှံတစ်မျိုးဖြစ်ပါသည်။ ကန်စွန်းရွက်မှာ ဗမာကန်စွန်းရွက်နှင့် တရုတ်ကန်စွန်းရွက် (စိုက်ပျိုးရေး)ဟူ၍ အများအားဖြင့်သိရှိ ကြပြီး ဗမာကန်စွန်းရွက်ကို ကြိုက်နှစ် သက်မှုများသော်လည်း မိုးတွင်းရာသီကာလမှသာ အများဆုံး ထွက်ပေါ်ရရှိသဖြင့်စိုက်ပျိုးရေး ကန်စွန်းရွက်ကိုသာအားပြုစားသုံးကြပါသည်။ ကျောက်ပန်းတောင်း မြို့နယ်ရှိမြို့မစည်ပင်သာယာပျံကျဈေးအတွင်းသို့ ညောင်ဖြူပင်ကျေးရွာ၊ လဲဂွကျေးရွာ ၊ကိုင်းကျေးရွာ များတွင် စိုက်ပျိုးထွက်ရှိသောကန်စွန်းရွက်များကို ကန်စွန်းရွက်(၁)စည်းလျှင်(၁၀၀)ကျပ်၊ ကန်စွန်း(၁၀) စည်းလျှင်(၈၀၀)ကျပ်၊ ကန်စွန်းရွက်အစည်း(၁၀၀)လျှင်(၆၀၀၀)ကျပ်ဖြင့်ရောင်းချကြောင်း၊ ကန်စွန်းရွက် များကိုအိမ်ရှင်မများ ဟင်းချက်ရာတွင်လည်းကောင်း၊ စားသောက်ဆိုင်များနှင့် အထောင်းစုံရောင်းချ သော ဆိုင်များမှလည်းကောင်း ဝယ်ယူကြသဖြင့် ကန်စွန်းရွက်များ အရောင်းအဝယ်သွက်လျက် ရှိကြောင်း ကုန်စိမ်းရောင်းချသူတစ်ဦးထံမှ သိရှိရသည်။

DOCA (မန္တလေး)

           ငှက်ပျောဖူးသည် ငှက်ပျောပင်၏ အပွင့်ဖြစ်ပြီး ငှက်ပျောသီးအဖြစ် မအောင်မြင်မီ အဆင့်တွင်ရှိသော အပွင့်ဖူးအစိတ်အပိုင်းဖြစ်ကြောင်း၊ ခရမ်းရောင်ရှိပြီး မာကျောသည့်အခွံဖြင့်ဖုံး အုပ်ထားကာ အတွင်းတွင်ပျော့ပျောင်းပြီး အဝါရောင်သန်းသော အပွင့်လေးများ ခွေလျက်ရှိသော အဖူးဖြစ်သည်။ ငှက်ပျောဖူးသည် အာဟာရဓာတ်ကြွယ်ဝသော အစားအစာတစ်ခုဖြစ်ပြီး အမျှင် ဓာတ်ပါဝင်၍ အစာခြေစနစ်အတွက်ကောင်းမွန်ကြောင်း၊ ပရိုတင်းနှင့် ပိုတက်ဆီယမ်ကြွယ်ဝသဖြင့် ကြွက်သားများနှင့် အာရုံကြောများအတွက်အကျိုးပြုကြောင်း၊ ကိုယ်ခံအားကိုမြှင့်တင်ပေးသော ဗီတာမင်အေ၊စီနှင့်အီးတို့ပါဝင်၍ အရွယ်တင်နုပျိုစေကြောင်း၊ သံဓာတ်ပါဝင်ပြီး သွေးအားနည်းရော ဂါကို ကာကွယ်ပေးကြောင်းသိရှိရသည်။ ကျန်းမာရေးအကျိုးကျေးဇူးများအနေဖြင့်  သကြားဓာတ် နည်းပြီး အမျှင်ဓာတ်နည်းသဖြင့် သွေးတွင်းသကြားဓာတ်ကိုထိန်းညှိပေး၍ ဆီးချိုရောဂါကို ကာ ကွယ်ပေးကြောင်း၊ ပိုတက်ဆီယမ်ဓာတ်သည် သွေးပေါင်ချိန်ကိုထိန်းညှိပေးသောကြောင့် သွေးတိုး ကျစေကြောင့်၊ အူမကြီးကိုသန့်စင်စေပြီး ဝမ်းချုပ်ခြင်းကိုကာကွယ်ပေး၍ အစာခြေစနစ်ကို အထောက်အကူပြုကြောင်း၊ ကယ်လိုရီနည်းပြီး ဗိုက်ပြည့်စေသောအစားအစာဖြစ်သောကြောင့် ခန္ဓာကိုယ်အတွက် ဝိတ်ချသူများအနေဖြင့်  ကိုယ်အလေးချိန်ကျဆင်းကြောင်း၊ မဂ္ဂနီဆီယမ် ကြွယ်ဝ စွာပါဝင်သဖြင့် စိတ်ကျရောဂါကို သက်သာစေကြောင်းဖတ်ရှု့သိရှိရသည်။ လတ်ဆတ်သော ငှက်ပျောဖူးများကို ရွေးချယ်ဝယ်ယူစားသုံးသင့်ကြောင်း၊ ၂၀၂၅ခုနှစ်၊စက်တင်ဘာလ နောက်ဆုံး ပတ်တွင် မြင်းခြံမြို့ အေးမြသီတာဈေးတွင်ရောင်းချနေသော ငှက်ပျောဖူးတစ်ဖူးလျှင် (၁၀၀၀-၁၅၀၀)ကျပ်ခန့် ပေါက် ဈေးများဖြင့် ‌ရောင်းချကြောင်း၊ ငှက်ပျေားဖူးသည် မြန်မာ့ရိုးရာအစား အစာတစ်ခုသာမက ကျန်းမာရေးအတွက်လည်းအလွန်ကောင်းမွန်သော ဟင်းသီးဟင်းရွက် တစ်မျိုးဖြစ်ကြောင်းသိရှိရသည်။

DOCA (မန္တလေး)