သတင်းနှင့် လှုပ်ရှားမှုများ

    မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှု၊ ခရိုင်ဦးစီးမှူး၏ ကြီးကြပ်မှုဖြင့် ပခုက္ကူခရိုင်ဦးစီးမှူးရုံးမှ ဒုတိယခရိုင်ဦးစီးမှူးနှင့်ဝန်ထမ်းများသည် (၁၀.၁၂.၂၀၂၄)ရက်နေ့၊ နံနက် (၀၉:၃၀)အချိန်တွင် အစားအသောက်နှင့်ဆေးဝါးကွပ်ကဲရေးဦးစီးဌာန၊ စည်ပင် သာယာရေးအဖွဲ့တို့နှင့် ပူးပေါင်း၍ ပခုက္ကူမြို့မဈေးရှိ ကုန်စုံဆိုင်များသို့ စားသုံးပြည်သူများ ဘေးအန္တရာယ်ကင်းရှင်းပြီး လုံခြုံစိတ်ချရမှုရှိသောကုန်စည်များ ဝယ်ယူသုံးစွဲနိုင်ရန်နှင့် ဈေးကွက်အတွင်း ဘေးအန္တရာယ်ရှိသော ကုန်စည်များပပျောက်စေရန် ရည်ရွယ်၍ ဈေးကွက်စောင့်ကြည့်စစ်ဆေးခဲ့ကြောင်း သိရသည်။

    မြို့မဈေးအတွင်းရှိ ကုန်မျိုးစုံဆိုင်များတွင် ရောင်းချနေသော အရန်သင့်အစားအစာများ၊ အသင့်စားမုန့်အမျိုးမျိုးတို့တွင် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ညွှန်ကြားချက်အမှတ်(၂/၂၀၁၉)နှင့်အညီ ကုန်စည်တွင်ဖော်ပြရမည့် ကုန်အညွှန်းအမှတ်အသားများ ပြည့်စုံစွာ ဖော်ပြထားခြင်းရှိ/မရှိ၊ ဈေးကွက်အတွင်း ဘေးအန္တရာယ်ရှိသောကုန်စည်များ ရောင်းချခြင်း မပြုရန်နှင့် အစားအသောက်နှင့်ဆေးဝါးကွပ်ကဲရေးဦးစီးဌာနမှ စားသုံးရန် မသင့်ထုတ်ပြန်ထားသော ကုန်စည်များ၊ သက်တမ်းလွန်သောစားသောက်ကုန်များ ရောင်းချခြင်းရှိ/မရှိ ကွင်းဆင်းစစ်ဆေးခဲ့ပြီး ကုန်အညွှန်းအမှတ်အသား ပြည့်စုံမှန်ကန်စွာဖော်ပြထားသော ကုန်စည်များသာ ရောင်းချရန် အသိပညာပေး ဆွေးနွေးခဲ့ကြောင်း သိရှိရပါသည်။

DOCA(မကွေး)

    မကွေးတိုင်းဒေသကြီး၊ ဂန့်ဂေါခရိုင်ဦးစီးမှူးရုံးမှ ဒုတိယဦးစီးမှူးနှင့်ဝန်ထမ်းသည် (၁၀.၁၂.၂၀၂၄) ရက်နေ့၊ နံနက်(၁၀:၀၀)နာရီအချိန်တွင် ဂန့်ဂေါမြို့ပေါ်ရှိ ဗေရှားဒါသောက်ရေသန့် လုပ်ငန်းသို့ သွားရောက်၍ ကုန်အညွှန်းအမှတ်အသား ပြည့်စုံစွာပါဝင်ရေးနှင့် ကုန်အမှတ်တံဆိပ်မှတ်ပုံတင် ဆောင်ရွက်နိုင်ရေးအတွက် လုပ်ငန်းရှင်နှင့် တွေ့ဆုံဆွေးနွေးအသိပညာပေး ဆောင်ရွက်ခဲ့ကြောင်း သိရသည်။

    ရေသန့်ထုတ်လုပ်ရောင်းချသော လုပ်ငန်းရှင်များအနေဖြင့် မိမိတို့ ထုတ်လုပ်သော ရေသန့်များအား ပြည်သူများမှ နေ့စဉ်ဝယ်ယူသုံးစွဲလျက်ရှိရာတွင် စားသုံးသူများ ဘေးကင်းလုံခြုံမှုရှိစေရေးအတွက် အဆင့်ဆင့်ကျိုချက်သန့်စင်ပြီးသော သောက်ရေသန့်များကို ရောင်းချရန်၊ ရေသန့်ထုတ်လုပ်ရာတွင်လည်း တစ်ကိုယ်ရေသန့်ရှင်းသပ်ရပ်စွာ ပြုလုပ်ပြီး ရောင်းချသောရေဘူးများကိုလည်း သန့်သန့်ရှင်းရှင်း ပြုလုပ်ရန်နှင့် ရောင်းချသောကုန်စည်ပေါ်တွင် ကုန်အညွှန်းအမှတ်အသားပြည့်စုံစွာထည့်သွင်းဖော်ပြရန်၊ ကုန်အညွှန်းအမှတ်အသား မပြုလုပ်ရသေးပါက စားသုံးသူ ရေးရာဦးစီးဌာနသို့ လျှောက်ထားနိုင်ပြီး သက်ဆိုင်ရာအစိုးရဌာနများ၏ ထောက်ခံချက်များ ပြည့်စုံ စွာဖော်ပြထားသော ကုန်စည်ကိုသာ ရောင်းချရန်၊ အွန်လိုင်းဖြင့် ရောင်းချပါကလည်း ရောင်းချခွင့် လုပ်ငန်းမှတ်ပုံတင်လျှောက်ထားရရှိပြီးမှသာ ရောင်းချရန်နှင့် စားသုံးသူ ရပိုင်ခွင့် အခွင့်အရေးများ လိုက်နာရမည့်တာဝန်များ၊ စီးပွားရေး လုပ်ငန်းရှင်၏ တာဝန်များနှင့် စားသုံးသူမှ ကုန်စည်၊ ဝန်ဆောင်မှုနှင့် စပ်လျဉ်း၍ နစ်နာဆုံးရှုံးမှုများ ဖြစ်ပေါ်ပါက ပြောရေးဆိုခွင့်၊ တိုင်ကြားခွင့်၊ ကုစားခွင့်အကြောင်းကို အသိပညာပေးဆွေးနွေးခဲ့ပြီး အသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။ 

DOCA(မကွေး)

      ဧရာဝတီတိုင်းဒေသကြီး၊ ဖျာပုံခရိုင် ၊ ဒေးဒရဲမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းတို့သည် ၂၀၂၄ ခုနှစ်၊ ဒီဇင်ဘာလ(၁၁) ရက်နေ့ ၊ နေ့လယ် (၁၃:၀၀) နာရီအချိန်တွင် ဒေးဒရဲမြို့မဈေးအတွင်း ရောင်းချနေသော ကုန်မျိုးစုံဆိုင်များရှိ ဟင်းခတ်အမွှေးအကြိုင်ပစ္စည်းများတွင် ကုန်အညွှန်းအမှတ်အသား ပြည့်စုံမှုရှိ/မရှိ ကွင်းဆင်းစစ်ဆေးခဲ့ကြပါသည်။

    အဆိုပါ စစ်ဆေးရာတွင် မြို့မဈေးရှိ ကုန်စုံဆိုင်ကြီးများတွင် ရောင်းချနေသော မြန်မာရနံ့ ငြုပ်ကောင်းမှုန့်၊ အများကြိုက် မဆလာ၊ AJT-NO-MOTO Shark ငါးသေတ္တာတို့တွင်  FDA ထောက်ခံချက်များ ပြည့်စုံစွာ ပါဝင်မှုရှိ/မရှိနှင့် ပါဝင်ပစ္စည်း ပြည့်စုံစွာ ဖော်ပြထားခြင်းရှိ/မရှိ ၊ သက်တမ်းကုန်ဆုံးရက်နှင့် ထုတ်လုပ်သည့်ရက်စွဲများ ဖော်ပြထားရှိမှုအခြေအနေ၊ ကုန်အညွှန်း အမှတ်အသားဖော်ပြထားရှိမှု အခြေအနေ၊ အလေးချိန် အချိန်အတွယ်နှင့် ဓာတ်မတည့်ကြောင်း ဖော်ပြချက်များ ပါဝင်မှုရှိ/မရှိတို့ကို ကွင်းဆင်းစစ်ဆေးခဲ့ရာ ပြည့်စုံမှုရှိကြောင်း တွေ့ရှိရပြီး ကုန်အညွှန်းအမှတ်အသား မပြည့်စုံသော ကုန်စည်များ ရောင်းချခြင်းမပြုရန် သတိပေး အကြံပြုခဲ့ကြောင်း သတင်းရရှိပါသည်။

DOCA(ဧရာဝတီ)

    ဖျာပုံမြို့နယ် စားသုံးသူရေးရာဦးစီးဌာနမှ မြို့နယ်စစ်ဆေးရေးမှူး ဦးမင်းဇော်သည် ၂၀၂၄ ခုနှစ် ဒီဇင်ဘာလ (၁၁) ရက်နေ့တွင် ဖျာပုံမြို့ပေါ်ရှိ ဆေးဆိုင်များအား ဆေးနှင့်ဆေးဝါးများကို သက်ဆိုင်ရာ ထောက်ခံချက်ဖြင့် ရောင်းချမှု ရှိ/မရှိ ကွင်းဆင်းစစ်ဆေးမှု ဆောင်ရွက်ခဲ့ကြောင်း သိရသည်။

    အဆိုပါ စစ်ဆေးခြင်းတွင် မြို့နယ်တာဝန်ခံ ဦးမင်းဇော်သည် စံမမီဆေးဝါးများနှင့် တရားမဝင်ဆေးဝါးများ ရောင်းချမှုအား စစ်ဆေးခြင်း၊ နည်းစနစ်မှန်ကန်စွာ ထားသိုသိမ်းဆည်းမှု ရှိ/မရှိ စစ်ဆေးခြင်း၊ သက်ဆိုင်ရာထောက်ခံချက် ပါဝင်မှုရှိ/မရှိ စစ်ဆေးခြင်း၊ ဈေးနှုန်းထားများ မေးမြန်းခြင်းနှင့် ဆေးနှင့်ဆေးဝါးရောင်းချရန် တရားဝင်မှတ်ပုံတင် ထားရှိမှုများ စစ်ဆေးခြင်း ထို့နောက် မြို့နယ်တာဝန်ခံ ဦးမင်းဇော်သည် ဆေးအရောင်းဆိုင် များအား သက်တမ်းလွန်ဆေးများ မရောင်းချမိရန်နှင့် ရည်ညွန်းဈေးအတိုင်း ရောင်းချကြရန် အသိပေးပြောကြားခဲ့ကြောင်း သိရှိရပါသည်။

DOCA(ဧရာဝတီ)

   ဧရာဝတီတိုင်းဒေသကြီး၊ မြောင်းမြခရိုင်၊အိမ်မဲမြို့နယ်တွင် ခရိုင်အုပ်ချုပ်ရေးအဖွဲ့၊ မြို့နယ်စည်ပင်သာယာအုပ်ချုပ်ရေးအဖွဲ့၊ မွေးမြူရေးနှင့်ကုသရေးဦးစီးဌာန ၊ စားသုံးသူရေးရာဦးစီးဌာနရှိ ဝန်ထမ်းများသည်   (၁၁-၁၂-၂၀၂၄) ရက်နေ့ နံနက်(၀၈:၀၀)နာရီ၌ အိမ်မဲမြို့နယ်ရှိ မြို့မဈေးတွင် ကြက်ဥအလုံး(၃၅၀၀)အားသွားရောက်၍ ရောင်းချခဲ့ကြောင်း သိရှိရပါသည်။

     ထိုသို့ရောင်းချပေးရာတွင် အများပြည်သူများသက်သာစွာဝယ်ယူနိုင်ရန် တစ်လုံးလျှင် (၃၅၀)ကျပ်နှင့် လူ(၁)ဦးလျှင် (၅)လုံးနှုန်းဖြင့် အိမ်မဲမြို့နယ်ရှိ အခွန်လွတ်ဈေးတွင် စုစုပေါင်းကြက်ဥ အလုံးရေ (၃၅၀၀)အား ရောင်းချပြီး လိုအပ်သည်များကို သက်ဆိုင်ရာတာဝန်ရှိသူများနှင့်ပေါင်းစပ်ညှိနှိုင်း၍ နောက်ရက်များတွင်လည်း ဆက်လက်ရောင်းချပေးသွားရန် စီစဉ်ထားကြောင်း သိရှိရပါသည်။

DOCA(ဧရာဝတီ)