သတင်းနှင့် လှုပ်ရှားမှုများ

          တိုက်ကြီးခရိုင်၊ တိုက်ကြီးမြို့နယ်၊ ဥက္ကံမြို့တွင် မြန်မာ့စီးပွားရေးဦးပိုင်အများနှင့် သက်ဆိုင်သော ကုမ္ပဏီလီမိတက် ဥက္ကံသကြားစက်ဖွင့်ပွဲအား ၂၀.၁၂.၂၀၂၄ ရက်နေ့ နံနက် (၉:၃၀)အချိန်တွင် ဥက္ကံသကြားစက်(ပင်မစက်ရုံ)ဖွင့်လှစ်ခဲ့ပါသည်။

          ဖွင့်ပွဲအခမ်းအနားသို့ အထွေထွေအုပ်ချုပ်ရေးဦးစီးဌာနမှ မြို့နယ်စီမံအုပ်ချုပ်ရေးဥက္ကဌ၊ စိုက်ပျိုးရေးဦးစီးဌာန၊ သစ်တောဦးစီးဌာန၊ စားသုံးသူရေးရာဦးစီးဌာန၊ ရပ်ကွက်အုပ်ချုပ်ရေးမှူး များ၊ စက်ရုံတာဝန်ရှိသူများနှင့် ဝန်ထမ်းများတက်ရောက်ခဲ့ပြီး ၂၀၂၄-၂၀၂၅ ခုနှစ် ကြိတ်ဝါး ရာသီကို ၂၀.၁၂.၂၀၂၄ မှစတင်ကြိတ်၍  (၃၁.၁.၂၀၂၅)ရက်နေ့၌ ကြိတ်ဝါးရာသီပြီးဆုံးပါမည်။ စက်ရုံမှ ကြံစိုက်ပျိုးတောင်သူများအတွက် ၂၀၂၄-၂၀၂၅ ကြံရာသီတွင် စိုက်စရိတ်ချေးငွေ (၁)ဧကလျှင် စိုက်ပျိုးချိန်၌ (၃၀၀၀၀၀)ကျပ်၊ ဘောင်လုံးချိန်(အပင်ပြုစုချိန်)တွင် (၁၅၀၀၀၀) ကျပ်၊  စိုက်ဧက (၁)ဧကလျှင် (၄၅၀၀၀၀)ကျပ်နှုန်းဖြင့် ချေးငွေစာချုပ် ချုပ်ဆိုဆောင်ရွက် ပေးကြောင်း သိရှိရပါသည်။

DOCA(ရန်ကုန်)

          စားသုံးသူရေးရာဦးစီးဌာန၊    ပဲခူးတိုင်းဒေသကြီး၊    သာယာဝတီခရိုင်၊  လက်ပံတန်းမြို့နယ်ခရိုင်ဦးစီးမှူးရုံး၌ အွန်လိုင်းရောင်းဝယ်ရေးလုပ်ငန်းရှင်ဒေါ်အေးဇင်ထိုက်နှင့်( ၁၈.၁၂.၂၀၂၄ ) ရက်နေ့၊ နံနက်( ၁၀:၀၀ )နာရီအချိန်တွင် စားသုံး/ ထုတ်လုံတာဝန်ခံ ဒေါ်ခိုင်ခိုင်ရီနှင့်တွေ့ဆုံ၍ စားသုံးသူကာကွယ်ရေး ဥပဒေအခန်း ( ၁၈ )ပါ ကုန်စည်များပေါ်တွင် ကုန်အညွှန်းအမှတ်အသား‌ဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက်  သတ်မှတ်ချက်များနှင့်အညီ ဖြန့်ဖြူးရောင်းချရန်၊ ကုန်စည်၏အရည်အသွေး၊ ထုတ်လုပ်ရက်စွဲ၊ သက်တမ်းကုန်ဆုံးရက်စွဲများ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်းများအားလည်းကောင်း၊ ဥပဒေအခန်း(၁၀) ပါစီးပွားရေးလုပ်ငန်းရှင်၏တာဝန်များ၊ ဥပဒေအခန်း(၁၁)ပါကုန်စည်နှင့်စပ်လျဉ်း၍ စားသုံးသူလက်ခံနိုင်သည့်အရည်အသွေးရှိခြင်းကို အထူးအလေးထားဆောင်ရွက်ရန် အသိပညာပေး ဆွေးနွေးဆောင်ရွက်ခဲ့ပြီး လက်ကမ်းစာ‌စောင်ဖြန့်ဝေခဲ့ကြောင်းသိရှိရပါသည်။

DOCA(ပဲခူး)

          ပဲခူးတိုင်းဒေသကြီး သာယာဝတီခရိုင် သာယာဝတီမြို့ အင်းရွာရှိ အမှတ်(၂) အကြီးစားစက်မှုလုပ်ငန်းရှိ အမှတ် (၃၄)အကြီးစားစက်ရုံ၏ ကြွေပြားထုတ်လုပ်မှုလုပ်ငန်းအား   (၁၆..၁၂..၂၀၂၄)ရက်နေ့ နံနက်   (၁၀ :၀၀) နာရီ အချိန်တွင်  ခရိုင်ဦးစီးမှူး  ဦးသန်းစိုး၊  စားသုံး/ ထုတ်လုံ   တာဝန်ခံဒေါ်ခိုင်ခိုင်ရီ တို့သည် ကြွေပြားစက်ရုံ၏ စက်ရုံကုန်ထုတ်မန်နေဂျာ ဦးမြင့်ဦး၊ သုတေသနနှင့်အရည်အသွေးထိန်းသိမ်းရေးတာဝန်ခံ ဒေါ်အေးအေးသန့်တို့နှင့်တွေ့ဆုံ၍  စားသုံးသူကာကွယ်ရေးဥပဒေပါ အကြောင်းအရာများအားဆွေးနွေးခဲ့ပါသည်။ ဆက်လက်၍ ခရိုင်ဦးစီးမှူးဦးသန်းစိုးမှ စားသုံးသူများ တိကျမှန်ကန်ရှင်းလင်းသော သတင်းအချက်များသိရှိစေရန်၊ စားသုံးသူများဘေးအန္တရာယ်ကင်းရှင်းစေရန်၊ စိတ်ကျေနပ်မှုရှိစေရန်အတွက်အာမခံချက်ပေးနိုင်သည့် အရည်အသွေးမြင့်မားသောကုန်စည်များ ဖော်ဆောင်ဖြည့်ဆည်းပေးနိုင်စေရေးနှင့်  စားသုံးသူကာကွယ်ရေးဥပဒေအား သိရှိလိုက်နာဆောင်ရွက်ရန် အသိပညာပေးခြင်းဟောပြောခဲ့ပြီး လက်ကမ်းစာစောင်များ ဖြန့်ဝေခဲ့ကြောင်းသိရှိရပါသည်။

DOCA(ပဲခူး)

          ပဲခူးတိုင်း‌ဒေသကြီး၊သာယာဝတီခရိုင်အတွင်းရှိ မြို့နယ်များတွင် အပတ်စဉ်အင်္ဂါနေ့တိုင်း ဘိလပ်မြေဆိုင်များသို့ စားသုံးသူရေးရာဦးစီးဌာနမှ ဝန်ထမ်းများသည် နိုင်ငံအတွင်းနေထိုင်ကြသော ပြည်သူများအား ဈေးနှုန်းသက်သာစွာဖြင့် ဝယ်ယူရရှိနိုင်ရေးအတွက် အလေးထားဆောင်ရွက်လျက် ရှိရာသာယာဝတီခရိုင်အတွင်း မြို့နယ်အလိုက်အပတ်စဉ်အင်္ဂါနေ့တိုင်း ကွင်းဆင်းဆောင်ရွက်လျှက် ရှိရာ (၁၇.၁၂.၂၀၂၄) ရက်နေ့၊ နေ့လယ်ပိုင်းတွင် လက်ပံတန်းမြို့နယ်မှ ပြုံးမောင်မောင်အိမ်ဆောက် ပစ္စည်းဆိုင်နှင့် ဖိုးချစ်ဘိလပ်မြေဆိုင်များသို့ သွားရောက်၍ ဘိလပ်မြေအမျိုးအစားအလိုက် ဈေးနှုန်းများ မြေပြင်လက်ကျန်အခြေအနေများကို ကွင်းဆင်းဆောင်ရွက်လျက်ရှိကြောင်း သိရှိရပါသည်။

DOCA(ပဲခူး)

         စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ဒီဇင်ဘာလ ၁၇ ရက် နေ့ မွန်းလွဲပိုင်းက ခရိုင်ဦးစီးမှူးရုံးအစည်းအဝေးခန်းမ၌ တောင်ငူမြို့ရှိ စားသုံးဆီလက်လီလက်ကား ရောင်းချသူများအားတွေ့ဆုံပြီး ဥပဒေ၊ အမိန့်၊ ညွှန်ကြားချက်များနှင့်အညီ ဆောင်ရွက်ရန်နှင့် အွန်လိုင်းဝန်ဆောင်မှု နှင့်ပတ်သက်၍ သိကောင်းစရာများကို အသိပညာပေးဆွေးနွေးခဲ့ပါသည်။

          ခရိုင်ဦးစီးမှူးက စားသုံးဆီရောင်းချရာတွင် လူစုလူဝေးမဖြစ်စေရေးအတွက် စားသုံးဆီဝယ်ယူခွင့်စာအုပ်ဖြင့် ရောင်းချရန်ကိစ္စ၊ ရပ်ကွက်/ ကျေးရွာအုပ်စုများအတွင်း အမှန်တကယ်နေထိုင်သည့် အိမ်ထောင်စုတိုင်းအား အညီအမျှရောင်းချပေးနိုင်ရေးကိစ္စ၊ သတ်မှတ်ရည်ညွှန်းဈေးအပေါ် သယ်ယူစရိတ်ပေါင်းပြီး နှစ်ရာခိုင်နှုန်းထက်မပိုဘဲအမြတ်တင်ရောင်းရန် ညွှန်ကြားချက်အား တိကျစွာလိုက်နာဆောင်ရွက်ရန် ကိစ္စများကို ရှင်းလင်းပြောကြားခဲ့ကြောင်းသိရသည်။

       ဆက်လက်၍ ခရိုင်ဦးစီးမှူးသည် အွန်လိုင်းဝန်ဆောင်မှုနှင့်ပတ်သက်၍ စားသုံးသူနစ်နာဆုံးရှုံးမှုမဖြစ်စေရေးအတွက် အွန်လိုင်းဝန်ဆောင်မှုလုပ်ငန်းကို မှတ်ပုံလက်မှတ်ရရှိမှသာ ဆောင်ရွက်ရန် အရေးကြီးကုန်စည်နှင့်ဝန်ဆောင်မှုဥပဒေအရ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ အမိန့်ကြော်ငြာစာ ထုတ်ပြန်ထားပြီးဖြစ်ရာ အွန်လိုင်းဖြင့်ရောင်းချသူများအနေဖြင့် မှတ်ပုံတင်လျှောက်ထားကြရန်နှင့် အွန်လိုင်းမှဝယ်ယူသူများအနေဖြင့်လည်း မှတ်ပုံတင်လက်မှတ်ရရှိသူများထံမှသာ ဝယ်ယူကြရန် အွန်လိုင်းဝန်ဆောင်မှုနှင့် ပတ်သက်၍ သိသင့်သိထိုက်သည်များကို အသိပညာပေး ပြောကြားခဲ့ပါသည်။

          ထို့နောက် တွေ့ဆုံဆွေးနွေးပွဲသို့ တက်ရောက်လာသူများ၏ ဆွေးနွေးမေးမြန်းချက်များကို ခရိုင်ဦးစီးမှူးက ပြန်လည်ရှင်းလင်းဆွေးနွေးခဲ့ကြောင်းနှင့် တွေ့ဆုံဆွေးနွေးပွဲသို့ တောင်ငူမြို့မှ စားသုံးဆီလက်လီလက်ကားရောင်းချသူ ၂၃ ဦး တက်ရောက်ကြောင်း သိရှိရပါသည်။

DOCA(ပဲခူး)